“ರಾಬರ್ಟ್‌’ಗೆ ಮೆಹ್ರೀನ್‌ ಜೋಡಿ?

Team Udayavani, Aug 28, 2019, 3:04 AM IST

ಇತ್ತೀಚೆಗಷ್ಟೇ ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಅಭಿನಯದ “ಕುರುಕ್ಷೇತ್ರ’ ಚಿತ್ರ ತೆರೆಕಂಡು, ಸದ್ಯ ಎಲ್ಲೆಡೆ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ದುಯೋಧನನ ಗೆಟಪ್‌ನಲ್ಲಿ ತೆರೆಮೇಲೆ ಅಬ್ಬರಿಸಿರುವ ದರ್ಶನ್‌ ಅವರನ್ನು ಕಂಡ ಅಭಿಮಾನಿಗಳು ಕೂಡ ಫ‌ುಲ್‌ ಖುಷಿಯಾಗಿದ್ದಾರೆ. ಮತ್ತೂಂದೆಡೆ, ಗಳಿಕೆಯಲ್ಲೂ ದಾಖಲೆ ಬರೆಯಲು ಹೊರಟಿರುವ “ಕುರುಕ್ಷೇತ್ರ’ ಗಲ್ಲಾ ಪೆಟ್ಟಿಗೆಯಲ್ಲೂ ಮುನ್ನುಗ್ಗುತ್ತಿದೆ. ಇವೆಲ್ಲದರ ನಡುವೆಯೇ ಚಾಲೆಂಜಿಂಗ್‌ ಸ್ಟಾರ್‌ ಅಭಿನಯದ ಮುಂಬರುವ “ರಾಬರ್ಟ್‌’ ಚಿತ್ರದ ಕಾರ್ಯಗಳೂ ಕೂಡ ಭರದಿಂದ ನಡೆಯುತ್ತಿದೆ.

ಈಗಾಗಲೆ ಸದ್ದಿಲ್ಲದೆ ಮೊದಲ ಹಂತದ ಚಿತ್ರೀಕರಣ ಮುಗಿಸಿರುವ “ರಾಬರ್ಟ್‌’ ಚಿತ್ರತಂಡ ಈಗ ಎರಡನೆ ಹಂತದ ಚಿತ್ರೀಕರಣಕ್ಕೆ ಸಿದ್ಧವಾಗುತ್ತಿದೆ. ಚಿತ್ರತಂಡದ ಮೂಲಗಳ ಪ್ರಕಾರ ಸೆಪ್ಟಂಬರ್‌ ಎರಡನೇ ವಾರದಿಂದ “ರಾಬರ್ಟ್‌’ ಚಿತ್ರದ ಎರಡನೆ ಹಂತದ ಚಿತ್ರೀಕರಣ ಶುರುವಾಗಲಿದ್ದು, ಇದರ ನಡುವೆಯೇ ಚಿತ್ರದ ನಾಯಕಿಯ ಹೆಸರು ಅಂತಿಮವಾಗಿದೆ ಎನ್ನಲಾಗುತ್ತಿದೆ.  ಹೌದು, ದರ್ಶನ್‌ ಅವರ ಚಿತ್ರಗಳೆಂದರೆ ಸಾಕಷ್ಟು ಕಲರ್‌ಫ‌ುಲ್‌ ಆಗಿರುವುದರಿಂದ, ಅಲ್ಲಿ ನಾಯಕಿಯರನ್ನು ಸಾಕಷ್ಟು ಅಳೆದು -ತೂಗಿ ಆಯ್ಕೆ ಮಾಡಲಾಗುತ್ತದೆ.

ಹಾಗಾಗಿ ಪ್ರತಿ ಬಾರಿ ಅಭಿಮಾನಿಗಳಲ್ಲಿ, ಚಿತ್ರರಂಗದಲ್ಲಿ ದರ್ಶನ್‌ ಹೊಸಚಿತ್ರಕ್ಕೆ ಹೀರೋಯಿನ್‌ ಯಾರಾಗಬಹುದು ಎಂಬ ನಿರೀಕ್ಷೆ, ಲೆಕ್ಕಾಚಾರ ಓಡುತ್ತಲೇ ಇರುತ್ತದೆ. ಅದರಂತೆ, ಈಗ ದರ್ಶನ್‌ ಹೊಸಚಿತ್ರ “ರಾಬರ್ಟ್‌’ಗೆ ಮೆಹ್ರೀನ್‌ ಫಿರ್ಜಾದಾ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ ಎಂಬುದು ಸದ್ಯ ಗಾಂಧಿನಗರದಲ್ಲಿ ಹರಿದಾಡುತ್ತಿರುವ ಸುದ್ದಿ. ಪಂಜಾಬಿ ಮೂಲದ ಮಾಡೆಲ್‌ ಮೇಹ್ರೀನ್‌ ಫಿರ್ಜಾದಾ ತೆಲುಗಿನ “ಕೃಷ್ಣಗಾದಿ ವೀರ ಪ್ರೇಮಗಾಧಾ’ ಚಿತ್ರದ ಮೂಲಕ ದಕ್ಷಿಣ ಭಾರತದ ಚಿತ್ರರಂಗಕ್ಕೆ ನಾಯಕಿಯಾಗಿ ಪರಿಚಯವಾದ ಚೆಲುವೆ.

ನಂತರ ತೆಲುಗಿನ “ಮಹಾನುಭಾವುಡು’, “ಕೇರಾಫ್ ಸೂರ್ಯ’, “ಜವಾನ್‌’, “ರಾಜ ದಿ ಗ್ರೇಟ್‌’, ಹಿಂದಿಯಲ್ಲಿ ಅನುಷ್ಕಾ ಶರ್ಮಾ ಅಭಿನಯದ “ಫಿಲೌರಿ’, ತಮಿಳಿನ “ನೋಟ’, “ಪಟ್ಟಾಸ್‌’ ಚಿತ್ರಗಳಲ್ಲಿ ಅಭಿನಯಿಸಿರುವ ಮೆಹ್ರೀನ್‌, ಸದ್ಯ ತೆಲುಗು, ತಮಿಳು, ಹಿಂದಿ, ಪಂಜಾಬಿ ಚಿತ್ರರಂಗದಲ್ಲಿ ಚಿರಪರಿಚಿತ ನಟಿ. ಸದ್ಯ ದಕ್ಷಿಣ ಭಾರತದ ಬೇಡಿಕೆಯ ನಾಯಕಿಯರ ಪಟ್ಟಿಯಲ್ಲಿರುವ ಮೆಹ್ರೀನ್‌ ಈಗ “ರಾಬರ್ಟ್‌’ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಅಡಿಯಿಡುತ್ತಿದ್ದಾರೆ ಎನ್ನಲಾಗುತ್ತಿದೆ.

ಈ ಹಿಂದೆ ಕೂಡ ಐಶ್ವರ್ಯಾ ರೈ, ಅನುಷ್ಕಾ ಶೆಟ್ಟಿ, ರಾಕುಲ್‌ ಪ್ರೀತ್‌ ಸಿಂಗ್‌, ಸಾಯಿ ಪಲ್ಲವಿ, ಕೀರ್ತಿ ಸುರೇಶ್‌ ಮೊದಲಾದ ನಾಯಕಿಯರ ಹೆಸರು “ರಾಬರ್ಟ್‌’ ಚಿತ್ರದಲ್ಲಿ ಕೇಳಿ ಬಂದಿತ್ತಾದರೂ, ಚಿತ್ರತಂಡ ಮಾತ್ರ ಇದ್ಯಾವುದರ ಬಗ್ಗೆಯೂ ತುಟಿಬಿಚ್ಚಿರಲಿಲ್ಲ. ಈಗ ಮೆಹ್ರೀನ್‌ ಬಗ್ಗೆಯೂ ಇಂಥದ್ದೊಂದು ಸುದ್ದಿ ಹರಿದಾಡುತ್ತಿದ್ದು, ಚಿತ್ರತಂಡ ಮಾತ್ರ ಈ ಕುರಿತು ಏನನ್ನೂ ಖಚಿತಪಡಿಸಿಲ್ಲ.

“ರಾಬರ್ಟ್‌’ ಚಿತ್ರದ ಎರಡನೆ ಹಂತದ ಚಿತ್ರೀಕರಣ ಸೆಪ್ಟೆಂಬರ್‌ ಎರಡನೆ ವಾರದಿಂದ ಹೈದರಾಬಾದ್‌ನ ರಾಮೋಜಿ ಫಿಲ್ಮ್ ಸಿಟಿಯಲ್ಲಿ ಪ್ರಾರಂಭವಾಗಲಿದ್ದು, ಸುಮಾರು 15 ದಿನಗಳ ಕಾಲ ಎರಡನೇ ಹಂತದ ಚಿತ್ರೀಕರಣ ಮಾಡಲು ಎನ್ನಲಾಗುತ್ತಿದೆ. ರಾಮೋಜಿ ಫಿಲ್ಮ್ ಸಿಟಿಯಲ್ಲಿ ಎರಡನೆ ಹಂತದ ಚಿತ್ರೀಕರಣ ಮಾಡಲಾಗುತ್ತೆ. ಈಗಾಗಲೆ ಚಿತ್ರತಂಡ ಯೋಜನೆ ಹಾಕಿಕೊಂಡಿದೆ. ಗಾಂಧಿನಗರದಲ್ಲಿ ಹರಿದಾಡುತ್ತಿರುವ ಗುಸುಗುಸು ನಿಜವಾದರೆ, ಮೆಹ್ರೀನ್‌ “ರಾಬರ್ಟ್‌’ ಚಿತ್ರದ ಎರಡನೆ ಹಂತದ ಚಿತ್ರೀಕರಣದಲ್ಲಿ ಭಾಗಿಯಾಗಲಿದ್ದಾರೆ.