ಮಾರ್ಚ್‌ನಲ್ಲಿ  ಪಿರಂಗಿಪುರ

Team Udayavani, Jan 24, 2017, 11:27 AM IST

“ಪಿರಂಗಿಪುರ’ ಚಿತ್ರದ ಮತ್ತೂಂದು ಪೋಸ್ಟರ್‌ ಬಿಡುಗಡೆಯಾಗುತ್ತಿದೆ. ಈ ಹಿಂದೆ ಪಿರಂಗಿಪುರ ಚಿತ್ರದಲ್ಲಿ ವಿಜಯ್‌ ಎಪ್ಪತ್ತು ವರ್ಷದ ಮುದುಕನ ಪಾತ್ರದಲ್ಲಿ ಕಾಣಿಸಿಕೊಂಡಿರುವ  ಪೋಸ್ಟರ್‌ ಒಂದನ್ನು ಬಿಡುಗಡೆ ಮಾಡಿತ್ತು ಚಿತ್ರತಂಡ. ಈ ಚಿತ್ರದ ಪಿರಂಗಿಪುರ ಎಂಬ ಊರಲ್ಲಿನ ನಾಲ್ವರು ವಿಲನ್‌ಗಳಲ್ಲಿ ಈ ಹಿಂದೆ ವಿಜಯ್‌ ಪೋಸ್ಟರ್‌ ಜೊತೆಗೆ ವಿಲನ್‌ ರಾಣಾ ಒಬ್ಬನನ್ನು ಪರಿಚಯಿಸಿದ್ದರು.

ಈಗ ನಿರ್ದೇಶಕ ಜನಾರ್ದನ್‌.ಪಿ.ಜಾನಿ ಅವರು ಎರಡನೇ ವಿಲನ್‌ ಜೆಜೆಯನ್ನು ಪೋಸ್ಟರ್‌ ಮೂಲಕ ಪರಿಚಯಿಸಲು ಮುಂದಾಗಿದ್ದಾರೆ. ಈ ಚಿತ್ರ ಮಾರ್ಚ್‌ ಹೊತ್ತಿಗೆ ಚಿತ್ರೀಕರಣ ಆರಂಭಿಸುತ್ತಿದೆ. ಈ ಸಿನಿಮಾದಲ್ಲಿ ಸಂಚಾರಿ ವಿಜಯ್‌ ಅವರಿಗೆ ಮೂರು ಶೇಡ್‌ನ‌ ಪಾತ್ರಗಳಿವೆ. ಜನಾರ್ದನ್‌ ಅವರೇ ತಮ್ಮ ಪ್ರಿಸ್‌ವೆಸ್‌ ಸ್ಟುಡಿಯೊ ಮೂಲಕ ಈ ಚಿತ್ರ ನಿರ್ಮಾಣಕ್ಕೆ ಮುಂದಾಗಿದ್ದಾರೆ.  ಚಿತ್ರ ತಮಿಳಿನಲ್ಲೂ ತಯಾರಾಗುತ್ತಿದೆ.  

ಪಿರಂಗಿಪುರ ಒಂದು ಊರಿನ ಹೆಸರು. ಅದು ಖಳನಾಯಕನ ಸ್ಥಳ. ಇದು ಕುತೂಹಲ ಮೂಡಿಸುವ ಸೈಕಾಲಜಿಕಲ್‌ ಥ್ರಿಲ್ಲರ್‌ ಕಥೆ ಹೊಂದಿದೆ. ಖಳನಾಯಕನಿಗೆ ಇಲ್ಲಿ ಹೆಚ್ಚು ಪ್ರಾಮುಖ್ಯ. ಮನುಷ್ಯನ ಒಳಮನಸ್ಸಿನಲ್ಲಿ ಅಡಗಿರುವ ರಾಕ್ಷಸಿ ಮತ್ತು ಮಾನವೀಯ ಗುಣಗಳೆರಡನ್ನೂ ಏಕಕಾಲಕ್ಕೆ ಬಿಚ್ಚಿಡಲಿದ್ದಾರಂತೆ.

ನಿರ್ದೇಶಕ ಜನಾರ್ದನ್‌ ರಾಜಸ್ಥಾನದ ಜೈಸಲ್ಮೇರ್‌ನ ಮರುಭೂಮಿಯೊಂದರಲ್ಲಿ ಸೆಟ್‌ ಹಾಕಿ ಕಾಲ್ಪನಿಕ ಫಿರಂಗೀಪುರಕ್ಕೆ ಜೀವ ತುಂಬಲು ಯೋಜಿಸಿದ್ದಾರೆ. ಬಹುಭಾಗದ ಚಿತ್ರೀಕರಣ ರಾಜಸ್ಥಾನದ ಪ್ರದೇಶದಲ್ಲಿಯೇ ನಡೆಯಲಿದೆ. ಸಂಚಾರಿ ವಿಜಯ್‌ ಅವರೊಂದಿಗೆ ಸುಕುಮಾರ್‌ ಎನ್ನುವ ಯುವ ನಟ ಕೂಡಾ ಪ್ರಮುಖ ಪಾತ್ರದಲ್ಲಿ ನಟಿಸಲಿದ್ದಾರೆ. ಸುಕುಮಾರ್‌ಗೆ ಗಾನವಿ ನಾಯಕಿಯಾಗಿದ್ದಾರೆ. ರಾಣಾ, ಜೆ.ಜೆ ಈ ಚಿತ್ರದ ತಾರಾಬಳಗದಲ್ಲಿದ್ದಾರೆ.