ಕ್ಯಾರವ್ಯಾನ್‌ ಚಾಲಕ ಈಗ ಹೀರೋ

Team Udayavani, Apr 30, 2023, 4:19 PM IST

ಜೀವನದಲ್ಲಿ ಯಾರ ಲಕ್‌ ಹೇಗೆ ಬದಲಾಗುತ್ತದೆ ಎಂದು ಉಹಿಸುವುದು ಕಷ್ಟ . ಇದೀಗ ಅಂಥ ದ್ದೇ ಬದಲಾವಣೆಯಿಂದ ಒಬ್ಬರು ನಾಯಕ ನಟರಾಗಿ ದ್ದಾರೆ. ಆ ಚಿತ್ರಕ್ಕೆ “ಲಕ್‌’ ಎಂದೇ ಹೆಸರಿಡಲಾಗಿದೆ. ಈ ಚಿತ್ರದ ಮೂಲಕ ನಾಯಕ ನಟನಾಗಿ ಸ್ಟೈಲ್‌ ಮಂಜು ತೆರೆಗೆ ಬರುತ್ತಿದ್ದಾರೆ.

ಕಳೆದ ಒಂಭತ್ತು ವರ್ಷಗಳಿಂದ ಕ್ಯಾರಾವ್ಯಾನ್‌ ಚಾಲಕನಾಗಿ ಕಾರ್ಯನಿರ್ವಹಿಸುತ್ತಿರುವ ಕ್ಯಾರಾವ್ಯಾನ್‌ ಸ್ಟಾರ್‌ ಸ್ಟೈಲ್‌ ಮಂಜು “ಲಕ್‌’ ಚಿತ್ರದ ನಾಯಕನಾಗಿ ಜೊತೆಗೆ ನಿರ್ಮಾಪಕನೂ ಆಗಿದ್ದಾರೆ.

ಇತ್ತೀಚೆಗೆ ಈ ಚಿತ್ರದ 90 ಕುಡಿ ಮಗ ಪಲ್ಟಿ ಹೊಡಿ ಲಿರಿಕಲ್‌ ಹಾಡಿನ ವಿಡಿಯೋ ಬಿಡುಗಡೆಯಾಗಿದೆ. ಅಪ್ಪಿ ಹಾಗೂ ಹರೀಶ್‌ ಸಾಹಿತ್ಯ, ವಿಜಯ್‌ ಹರಿತ್ಸ ಸಂಗೀತ, ನವೀನ್‌ ಸಜ್ಜು ಕಂಠದಲ್ಲಿ ಹಾಡು ಮೂಡಿಬಂದಿದೆ.

“ಚಿತ್ರಕ್ಕೆ ಮೊದಲೊಬ್ಬ ನಿರ್ದೇಶಕರಿದ್ದರು. ಹಾಗೆ ನಾಯಕರೂ ಬೇರೆಯೇ ಇದ್ದರು. ಅನಿವಾರ್ಯ ಕಾರಣದಿಂದ ಅವರು ಚಿತ್ರದಿಂದ ದೂರವಾದಾಗ ಈ ಚಿತ್ರಕ್ಕೆ ನಾನು ನಿರ್ದೇಶಕನಾದೆ. ಮಂಜು ನಾಯಕನಾದರು. ನನ್ನ ಜೀವನದಲ್ಲಿ ನಡೆದಿರುವ ಘಟನೆಯನ್ನು ಸಿನಿಮಾ ರೂಪದಲ್ಲಿ ಆಚೆ ತರುತ್ತಿದ್ದೇನೆ. ಈಗಾಗಲೇ ಬಹುತೇಕ ಚಿತ್ರೀಕರಣ ಮುಕ್ತಾಯವಾಗಿದೆ. ಡಾಲಿ ಧನಂಜಯ್‌ ಅವರು ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದು, ಆ ಭಾಗದ ಚಿತ್ರೀಕರಣ ಮಾತ್ರ ಬಾಕಿಯಿದೆ. ಇದು ಒಂದು ದಿನ, ಅದರಲ್ಲೂ ಕೆಲವೇ ಗಂಟೆಗಳಲ್ಲಿ ನಡೆಯುವ ಕಥೆಯಾಗಿದೆ. ಪದ್ಮಜಾರಾವ್‌, ಕಡ್ಡಿಪುಡಿ ಚಂದ್ರು ಮುಂತಾದವರು ತಾರಾಬಳಗದಲ್ಲಿದ್ದಾರೆ’ ಎಂದು ನಿರ್ದೇಶಕ ಹರೀಶ್‌ ಮಾಹಿತಿ ನೀಡಿದರು.

“ನಾನು ಒಂಭತ್ತು ವರ್ಷಗಳಿಂದ ಕ್ಯಾರಾವ್ಯಾನ್‌ ಓಡಿಸುತ್ತಿದ್ದೇನೆ. ಗೋಲ್ಡನ್‌ ಸ್ಟಾರ್‌ ಗಣೇಶ್‌, ಡಾಲಿ ಅವರ ಕ್ಯಾರಾವ್ಯಾನ್‌ಗೆ ನಾನೇ ಚಾಲಕ. ಸಿನಿಮಾ ಮಾಡುವ ಆಸೆಯಿತ್ತು. ದುಡಿದ ಹಣ ಹಾಗೂ ಜಮೀನು ಮಾರಿದ ಹಣ ಎರಡೂ ಸೇರಿಸಿ ಈ ಚಿತ್ರ ನಿರ್ಮಾಣ ಮಾಡಿದ್ದೇನೆ. ಜೊತೆಗೆ ನಾಯಕನಾಗೂ ಅಭಿನಯಿಸಿದ್ದೇನೆ. ನನ್ನ ಮೇಲೆ ಪ್ರೀತಿಯಿಟ್ಟು ನಟ ಶಿವರಾಜಕುಮಾರ್‌ ಅವರು ಸೇರಿದಂತೆ ಚಿತ್ರರಂಗದ ಅನೇಕ ನಾಯಕರು ಪೋಸ್ಟರ್‌ ಬಿಡುಗಡೆ ಮಾಡಿ ಶುಭ ಕೋರಿದ್ದಾರೆ’ ಎಂದರು ನಾಯಕ ಕಂ ನಿರ್ಮಾಪಕ ಕ್ಯಾರಾವ್ಯಾನ್‌ ಸ್ಟಾರ್‌ ಸ್ಟೈಲ್‌ ಮಂಜು