ಧ್ರುವ ಕೈಯಲ್ಲಿ “ಮಹಿಷಾಸುರ’ನ ಹಾಡು

Team Udayavani, Oct 10, 2019, 3:01 AM IST

ಬಹುತೇಕ ಹೊಸ ಪ್ರತಿಭೆಗಳು ಸೇರಿ ನಿರ್ಮಿಸುತ್ತಿರುವ “ಮಹಿಷಾಸುರ’ ಚಿತ್ರದ ಲಿರಿಕಲ್‌ ವಿಡಿಯೋ ಸಾಂಗ್‌ ಇತ್ತೀಚೆಗೆ ಬಿಡುಗಡೆಯಾಗಿದೆ. ನಟ ಧ್ರುವ ಸರ್ಜಾ ಅವರ ಬರ್ತ್‌ಡೇ ಮತ್ತು ದಸರಾ ಹಬ್ಬದ ವಿಶೇಷವಾಗಿ ಚಿತ್ರತಂಡ, ಧ್ರುವ ಸರ್ಜಾ ಅವರ ಕೈಯಲ್ಲಿ “ಮಹಿಷಾಸುರ’ನ ಲಿರಿಕಲ್‌ ಆಡಿಯೋವನ್ನು ಬಿಡುಗಡೆಗೊಳಿಸಿದೆ. “ಮಹಿಷಾಸುರ’ನ ಲಿರಿಕಲ್‌ ವಿಡಿಯೋ ನೋಡಿದ ಧ್ರುವ ಸರ್ಜಾ, “ಚಿತ್ರದ ಹಾಡುಗಳು ತುಂಬಾ ಚೆನ್ನಾಗಿದೆ.

ಅದೇ ರೀತಿ ಚಿತ್ರ ಕೂಡ ಚೆನ್ನಾಗಿ ಬಂದು ಯಶಸ್ವಿಯಾಗಲಿ’ ಎಂದು ಹೊಸಬರ ತಂಡಕ್ಕೆ ಬೆನ್ನುತಟ್ಟಿ, ಶುಭ ಹಾರೈಸಿದರು. ಇಬ್ಬರು ಸ್ನೇಹಿತರು ಹಾಗೂ ಯುವತಿಯ ನಡುನ ತ್ರಿಕೋನ ಪ್ರೇಮ ಕಥಾ ಹಂದರ ಹೊಂದಿರುವ ಚಿತ್ರದಲ್ಲಿ, ಪ್ರೀತಿಸಿದ ಹುಡುಗಿಗಾಗಿ ಇಬ್ಬರು ಹುಡುಗರಲ್ಲಿ ಯಾರು “ಮಹಿಷಾಸುರ’ನಾಗುತ್ತಾನೆ ಅನ್ನೋದನ್ನ ಚಿತ್ರದಲ್ಲಿ ಹೇಳಲಾಗಿದೆಯಂತೆ.

ನವನಟ ರಾಜ್‌ ಮಂಜು, ಬಿಂದುಶ್ರೀ, ಸುದರ್ಶನ್‌, ರಘುಪಾಂಡೆ, ಶ್ವೇತಾ, ರಾಕ್‌ಲೈನ್‌ ಸುಧಾಕರ್‌, ತುಷಾರ್‌, ಶ್ರೀನಿವಾಸಚಾರಿ, ರವೀಂದ್ರ, ಚಂದ್ರಣ್ಣ, ರವಿ ಮೊದಲಾದವರು ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಉದಯ ಪ್ರಸನ್ನ ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶನ ಮಾಡಿದ್ದಾರೆ. ಸದ್ಯ “ಮಹಿಷಾಸುರ’ ಚಿತ್ರದ ಬಹುತೇಕ ಕೆಲಸಗಳು ಈಗಾಗಲೇ ಮುಕ್ತಾಯ ಹಂತದಲ್ಲಿದ್ದು, ಸೆನ್ಸಾರ್‌ ಅನುಮತಿಗಾಗಿ ಕಾಯುತ್ತಿರುವ ಚಿತ್ರ ಡಿಸೆಂಬರ್‌ ತಿಂಗಳಲ್ಲಿ ತೆರೆಗೆ ಬರುವ ಯೋಚನೆಯಲ್ಲಿದೆ.