Mr Natwarlal Movie Review: ರೋಚಕ ತಿರುವುಗಳಲ್ಲಿ ನಟ್ವರ್‌ಲಾಲ್‌ ಸಂಚಾರ

Team Udayavani, Feb 24, 2024, 6:22 PM IST

ಸಸ್ಪೆನ್ಸ್‌-ಥ್ರಿಲ್ಲರ್‌ ಸಿನಿಮಾಗಳಲ್ಲಿ ಪ್ರೇಕ್ಷಕರು ಮುಖ್ಯವಾಗಿ ಬಯಸೋದು ಕುತೂಹಲ. ಕಥೆ, ತನಿಖೆ ಮುಂದೆ ಹೇಗೆ ಸಾಗುತ್ತದೆ, ಟ್ವಿಸ್ಟ್‌ಗಳು ಯಾವ ರೀತಿ ಎದುರಾಗುತ್ತವೆ ಎಂಬ ಅಂಶವನ್ನು ನೀಟಾಗಿ ಕಟ್ಟಿಕೊಟ್ಟರೆ ಆ ಪ್ರಯತ್ನವನ್ನು ಪ್ರೇಕ್ಷಕ ಮೆಚ್ಚುತ್ತಾನೆ.

ಈ ವಾರ ತೆರೆಗೆ ಬಂದಿರುವ ʼನಟ್ವರ್‌ಲಾಲ್‌ʼ ಕೂಡಾ ಇದೇ ಹಾದಿಯಲ್ಲಿ ಸಾಗುವ ಸಿನಿಮಾ. ತನಿಖಾ ಹಾದಿ ಯಲ್ಲಿ ಸಾಗುವ ಈ ಚಿತ್ರ ಕ್ಷಣಕ್ಕೊಂದು ತಿರುವು ಪಡೆದುಕೊಂಡು ಪ್ರೇಕ್ಷಕರ ಕುತೂಹಲಕ್ಕೆ ಕಾರಣವಾಗುತ್ತದೆ. ಒಬ್ಬ ಸಾದಾಸೀದಾ ಹುಡುಗನ ಜೀವನದಲ್ಲಿ ನಡೆಯುವ ಘಟನೆ ಹೇಗೆ ಆತನನ್ನು ದೊಡ್ಡ ಕ್ರಿಮಿನಲ್‌ ಆಗಿ ಮಾಡುತ್ತದೆ, ಆತನ ಬಳಸುವ ಟೆಕ್ನಿಕ್‌ ಏನು, ಆತನ ಹಿಡಿಯಲು ಪೊಲೀಸ್‌ ಇಲಾಖೆ ಪರದಾಡುವ ರೀತಿಯನ್ನು ಈ ಚಿತ್ರದಲ್ಲಿ ಕಟ್ಟಿಕೊಡಲಾಗಿದೆ.

ಆರಂಭದಲ್ಲಿ ಫ್ಯಾಮಿಲಿ ಡ್ರಾಮಾ, ಲವ್‌, ಜಿಮ್‌ ಎಲ್ಲವೂ ಬಂದು ಹೋಗುತ್ತದೆ. ಆದರೆ, ದ್ವಿತೀಯಾರ್ಧದ ನಂತರ ಸಿನಿಮಾ ತನಿಖಾ ಹಾದಿಯತ್ತ ಮುಖ ಮಾಡುವ ಮೂಲಕ ಮಗ್ಗುಲು ಬದಲಿಸಿ ಪ್ರೇಕ್ಷಕರಿಗೂ ಹೊಸ ಅನುಭವ ನೀಡುತ್ತದೆ. ನಾಯಕ ಏಕಾಏಕಿ ಕ್ರಿಮಿನಲ್‌ ಹಾದಿ ಹಿಡಿಯಲು ಕಾರಣವೇನು ಎಂಬ ಕುತೂಹಲವಿದ್ದರೆ ನೀವು “ಮಿಸ್ಟರ್‌ ನಟ್ವರ್‌ಲಾಲ್‌’ ನೋಡಬಹುದು. ಇಲ್ಲಿ ಸೈಬರ್‌ ಕ್ರೈಮ್‌, ಹ್ಯಾಕರ್ಸ್‌ ಕೈ ಚಳಕ… ಹೀಗೆ ಅನೇಕ ಅಂಶಗಳು ಬರುತ್ತವೆ.

ನಾಯಕ ತನುಶ್‌ ಶಿವಣ್ಣ ರಗಡ್‌ ಲುಕ್‌ನಲ್ಲಿ ಮಿಂಚಿದ್ದಾರೆ. ಉಳಿದಂತೆ ಸೋನಾಲ್‌, ರಾಜೇಶ್‌, ನಾಗಭೂಷಣ್‌ ನಟಿಸಿದ್ದಾರೆ.