ಮುರುಗನ ಜೊತೆ ಕಿರಣ್‌ ಹಾಟ್‌ ಸ್ಟೆಪ್‌

Team Udayavani, Nov 6, 2022, 5:28 PM IST

ನಟಿ ಕಿರಣ್‌ ಯೋಗೀಶ್ವರ್‌ ಈಗ ಐಟಂ ಹಾಡೊಂದರಲ್ಲಿ ಸಖತ್‌ ಕಲರ್‌ಫ‌ುಲ್‌ ಆಗಿ ಸ್ಟೆಪ್‌ ಹಾಕಿದ್ದಾರೆ. ಅದು ಮುರುಗನ ಜೊತೆ.. ಹೌದು, “ಕೊಡೆಮುರುಗ’ ಎಂಬ ಹಾಸ್ಯ ಚಿತ್ರದಲ್ಲಿ ನಾಯಕನಾಗಿ ಅಭಿನಯಿಸಿದ ನಟ ಮುನಿಕೃಷ್ಣ ಈಗ ಸದ್ದಿಲ್ಲದೇ ಹೊಸ ಸಿನಿಮಾವೊಂದರಲ್ಲಿ ನಟಿಸಿದ್ದಾರೆ.

ವಿಜಯ ಪ್ರವೀಣ್‌ ಅವರ ನಿರ್ದೇಶನದಲ್ಲಿ ಮೂಡಿಬಂದಿರುವ ಆ ಚಿತ್ರದ ಹೆಸರು “ಮುರುಗ ಸನ್‌ ಆಫ್ ಕಾನೂನು’. ಇತ್ತೀಚೆಗೆ ಈ ಚಿತ್ರದ ಐಟಂ ಹಾಡೊಂದನ್ನು ಆನೇಕಲ್‌ ಬಳಿ ಸೆಟ್‌ ಹಾಕಿ ಚಿತ್ರೀಕರಿಸಲಾ ಯಿತು. ಈ ಹಾಡಲ್ಲಿ ಬಿಗ್‌ಬಾಸ್‌ ಸ್ಪರ್ಧಿ ಕಿರಣ್‌ ಯೋಗೀಶ್ವರ್‌ ನೃತ್ಯ ಮಾಡಿದ್ದಾರೆ.

ಇದೊಂದು ಪಕ್ಕಾ ಗ್ರಾಮೀಣ ಸೊಗಡಿನ ಚಿತ್ರವಾಗಿದು ಮಂಗಳೂರು, ಮಲ್ಪೆ, ಕಾಪು ಬೀಚ್‌, ಸಕಲೇಶಪುರ, ಆನೇಕಲ್‌ ಮತ್ತು ಬೆಂಗಳೂರು ಸುತ್ತಮುತ್ತ ಚಿತ್ರಕ್ಕೆ 35 ದಿನಗಳ ಕಾಲ ಚಿತ್ರೀಕರಣ ನಡೆಸಲಾಗಿದೆ. ಇಡೀ ಸಿನಿಮಾ ಹಳ್ಳಿ ಹಿನ್ನೆಲೆಯಲ್ಲಿ ಸಾಗಲಿದ್ದು, ಜನರ ಪರ ಹೋರಾಡುವ ಪಾತ್ರದಲ್ಲಿ ಮುರುಗ ಕಾಣಿಸಿ ಕೊಂಡಿದ್ದಾರಂತೆ.

ಈ ಚಿತ್ರದಲ್ಲಿ ನಾಯಕಿಯಾಗಿ ಚಿರಶ್ರೀ ಹಾಗೂ ಮಮತಾ ರಾಹುತ್‌ ಬಣ್ಣ ಹಚ್ಚಿದ್ದಾರೆ. ನಾಯಕಿಯ ತಂದೆಯಾಗಿ ರಮೇಶ್‌ ಭಟ್‌ ಅಲ್ಲದೆ ನಾಯಕನ ತಾಯಿಯ ಪಾತ್ರದಲ್ಲಿ ಹಿರಿಯ ನಟಿ ವಿನಯಾಪ್ರಸಾದ್‌ ಅವರು ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಅಂಬುಜಾ, ಪ್ರಭು, ಕಾರ್ತಿಕ್‌, ಶಿವು, ಡಿಂಗ್ರಿ ನಾಗರಾಜ್‌, ಉಮೇಶ್‌ ಮುಂತಾದವರು ಈ ಚಿತ್ರದಲ್ಲಿ ನಟಿಸಿದ್ದಾರೆ. ಎಎಸ್‌ಎ ಪ್ರೊಡಕ್ಷನ್‌ ಮೂಲಕ ಮುನಿಕೃಷ್ಣ ಅವರೇ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ.

ಚಿತ್ರದ ಹಾಡುಗಳಿಗೆ ದ್ವೈಪಾಯನ ಸಿಂಗ್‌ ಅವರ ಸಂಗೀತ ಸಂಯೋಜನೆಯಿದ್ದು, ರವಿಚಂದ್ರನ್‌ ಅವರ ಸಂಕಲನ, ಶಂಕರ್‌ ಅವರ ಛಾಯಾಗ್ರಹಣ ಈ ಚಿತ್ರಕ್ಕಿದೆ.