ಲಂಬೋದರನ ಕೇಡಿ ಹಾಡಿಗೆ ಮುರುಳಿ ಸಾಥ್‌

Team Udayavani, Dec 4, 2018, 11:21 AM IST

ನಟ ಯೋಗೇಶ್‌ ಈಗ ಹೊಸ ಚಿತ್ರವೊಂದರ ಮೇಲೆ ತುಂಬಾ ನಿರೀಕ್ಷೆ ಇಟ್ಟಿದ್ದಾರೆ. ಈ ಚಿತ್ರದ ಮೂಲಕ ಮತ್ತೆ ಗೆಲುವಿನ ನಗೆ ಬೀರುವ ವಿಶ್ವಾಸ ಕೂಡಾ ಯೋಗೇಶ್‌ ಅವರಿಗಿದೆ. ಅಂದಹಾಗೆ, ಯೋಗೇಶ್‌ ನಿರೀಕ್ಷೆ ಇಟ್ಟಿರುವ ಚಿತ್ರ “ಲಂಬೋದರ’. ಕೃಷ್ಣರಾಜ್‌ ಈ ಚಿತ್ರದ ನಿರ್ದೇಶಕರು. ಅನೇಕ ನಿರ್ದೇಶಕರ ಬಳಿ ಕೆಲಸ ಮಾಡಿ ಅನುಭವ ಪಡೆದಿರುವ ಕೃಷ್ಣರಾಜ್‌ ನಿರ್ದೇಶನದ ಚೊಚ್ಚಲ ಚಿತ್ರ “ಲಂಬೋದರ’ವಾಗಿದ್ದು, ಚಿತ್ರದ ಕಥೆ ಬಸವನಗುಡಿ ಸುತ್ತ ಮುತ್ತ ಸಾಗಲಿದೆ.

ಆ ಕಾರಣದಿಂದಲೇ ಚಿತ್ರಕ್ಕೆ “ಬಸವನಗುಡಿ ಬೆಂಗಳೂರು’ ಎಂಬ ಟ್ಯಾಗ್‌ಲೈನ್‌ ಇದೆ. ಈಗಾಗಲೇ ಈ ಚಿತ್ರದ ಲಿರಿಕಲ್‌ ವಿಡಿಯೋವೊಂದನ್ನು ಪುನೀತ್‌ರಾಜಕುಮಾರ್‌ ಬಿಡುಗಡೆ ಮಾಡಿದ್ದಾರೆ. ಈ ಚಿತ್ರದಲ್ಲಿನ ನಾಯಕ ಇಂಟ್ರೋಡಕ್ಷನ್‌ ಸಾಂಗ್‌ನ ಲಿರಿಕಲ್‌ ವಿಡಿಯೋ ಬಿಡುಗಡೆಯಾಗಿದ್ದು, ನಟ ಮುರುಳಿ ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭಕೋರಿದ್ದಾರೆ. ಸಾಮಾನ್ಯವಾಗಿ ನಾಯಕ ಇಂಟ್ರೋಡಕ್ಷನ್‌ ಸಾಂಗ್‌ ಎಂದರೆ ಆತನ ಕುರಿತಾದ ಬಿಲ್ಡಪ್‌ಗ್ಳು ಹೆಚ್ಚಿರುತ್ತವೆ. ಆದರೆ, ಈ ಹಾಡು ಅದಕ್ಕೆ ವಿರುದ್ಧವಾಗಿದ್ದು, ನಾಯಕ ಪೋಲಿ ಗುಣಗಳನ್ನು ಹೈಲೈಟ್‌ ಮಾಡಿ ಈ ಹಾಡನ್ನು ಮಾಡಲಾಗಿದೆ.

“ಕೇಡಿ ಇವನು ತುಂಬಾನೇ ಒಳ್ಳೇ ಕೇಡಿ’ ಎಂಬ ಈ ಹಾಡನ್ನು ಕಲರ್‌ಫ‌ುಲ್‌ ಆಗಿ ಚಿತ್ರೀಕರಿಸಲಾಗಿದೆ. ಈ ಚಿತ್ರಕ್ಕೆ  ಕಾರ್ತಿಕ್‌ ಶರ್ಮಾ ಸಂಗೀತ, ಅರವಿಂದ್‌ ಎಸ್‌. ಕಶ್ಯಪ್‌ ಛಾಯಾಗ್ರಹಣ, ಹರೀಶ್‌ ಗಿರಿಗೌಡ ಸಂಕಲನವಿದೆ. ಚಿತ್ರದಲ್ಲಿ ಯೋಗೇಶ್‌, ಆಕಾಂಕ್ಷ, ಧರ್ಮಣ್ಣ, ಅಚ್ಯುತ್‌ ಕುಮಾರ್‌, ಅರುಣಾ ಬಾಲರಾಜ್‌ ಸೇರಿದಂತೆ ಅನೇಕರು ನಟಿಸಿದ್ದಾರೆ. ವೃಷಾಂಕ್‌ ಮೂವೀ ಮೇಕರ್ಸ್‌ ಬ್ಯಾನರ್‌ನಲ್ಲಿ ವಿಶ್ವೇಶ್ವರ್‌ ಪಿ ಹಾಗೂ ರಾಘವೇಂದ್ರ ಭಟ್‌ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ.