ಮೈಸೂರಲ್ಲಿ ಕೆಸಿಸಿ ಟಿ-10 ಕ್ರಿಕೆಟ್‌ ಲೀಗ್‌

ಸೆ. 6 ರಿಂದ 8 ಕೆಸಿಸಿ ಸೀಸನ್‌ 3 ಪಂದ್ಯಾವಳಿ

Team Udayavani, Jul 30, 2019, 3:05 AM IST

ಚಿತ್ರರಂಗದಲ್ಲಿ ಕ್ರಿಕೆಟ್‌ ಅಂದಾಕ್ಷಣ ಥಟ್ಟನೆ ನೆನಪಾಗೋದೇ ಸುದೀಪ್‌. ಈಗಾಗಲೇ ಸಿಸಿಎಲ್‌ ಮೂಲಕ ಕ್ರೀಡಾಭಿಮಾನಿಗಳ ಮನಗೆದ್ದಿರುವ ಸುದೀಪ್‌, ಸಿಸಿಎಲ್‌ ಮತ್ತು ಕೆಪಿಎಲ್‌ ಮಾದರಿಯಲ್ಲೇ ಹೊಸ ಕ್ರಿಕೆಟ್‌ ಲೀಗ್‌ ಶುರು ಮಾಡಿದ್ದು ಗೊತ್ತೇ ಇದೆ. ಕಳೆದ ವರ್ಷ “ಕೆಸಿಸಿ ಟಿ-10′ (ಕರ್ನಾಟಕ ಚಲನಚಿತ್ರ ಕ್ರಿಕೆಟ್‌ ಕಪ್‌) ಕ್ರಿಕೆಟ್‌ ಲೀಗ್‌ ಬೆಂಗಳೂರಿನಲ್ಲಿ ಆಯೋಜಿಸಲಾಗಿತ್ತು. ಈ ಬಾರಿ ಮೈಸೂರಿನಲ್ಲಿ “ಕೆಸಿಸಿ ಟಿ-10′ ಕ್ರಿಕೆಟ್‌ ಲೀಗ್‌ ನಡೆಯಲಿದೆ.

ಈ ಕುರಿತು ಸ್ವತಃ ಸುದೀಪ್‌ ಅವರೇ ಟ್ವೀಟ್‌ ಮೂಲಕ ಮೈಸೂರಿನಲ್ಲಿ ನಡೆಯಲಿರುವ “ಕೆಸಿಸಿ ಟಿ-10′ ಕುರಿತಂತೆ ಹೇಳಿದ್ದಾರೆ. ತಮ್ಮ ಟ್ವೀಟ್‌ನಲ್ಲಿ , “ಈ ಬಾರಿ ಮೈಸೂರಿನಲ್ಲಿ “ಕೆಸಿಸಿ ಸೀಸನ್‌ 3′ ನಡೆಯಲಿದೆ. ಸೆಪ್ಟೆಂಬರ್‌ 6, 7 ಮತ್ತು 8 ರಂದು ಪಂದ್ಯಾವಳಿ ನಡೆಯಲಿದ್ದು, ಐದು ಪಂದ್ಯಗಳ ನಡುವೆ ಕ್ರಿಕೆಟ್‌ ಲೀಗ್‌ ನಡೆಯಲಿದೆ. ಕೆಸಿಸಿ ಕ್ರಿಕೆಟ್‌ ಲೀಗ್‌ನಲ್ಲಿ ಪಾಲ್ಗೊಳ್ಳಲು ಖುಷಿಯಾಗುತ್ತಿದೆ’ ಎಂದಿದ್ದಾರೆ.

ಅಂದಹಾಗೆ, ಕೆಸಿಸಿ ಟಿ-10 ಕ್ರಿಕೆಟ್‌ ಲೀಗ್‌ನ ವಿಶೇಷ ಅಂದರೆ, ಸಿಸಿಎಲ್‌ ಮತ್ತು ಕೆಪಿಎಲ್‌ ಆಟಗಾರರೂ ಆಡಲಿದ್ದಾರೆ. ಇವರ ಜೊತೆಗೆ ಕನ್ನಡ ಚಿತ್ರರಂಗದಲ್ಲಿ ಕ್ರಿಕೆಟ್‌ ಬಗ್ಗೆ ಆಸಕ್ತಿ ಇಟ್ಟುಕೊಂಡಿರುವವರು, ಚೆನ್ನಾಗಿ ಆಡುವವರನ್ನು ಗುರುತಿಸಿ, ಅವರನ್ನೆಲ್ಲ ಒಂದು ತಂಡದಲ್ಲಿ ಸೇರಿಸಿಕೊಂಡು ಆಟ ಆಡಿಸಲಾಗುತ್ತಿದೆ. ಹತ್ತು ಓವರ್‌ಗಳ ಪಂದ್ಯ ಇದಾಗಿದ್ದು, ಲೀಗ್‌ನಲ್ಲಿ ಐದು ತಂಡಗಳು ಭಾಗವಹಿಸುತ್ತಿವೆ. ಈ ಲೀಗ್‌ ತಂಡದಲ್ಲಿ ಕಲಾವಿದರು, ಬರಹಗಾರರು, ತಂತ್ರಜ್ಞರು ಕೂಡ ಆಡುತ್ತಿರುವುದು ವಿಶೇಷ.