ಮನೋರಂಜನ್‌ ಮುಂದಿನ ಚಿತ್ರ “ರಾಕ್‌ ಸ್ಟಾರ್‌’?

Team Udayavani, Aug 13, 2017, 10:20 AM IST

ರವಿಚಂದ್ರನ್‌ ಪುತ್ರ ಮನೋರಂಜನ್‌ ಅವರ ಮೊದಲ ಚಿತ್ರ “ಸಾಹೇಬ’ ಬಿಡುಗಡೆಗೆ ರೆಡಿಯಾಗಿದೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ ಈ ತಿಂಗಳಲ್ಲೇ ಚಿತ್ರ ತೆರೆಗೆ ಬರಲಿದೆ. ಈ ನಡುವೆಯೇ ಎರಡನೇ ಚಿತ್ರ “ವಿಐಪಿ’ಯ ಬಹುತೇಕ ಚಿತ್ರೀಕರಣ ಕೂಡಾ ಪೂರ್ಣಗೊಳಿಸಿದ್ದಾರೆ ಮನೋರಂಜನ್‌. ಈಗ ಅವರ ಮೂರನೇ ಸಿನಿಮಾದ ತಯಾರಿಯಲ್ಲಿದ್ದಾರೆ.

ಅವರ ಮೂರನೇ ಸಿನಿಮಾ ಚೌತಿಯಂದು ಅನೌನ್ಸ್‌ ಆಗುವ ಸಾಧ್ಯತೆ ಇದೆ. ಮೂಲಗಳ ಪ್ರಕಾರ, ಈ ಚಿತ್ರಕ್ಕೆ “ರಾಕ್‌ ಸ್ಟಾರ್‌’ ಎಂದು ಟೈಟಲ್‌ ಇಡುವ ಸಾಧ್ಯತೆ ಇದೆ. ಆದರೆ, ಈ ಟೈಟಲ್‌ ಬೇರೆಯವರಲ್ಲಿ ಇದೆ. ಅವರಿಂದ ಈ ಟೈಟಲ್‌ ಪಡೆದು ಮೂರನೇ ಸಿನಿಮಾ ಆರಂಭವಾಗಲಿದೆ ಎಂಬ ಸುದ್ದಿ ಗಾಂಧಿನಗರದಲ್ಲಿ ಓಡಾಡುತ್ತಿದೆ. ಚಿತ್ರದ ಕಥೆಗೆ ಆ ಟೈಟಲ್‌ ಹೊಂದಿಕೆಯಾಗುವ ಕಾರಣ ಚಿತ್ರಕ್ಕೆ “ರಾಕ್‌ ಸ್ಟಾರ್‌’ ಎಂದಿಡಲು ನಿರ್ಧರಿಸಲಾಗಿದೆ. 

“ಸಾಹೇಬ’ ಚಿತ್ರದಲ್ಲಿ ಮನೋರಂಜನ್‌ ತುಂಬಾ ಸಾಫ್ಟ್ ಪಾತ್ರ ಮಾಡಿದ್ದು, ಎಲ್ಲರಲ್ಲೂ ಪ್ರೀತಿಯಿಂದ ಇರುವ ಪಾತ್ರ. ಇನ್ನು “ವಿಐಪಿ’ಯಲ್ಲಿ ಮನೋರಂಜನ್‌ ಗಡ್ಡ ಬಿಡುವ ಜೊತೆಗೆ ಬೇರೆ ತರಹ ಕನ್ನಡ ಮಾತನಾಡಿದ್ದಾರಂತೆ. ಈ ಸಿನಿಮಾ ಬಗ್ಗೆಯೂ ಮನೋರಂಜನ್‌ಗೆ ಸಾಕಷ್ಟು ನಿರೀಕ್ಷೆ ಇದೆ. ಈಗ ಮೂರನೇ ಸಿನಿಮಾದ ಕಥೆಯೂ ವಿಭಿನ್ನವಾಗಿದ್ದು, ಅದಕ್ಕಾಗಿ ಮನೋರಂಜನ್‌ ರೆಡಿಯಾಗುತ್ತಿದ್ದಾರೆ.