ಮೋಜೋಗೆ ಯೋಗರಾಜ ಭಟ್‌ ಧ್ವನಿ

Team Udayavani, Aug 1, 2017, 10:55 AM IST

ಚಿತ್ರಗಳ ನಿರೂಪಣೆ, ಹಿನ್ನೆಲೆ ಧ್ವನಿಯನ್ನು ಬೇರೆ ನಟರಿಂದ, ನಿರ್ದೇಶಕರಿಂದ ಕೊಡಿಸೋದು ಹೊಸ ಟ್ರೆಂಡ್‌. ಈಗಾಗಲೇ ಅನೇಕರು ಕೊಟ್ಟಿದ್ದಾರೆ ಕೂಡಾ. ಈಗ ನಿರ್ದೇಶಕ ಯೋಗರಾಜ ಭಟ್ಟರು ಕೂಡಾ ಸಿನಿಮಾವೊಂದಕ್ಕೆ ಧ್ವನಿ ನೀಡಿದ್ದಾರೆ.

ಅದು “ಮೋಜೋ’ ಚಿತ್ರಕ್ಕೆ. ನಿರ್ದೇಶಕ ಶ್ರೀಶ ಬೆಳಕವಾಡಿ ನಿರ್ದೇಶನದ ಈ ಚಿತ್ರಕ್ಕೆ ಭಟ್ಟರು ಧ್ವನಿಯಾಗಿದ್ದು, ಮನುಷ್ಯನ ಉಪಪ್ರಜ್ಞೆಗೆ ಇರುವ ಅಪಾರ ಶಕ್ತಿಯ ಪರಿಚಯ ಮಾಡಿಕೊಡುವ ಪೀಠಿಕೆಯಲ್ಲಿ ಭಟ್ಟರ ಧ್ವನಿ ಕೇಳಲಿದೆ.

ಯೋಗರಾಜ್‌ ಭಟ್ಟರ ಧ್ವನಿಯಲ್ಲೇ ಮಾಂತ್ರಿಕತೆ ಇದೆಯೆಂದು ಹೇಳುತ್ತಾ ಚಲನಚಿತ್ರದ ಆರಂಭಕ್ಕೆ ಅವರ ಧ್ವನಿಯು ಉತ್ತಮ ಆವೇಗವನ್ನು ನೀಡಿದೆ ಎಂಬುದು ಚಿತ್ರತಂಡದ ಮಾತು. ಈ ಚಿತ್ರವನ್ನು  ಪೂರ್ವಿ ಆರ್ಟ್ಸ್ ಬ್ಯಾನರಿನಲ್ಲಿ ಅಮೆರಿಕಾ ಮೂಲದ ಗಜಾನನ್‌ ಭಟ್‌ ಅವರು ನಿರ್ಮಿಸಿದ್ದಾರೆ.

ಈ ಹಿಂದೆ “ಕ’ ಸಿನಿಮಾದಲ್ಲಿ ಸಣ್ಣ ಪಾತ್ರ ಮಾಡಿದ್ದ ಮನು ಇಲ್ಲಿ ನಾಯಕ. ಚಿತ್ರೀಕರಣ ಅನುಭವ ಹಂಚಿಕೊಂಡರು. ನಾಯಕಿಯಾಗಿ ಅನುಷಾ ನಟಿಸಿದ್ದು, ಅವರಿಲ್ಲಿ ಮನೋವೈದೈಯಾಗಿ ನಟಿಸಿದ್ದಾರೆ. ಅನಂತ್‌ ಅರಸ್‌ ಛಾಯಾಗ್ರಹಣ ಮಾಡಿದ್ದಾರೆ. ಅಜನೀಶ್‌ ಲೋಕನಾಥ್‌ ಅವರ ಹಿನ್ನೆಲೆ ಸಂಗೀತ ಚಿತ್ರಕ್ಕಿದೆ.