ಕಲಾವಿದರ ಸಂಘವನ್ನು ಭೂತ ಬಂಗಲೆ ಮಾಡಬೇಡಿ: ಮುಖ್ಯಮಂತ್ರಿ ಚಂದ್ರು

Team Udayavani, Dec 23, 2021, 10:48 AM IST

“ಅಂಬರೀಶ್‌ ಅವರ ಶ್ರಮದಿಂದ ಆದ ಕಲಾವಿದರ ಸಂಘವನ್ನು ಭೂತ ಬಂಗಲೆಯನ್ನಾಗಿ ಮಾಡಬೇಡಿ, ಬೇರೆ ಬೇರೆ ಚಟುವಟಿಕೆಗಳ ಮೂಲಕ ಆ್ಯಕ್ಟೀವ್‌ ಆಗಿಡಿ …”

– ಹೀಗೆ ನೇರವಾಗಿ ಹೇಳಿದವರು ಹಿರಿಯ ನಟ ಮುಖ್ಯಮಂತ್ರಿ ಚಂದ್ರು. ಅವರ ಈ ಹೇಳಿಕೆಗೆ ಕಾರಣ ಕನ್ನಡದ ಪರವಾದ ಹೋರಾಟದ ರೂಪುರೇಷೆ.

“ಯಾವುದೇ ಹೋರಾಟವಾಗಬೇಕಾದರೂ ಅದಕ್ಕೊಂದು ರೂಪುರೇಷೆ ಸಿದ್ಧವಾಗ ಬೇಕು. ಮುಂಚೂಣಿ ಕಲಾವಿದರು ಬರಬೇಕು. ಆ ತರಹದ ಕಲಾವಿದರು ಬರಬೇಕಾದರೆ ಚರ್ಚೆಯಾಗಬೇಕು. ನಮ್ಮಲ್ಲಿ ಕಲಾವಿದರ ಸಂಘವಿದ್ದರೂ ಅಲ್ಲಿ ಈಗ ಯಾವುದೇ ಈಗ ಚಟುವಟಿಕೆ ನಡೆಯುತ್ತಿಲ್ಲ. ಅಂಬರೀಶ್‌ ಅವರ ಶ್ರಮದಿಂದ ಸರ್ಕಾರ ಅಷ್ಟು ದೊಡ್ಡ ಭವನ ಕಟ್ಟಲು ಅವಕಾಶ ನೀಡಿದೆ. ನಾವು ಆ ಭವನವನ್ನು ಬಳಸದೇ ನಾಳೆ ಸರ್ಕಾರ ವಾಪಾಸ್‌ ಕೇಳುವಂತಾಗಬಾರದು. ಅದನ್ನು ಭೂತ ಬಂಗಲೆಯಾಗಿ ಮಾಡದೇ ಚಿತ್ರರಂಗದ ಕುರಿತಾದ ಸಭೆ, ಸಮಾರಂಭ, ಚರ್ಚೆಗಳ ಮೂಲಕ ಕಲಾವಿದರ ಸಂಘವನ್ನು ಚಟುವಟಿಕೆ ಯಲ್ಲಿಡಬೇಕು’ ಎಂದು ಸಲಹೆ ನೀಡಿದರು.

ಇದನ್ನೂ ಓದಿ:ಕನ್ನಡಿಗನಿಗೆ ನಾಯಕತ್ವ ನೀಡಲು ಮುಂದಾಗಿದೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು