ನಿಖಿಲ್‌ ಚಿತ್ರಕ್ಕೆ ಮಹೇಶ್‌ ರಾವ್‌ ನಿರ್ದೇಶನ?

Team Udayavani, Jun 13, 2017, 11:47 AM IST

ನಿಖಿಲ್‌ ಅಭಿನಯದ ಹೊಸ ಚಿತ್ರವನ್ನು “ಬಹದ್ದೂರ್‌’ ಚೇತನ್‌ ಬದಲು ಯಾರು ನಿರ್ದೇಶಿಸಬಹುದು ಎಂಬ ಕುತೂಹಲ ಎಲ್ಲರಿಗೂ ಇತ್ತು. ಈಗಿನ ಸುದ್ದಿಯ ಪ್ರಕಾರ, ಚಿತ್ರವನ್ನು ಮಹೇಶ್‌ ರಾವ್‌ ನಿರ್ದೇಶಿಸುತ್ತಾರೆ ಎಂದು ಹೇಳಲಾಗುತ್ತಿದೆ. ಕಳೆದ ವರ್ಷ ಬಿಡುಗಡೆಯಾದ ಯಶ್‌ ಅಭಿನಯದ “ಸಂತು ಸ್ಟ್ರೇಟ್‌ ಫಾರ್ವರ್ಡ್‌’ ಚಿತ್ರವನ್ನು ನಿರ್ದೇಶಿಸಿದ್ದ ಮಹೇಶ್‌ ರಾವ್‌, ಆ ಚಿತ್ರದ ನಂತರ ಯಾವೊಂದು ಚಿತ್ರವನ್ನೂ ನಿರ್ದೇಶಿಸಿರಲಿಲ್ಲ. ಈಗ ನಿಖಿಲ್‌ ಅಭಿನಯದ ಎರಡನೆಯ ಚಿತ್ರವನ್ನು ಅವರು ನಿರ್ದೇಶಿಸುವ ಸಾಧ್ಯತೆ ಇದೆ.

ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ, ಇಷ್ಟರಲ್ಲಿ ನಿಖಿಲ್‌ ಅಭಿನಯದ ಎರಡನೆಯದ ಚಿತ್ರ ಇಷ್ಟರಲ್ಲಿ ಶುರುವಾಗಿರಬೇಕಿತ್ತು. ಆದರೆ, ಇನ್ನೇನು ಮುಹೂರ್ತವಾಗಿ ಚಿತ್ರೀಕರಣ ಶುರುವಾಗಬೇಕು ಎನ್ನುವಷ್ಟರಲ್ಲಿ, ಚೇತನ್‌ ನಿರ್ದೇಶನದ ಇನ್ನೊಂದು ಚಿತ್ರ “ಭರ್ಜರಿ’ ಸಹ ಟೇಕಾಫ್ ಆಯ್ತು. ಎರಡೂ ಚಿತ್ರಗಳನ್ನು ನಿರ್ದೇಶಿಸುವುದು ಅಷ್ಟು ಸುಲಭವಲ್ಲ ಎಂಬ ಕಾರಣಕ್ಕೆ, ನಿಖಿಲ್‌ ಚಿತ್ರವನ್ನು ಚೇತನ್‌ ಕೈಬಿಟ್ಟಿದ್ದಾರೆ.

ಹಾಗಂತ ಅವರು ಚಿತ್ರತಂಡದಿಂದ ಔಟ್‌ ಆಗಿಲ್ಲ. ಆ ಚಿತ್ರವನ್ನು ಅವರು ನಿರ್ದೇಶಿಸುತ್ತಿಲ್ಲವಾದರೂ, ಚಿತ್ರಕ್ಕಾಗಿ ಅವರು ಬರೆದ ಕಥೆ, ಚಿತ್ರಕಥೆ, ಸಂಭಾಷಣೆಯನ್ನು ಹಾಗೆಯೇ ಉಳಿಸಿಕೊಳ್ಳಲಾಗಿದೆ. ನಿರ್ದೇಶನದ ಜವಾಬ್ದಾರಿಯನ್ನು ಮಾತ್ರ ಇನ್ನೊಬ್ಬ ನಿರ್ದೇಶಕರಿಗೆ ವಹಿಸಲು ಯೋಚಿಸಲಾಗಿದೆ. ಹಾಗೆ ಯೋಚಿಸುವಾಗ ಸಿಕ್ಕ ಹೆಸರೇ ಮಹೇಶ್‌ ರಾವ್‌ ಅವರದ್ದು.

ಮಹೇಶ್‌ ಸದ್ಯಕ್ಕೆ ಯಾವ ಚಿತ್ರವನ್ನೂ ನಿರ್ದೇಶಿಸುತ್ತಿಲ್ಲವಾದ್ದರಿಂದ, ಅವರೇ ಈ ಚಿತ್ರವನ್ನು ನಿರ್ದೇಶಿಸಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಅಂದ ಹಾಗೆ, ಈ ಚಿತ್ರ ಆಗಸ್ಟ್‌ 10ರಂದು ಪ್ರಾರಂಭವಾಗಲಿದೆ. ಸದ್ಯದಲ್ಲೇ ಚಿತ್ರದ ಟೈಟಲ್‌ ಪಕ್ಕಾ ಆಗಲಿದೆ. ಈ ಮಧ್ಯೆ, ಚಿತ್ರದ ಟೆಸ್ಟ್‌ ಶೂಟ್‌ ಆಗಿದ್ದು, ಚಿತ್ರದ ಮೊದಲ ಲುಕ್‌ ಇಲ್ಲಿದೆ.