Sandalwood: ರಾಜ್‌ ಶೆಟ್ಟಿ ʼರೂಪಾಂತರʼ ಮೆಚ್ಚಿದ ಸ್ಟಾರ್ ನಿರ್ದೇಶಕ ಕಾರ್ತಿಕ್‌ ಸುಬ್ಬರಾಜ್

Team Udayavani, Jul 25, 2024, 12:56 PM IST

ಬೆಂಗಳೂರು: ರಾಜ್‌ ಬಿ ಶೆಟ್ಟಿ (Raj b Shetty) ʼಒಂದು ಮೊಟ್ಟೆಯ ಕಥೆʼ ತಂಡದ ಜೊತೆ ಸೇರಿಕೊಂಡು ಮಾಡಿರುವ “ರೂಪಾಂತರ” (Roopantara Movie) ತನ್ನ ಟ್ರೇಲರ್‌ನಿಂದ ಸಿನಿಮಂದಿಯ ಗಮನ ಸೆಳೆದಿದೆ.

ಇದೇ ವಾರ (ಜು.26ರಂದು) ಸಿನಿಮಾ ಥಿಯೇಟರ್‌ನಲ್ಲಿ ತೆರೆ ಕಾಣಲಿದೆ. ಪ್ರೀ ರಿಲೀಸ್‌ ಆಗಿ ತೆರೆಕಂಡಿರುವ “ರೂಪಾಂತರʼಕ್ಕೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಸಿನಿಮಾದ ಭಿನ್ನವಾದ ಕಥೆ ಹಾಗೂ ಪಾತ್ರಗಳನ್ನು ಹಣೆದಿರುವ ರೀತಿಗೆ ನೋಡುಗರು ಫಿದಾ ಆಗಿದ್ದಾರೆ.

ಕಾಲಿವುಡ್‌ನ ಖ್ಯಾತ ನಿರ್ದೇಶಕ ಕಾರ್ತಿಕ್‌ ಸುಬ್ಬರಾಜ್‌ (Karthik Subbaraj) “ರೂಪಾಂತರ” ಸಿನಿಮಾವನ್ನು ನೋಡಿ ಮೆಚ್ಚಿಕೊಂಡಿರುವ ವಿಡಿಯೋವನ್ನು ನಟ ರಾಜ್‌ ಬಿ ಶೆಟ್ಟಿ ಅವರು ಹಂಚಿಕೊಂಡಿದ್ದಾರೆ.

“ಇತ್ತೀಚೆಗೆ ನಾನು “ರೂಪಾಂತರ” ಎನ್ನುವ ಸಿನಿಮಾವನ್ನು ನನ್ನ ಸ್ನೇಹಿತನ ಜೊತೆ ನೋಡಿದೆ. ನಾನು ಸಿನಿಮಾದ ಮೊದಲ ವರ್ಷನ್‌ ನ್ನು ನೋಡಿದೆ. ನಿಜವಾಗಿ ಹೇಳಬೇಕೆಂದರೆ ಸಿನಿಮಾ ನೋಡಿ ನನಗೆ ರೋಮಾಂಚನವಾಯಿತು. ಭಿನ್ನ ಜನರ ನಾಲ್ಕು ಕಥೆಗಳ ಹೈಪರ್‌ ಲಿಂಕ್‌ ಸಿನಿಮಾವಿದು. ಆದರೆ ಸಿನಿಮಾದ ಕಥೆ ಹಾಗೂ ಅದನ್ನು ಬರೆದ ರೀತಿ, ಕಲಾವಿದರ ಅಭಿನಯ ನನ್ನನು ಸಿನಿಮಾದ ಮೊದಲ ಫ್ರೇಮ್‌ನಿಂದಲೇ ಕೂತು ನೋಡುವಂತೆ ಮಾಡಿತು. ನಮಗೆಲ್ಲರಿಗೂ ಗೊತ್ತು ರಾಜ್‌ ಬಿ ಶೆಟ್ಟಿ ಒಬ್ಬ ಅದ್ಭುತ ಕಲಾವಿದ. ಈ ಸಿನಿಮಾದಲ್ಲಿ ಅವರು ಮಾತ್ರವಲ್ಲದೆ, ಉಳಿದ ಪಾತ್ರಗಳ ಅಭಿನಯ ಕೂಡ ಅಷ್ಟೇ ಚೆನ್ನಾಗಿದೆ. ನನಗೆ ಸಿನಿಮಾ ತುಂಬಾ ಇಷ್ಟವಾಯಿತು. ನಿರ್ದೇಶನ, ಕಥೆ, ಬರವಣಿಗೆ ಎಲ್ಲಾ ಅಂಶವೂ ಇಷ್ಟವಾಯಿತು. ಥಿಯೇಟರ್‌ ನಲ್ಲಿ ಸಿನಿಮಾ ತುಂಬಾ ಚೆನ್ನಾಗಿ ಓಡುತ್ತದೆನ್ನುವ ಭರವಸೆಯಿದೆ. ಎಲ್ಲರೂ ಸಿನಿಮಾವನ್ನು ನೋಡಿ” ಎಂದು ಅವರು ಹೇಳಿದ್ದಾರೆ.