ಕಿರಿಕ್‌ ಪಾರ್ಟಿ ಕೆವೈಟಿಎ ಪ್ರೊಡಕ್ಷನ್ಸ್‌ಗೆ

Team Udayavani, Jun 27, 2017, 10:28 AM IST

ಹಿಂದಿ, ತಮಿಳು, ತೆಲುಗು ಭಾಷೆಗಳಿಗೆ “ಕಿರಿಕ್‌ ಪಾರ್ಟಿ’ ಚಿತ್ರದ ರೀಮೇಕ್‌ ರೈಟ್ಸ್‌ ಮಾರಾಟವಾಗಿದ್ದು, ಈ ಮೂರು ಭಾಷೆಗಳಿಂದ ಸುಮಾರು 2 ಕೋಟಿ ರೂಪಾಯಿ “ಪರಂವಾ’ ಸ್ಟುಡಿಯೋ ಅಕೌಂಟ್‌ಗೆ ಸೇರಿದ್ದು ಹಳೆಯ ವಿಷಯ. ಕೆಲವು ದಿನಗಳ ಹಿಂದೆಯೇ ರಕ್ಷಿತ್‌ ಶೆಟ್ಟಿ, ಈ ವಿಷಯವಾಗಿ ಹೇಳಿಕೊಂಡಿದ್ದರು. ಆದರೆ, ಆ ಹಕ್ಕುಗಳನ್ನು ಯಾರು ತೆಗೆದುಕೊಂಡಿದ್ದಾರೆ ಎಂಬ ವಿಷಯವನ್ನು ಅವರು ಹೇಳಿರಲಿಲ್ಲ. ಈಗ ಅದನ್ನು ಹೇಳಿದ್ದಾರೆ.

ಅಂದಹಾಗೆ, “ಕಿರಿಕ್‌ ಪಾರ್ಟಿ’ಯ ರೀಮೇಕ್‌ ಹಕ್ಕುಗಳನ್ನು ಪಡೆದಿರುವುದು ಕೆವೈಟಿಎ ಪ್ರೊಡಕ್ಷನ್ಸ್‌ ಎಂಬ ಸಂಸ್ಥೆ. ಈ ಸಂಸ್ಥೆ ಈಗಾಗಲೇ ಸೈಫ್ ಅಲಿ ಖಾನ್‌ ಅಭಿನಯದ “ಬಾಝಾರ್‌’, ಜಾನ್‌ ಅಬ್ರಹಾಂ ಅಭಿನಯದ “ಪರಮಾಣು – ದಿ ಸ್ಟೋರಿ ಆಫ್ ಪೋಖಾನ್‌’ ಮತ್ತು ಸುಶಾಂತ್‌ ಸಿಂಗ್‌ ರಜಪೂತ್‌ ಅಭಿನಯದ “ರೋಮಿಯೋ ಅಕºರ್‌ ವಾಲ್ಟರ್‌’ ಚಿತ್ರಗಳನ್ನು ನಿರ್ಮಿಸುತ್ತಿದೆ.

ಈಗ ರಕ್ಷಿತ್‌ ಅಭಿನಯದ ಮತ್ತು ನಿರ್ಮಾಣದ “ಕಿರಿಕ್‌ ಪಾರ್ಟಿ’ ಚಿತ್ರದ ರೀಮೇಕ್‌ ಹಕ್ಕುಗಳನ್ನೂ ತನ್ನದಾಗಿಸಿಕೊಂಡಿದೆ. ಈ ಚಿತ್ರದ ರೀಮೇಕ್‌ನಲ್ಲಿ ಯಾರು ಅಭಿನಯಿಸುತ್ತಾರೆ ಎಂಬುದು ಸದ್ಯಕ್ಕೆ ಬಹಿರಂಗವಾಗಿಲ್ಲ. ಆದರೆ, ಈ ವರ್ಷದ ಕೊನೆಯಲ್ಲಿ ಶುರುವಾಗಲಿದೆ ಎಂದು ಹೇಳಲಾಗುತ್ತಿದೆ. ತೆಲುಗು ರೀಮೇಕ್‌ ಸಹ ಇದೇ ತಿಂಗಳ ಕೊನೆಯಲ್ಲಿ ಪ್ರಾರಂಭವಾಗಲಿದೆಯಂತೆ.

ಅಂದಹಾಗೆ, ರಕ್ಷಿತ್‌ ಅಭಿನಯದ ಎರಡನೆಯ ಚಿತ್ರ ಇದೀಗ ಬೇರೆ ಭಾಷೆಗಳಿಗೆ ರೀಮೇಕ್‌ ಆಗುತ್ತಿದೆ. ಇದಕ್ಕೂ ಮುನ್ನ, ರಕ್ಷಿತ್‌ ನಿರ್ದೇಶನದ “ಉಳಿದವರು ಕಂಡಂತೆ’ ಚಿತ್ರವು ತಮಿಳಿನಗೆ ರೀಮೇಕ್‌ ಆಗಿದ್ದು, “ರಿಚ್ಚಿ’ ಎಂಬ ಹೆಸರಿನ ಚಿತ್ರ ಇನ್ನಷ್ಟೇ ಬಿಡುಗಡೆಯಾಗಬೇಕಿದೆ.