ಮಯೂರ್‌ ಪಟೇಲ್‌ ಹೊಸ ಸಿನಿಮಾ “ರಾಜೀವ’

Team Udayavani, Oct 3, 2017, 1:12 PM IST

ಮಯೂರ್‌ ಪಟೇಲ್‌ “ಸ್ಲಂ’ ಸಿನಿಮಾ ರಿಲೀಸ್‌ ಆಗಿದ್ದೇ ಕೊನೆ, ಆ ನಂತರ ಅವರ ಯಾವೊಂದು ಸಿನಿಮಾವೂ ಸೆಟ್ಟೇರಲಿಲ್ಲ. ಮಯೂರ್‌ಗೆ ಅವಕಾಶ ಬರಲಿಲ್ಲವೋ ಅಥವಾ ಅವರು ಬೇರೆ ಕೆಲಸಗಳಲ್ಲಿ ಬಿಝಿ ಇದ್ದರೋ ಗೊತ್ತಿಲ್ಲ, ಅವಕಾಶವಂತೂ ಬರಲಿಲ್ಲ. ಈಗ ಮಯೂರ್‌ ಪಟೇಲ್‌ ಅವರ ಸಿನಿಮಾವೊಂದು ಸೆಟ್ಟೇರಿದೆ. ಅದು “ರಾಜೀವ’. ಈ ಚಿತ್ರದ ಮುಹೂರ್ತ ವಿಜಯದಶಮಿಯಂದು ಬನ್ನೇರುಘಟ್ಟ ರಸ್ತೆಯಲ್ಲಿರುವ ದೇವಸ್ಥಾನದಲ್ಲಿ ನಡೆಯಿತು. 

ಈ ಚಿತ್ರವನ್ನು  ಬಿ.ಎಂ.ರಮೇಶ್‌, ರಾಘವೇಂದ್ರ ರೆಡ್ಡಿ ಹಾಗೂ ಕಿರಣ್‌ ನಿರ್ಮಿಸುತ್ತಿದ್ದಾರೆ. ಚಿತ್ರಕ್ಕೆ ಫ್ಲೈಯಿಂಗ್‌ ಕಿಂಗ್‌ ಮಂಜು ನಿರ್ದೇಶನವಿದೆ. ಈ ಹಿಂದೆ ಕೆಲವು ಕಿರುಚಿತ್ರಗಳನ್ನು ನಿರ್ದೇಶಿಸಿ ಅನುಭವವಿರುವ ಮಂಜು ಅವರಿಗೆ ಇದು ಚೊಚ್ಚಲ ಸಿನಿಮಾ. ಈ ಚಿತ್ರದಲ್ಲಿ ಅವರು ಕೂಡಾ ಒಂದು ಪ್ರಮುಖ ಪಾತ್ರ ಮಾಡುತ್ತಿದ್ದಾರೆ. ಚಿತ್ರದ ಚಿತ್ರೀಕರಣ ಈ ತಿಂಗಳ ಕೊನೆಯಲ್ಲಿ ಆರಂಭವಾಗಲಿದ್ದು, ಇಪ್ಪತ್ತೆ„ದು ದಿನಗಳ ಕಾಲ ಕೋಲಾರ, ಬೆಂಗಳೂರು, ರಾಮನಗರ ಮುಂತಾದ ಕಡೆ ಚಿತ್ರೀಕರಣ ನಡೆಯಲಿದೆ.

ಚಿತ್ರದಲ್ಲಿ ಐದು ಹಾಡುಗಳಿದ್ದು ಅನಿಲ್‌ ಅವರ ಸಂಗೀತ ನಿರ್ದೇಶನವಿದೆ. ವಿ.ನಾಗೇಂದ್ರ ಪ್ರಸಾದ್‌ ಚಿತ್ರದ ಹಾಡುಗಳನ್ನು ರಚಿಸಿದ್ದಾರೆ. ಪೂರ್ಣಚಂದ್ರ ಬೈಕಾಡಿ ಛಾಯಾಗ್ರಹಣ ಈ ಚಿತ್ರಕ್ಕಿದೆ. ಅಂದಹಾಗೆ, ಚಿತ್ರಕ್ಕೆ ನಿರ್ಮಾಪಕ ಬಿ.ಎಂ.ರಮೇಶ್‌ ಅವರೇ ಕಥೆ ಬರೆದಿದ್ದು, ಕೊಡ‌ಗಾನಹಳ್ಳಿ ರಾಮಯ್ಯ ಸಂಭಾಷಣೆ ಬರೆದಿದ್ದಾರೆ. ಚಿತ್ರಕ್ಕೆ ನಾಯಕಿ ಸೇರಿದಂತೆ ಇತರ ಅಂಶಗಳು ಅಂತಿಮವಾಗಬೇಕಷ್ಟೇ.