ಮಾತನಾಡಲು ಅವಕಾಶ ಕೊಡಿ: ಸತ್ಯಜಿತ್‌

Team Udayavani, May 10, 2017, 11:20 AM IST

ಕನ್ನಡ ಚಿತ್ರರಂಗದ ಹಿರಿಯ ನಟ ಸತ್ಯಜಿತ್‌ ಯಾರಿಗೆ ಗೊತ್ತಿಲ್ಲ ಹೇಳಿ. ವಿಶಿಷ್ಟ ಅಭಿನಯದ ಜೊತೆಗೆ ತಮ್ಮ ಧ್ವನಿಯಿಂದಲೂ ಪ್ರೇಕ್ಷಕರ ಮೆಚ್ಚುಗೆ ಗಳಿಸಿರುವ ಸತ್ಯಜಿತ್‌ ಈಗ ತಮ್ಮಲ್ಲೇ ಡಬ್ಬಿಂಗ್‌ ಮಾಡಿಸಿ ಎಂದು ಚಿತ್ರತಂಡವೊಂದನ್ನು ಕೇಳಿಕೊಂಡಿದ್ದಾರೆ. ಅದು “ಬಣ್ಣ ಬಣ್ಣದ ಬದುಕು’.

ಈ ಚಿತ್ರದಲ್ಲಿ ಸತ್ಯಜಿತ್‌ ಕೂಡಾ ಪ್ರಮುಖ ಪಾತ್ರ ಮಾಡಿದ್ದಾರೆ. ಆದರೆ ನಿರ್ದೇಶಕರು ಸತ್ಯಜಿತ್‌ ಪಾತ್ರಕ್ಕೆ ಬೇರೆಯವರಿಂದ ಡಬ್ಬಿಂಗ್‌ ಮಾಡಿಸಿದ್ದಾರೆ. ಇದು ಸತ್ಯಜಿತ್‌ಗೆ ಬೇಸರ ತಂದಿದೆ. ಹಾಗಾಗಿ, ಪತ್ರಿಕಾಗೋಷ್ಠಿಯಲ್ಲಿ ನೇರವಾಗಿ ನಿರ್ದೇಶಕರಲ್ಲಿ ತನ್ನಲ್ಲೇ ಡಬ್ಬಿಂಗ್‌ ಮಾಡಿಸುವಂತೆ ಕೇಳಿಕೊಂಡರು.

“ಈ ಚಿತ್ರದಲ್ಲಿ ನನಗೆ ನಿರ್ದೇಶಕರು ಒಳ್ಳೆಯ ಪಾತ್ರ ಕೊಟ್ಟಿದ್ದಾರೆ. ನನ್ನ ಅನಾರೋಗ್ಯದ ಸಮಯದಲ್ಲಿ ನಿರ್ಮಾಪಕರು ಕೂಡಾ ಸಹಾಯ ಮಾಡಿದ್ದಾರೆ. ಆದರೆ, ನನ್ನ ಪಾತ್ರಕ್ಕೆ ಬೇರೆಯವರಿಂದ ಡಬ್ಬಿಂಗ್‌ ಮಾಡಿಸಿದ್ದಾರೆ. ನನ್ನ ಧ್ವನಿ ಕರ್ನಾಟಕದ ಜನತೆಗೆ ಚಿರಪರಿಚಿತ. ನಾನು ನಟಿಸಿ, ಬೇರೆಯವರಿಂದ ಧ್ವನಿ ಕೊಡಿಸಿದರೆ ಅದು ಸರಿ ಕಾಣೋದಿಲ್ಲ. ಎಷ್ಟೇ ಕಷ್ಟವಾದರೂ ನಾನೇ ಡಬ್ಬಿಂಗ್‌ ಮಾಡುತ್ತೇನೆ’ ಎಂದು ಕೇಳಿಕೊಂಡರು.

ಕೊನೆಗೆ ನಿರ್ದೇಶಕರು, ನಿರ್ಮಾಪಕರಲ್ಲಿ ಕೇಳಿ ಮತ್ತೆ ಸತ್ಯಜಿತ್‌ ಅವರಿಂದಲೇ ಡಬ್ಬಿಂಗ್‌ ಮಾಡಿಸುವ ಭರವಸೆ ನೀಡಿದ್ದಾರೆ. ತಾನು ಅನಾರೋಗ್ಯಕ್ಕೆ ಒಳಗಾಗಿದ್ದರೂ ಕಲಾವಿದರ ಸಂಘದಿಂದ ಯಾವುದೇ ಸಹಾಯಹಸ್ತ ಬಂದಿಲ್ಲ. ನಾನು ಇಷ್ಟು ವರ್ಷ ಚಿತ್ರರಂಗದಲ್ಲಿ ಸೇವೆಸಲ್ಲಿಸಿದ್ದರೂ ಕಲಾವಿದರ ಸಂಘ ಯಾವುದೇ ಸಹಾಯ ಹಸ್ತ ಚಾಚಿಲ್ಲವೆಂದು ಬೇಸರ ತೋಡಿಕೊಂಡರು.