ನಮ್ಮೂರ ರಸ್ತೆಯಲ್ಲಿ ಪುಂಡೈಕ್ಳ ಹಾರಾಟ!

Team Udayavani, Jul 2, 2017, 3:51 PM IST

ಚಿತ್ರ: ನಮ್ಮೂರ ಹೈಕ್ಳು
ನಿರ್ಮಾಣ: ಶ್ರೀನಿವಾಸ್‌-ರಘುರಾಜ್‌
 ನಿರ್ದೇಶನ: ಪ್ರಸನ್ನ ಶೆಟ್ಟಿ
ತಾರಾಗಣ: ಪವನ್‌, ರಘುರಾಜ್‌, ಸುನೀಲ್‌,ಮಮತಾ ರಾಹುತ್‌, ದೀಪ್ತಿ.

ಹಳ್ಳಿಯ ಮಕ್ಕಳೆಂದರೆ ಕೆಲಸ ಇಲ್ಲದೇ ತಿರುಗುವವರು, ಊರಕಟ್ಟೆಯಲ್ಲಿ ಕುಳಿತು ಹರಟೆಹೊಡೆಯುವವರು, ಪೋಲಿ ಕೆಲಸ ಮಾಡುತ್ತಾ, ಮನೆಗೆ ಭಾರವಾಗಿರುವವರು ಎಂಬ ಕಾನ್ಸೆಪ್ಟ್ ಯಾಕೋ ನಮ್ಮ ಚಿತ್ರರಂಗದಲ್ಲಿ ಇನ್ನೂ ಬದಲಾಗುತ್ತಲೇ ಇಲ್ಲ. ಹಳ್ಳಿಗಳು ಅಭಿವೃದ್ಧಿ ಪಥದತ್ತ ಸಾಗುತ್ತಿದ್ದರೂ ನಿರ್ದೇಶಕರ ಯೋಚನೆಗಳು ಬದಲಾಗುತ್ತಿಲ್ಲ. ಹಾಗಾಗಿಯೇ ಗ್ರಾಮೀಣ ಸೊಗಡಿನ ಚಿತ್ರವೆಂದು ಹೇಳಿಕೊಂಡು ಬರುವ ಚಿತ್ರಗಳೆಲ್ಲವೂ ಪಟಾಪಟಿ ಚಡ್ಡಿ, ಮೋಟು ಬೀಡಿ ಹಾಗೂ ಪೋಲಿ ಡೈಲಾಗ್‌ಗಳಿಗಷ್ಟೇ ಸೀಮಿತವಾಗುತ್ತಿವೆ. “ನಮ್ಮೂರ ಹೈಕ್ಳು’ ಚಿತ್ರ ಕೂಡಾ ಅದೇ ಸಾಲಿಗೆ ಸೇರುವ ಸಿನಿಮಾ. ಈ ಸಿನಿಮಾದಲ್ಲಿ ಏನಿದೆ ಎಂದರೆ ಹೊಸದಾಗಿ ಹೇಳುವಂಥದ್ದೇನೂ ಇಲ್ಲ. ಈಗಾಗಲೇ ಸಾಕಷ್ಟು ಸಿನಿಮಾಗಳಲ್ಲಿ ಬಂದಿರುವ ಹಳ್ಳಿ ಹೈದರ ತುಂಟತನ, ದೋಸ್ತಿ ಹಾಗೂ  ಗ್ಯಾಪಲ್ಲಿ ಊರೂದ್ಧಾರ ಮಾಡುವ ಕನಸು ಇಲ್ಲೂ ರಿಪೀಟ್‌ ಆಗಿದೆ.

ಒಂದೇ ಬೀದಿಯ ಸ್ನೇಹಿತರ ಗುಂಪು, ಕೆಲಸವಿಲ್ಲದೇ ಹಳ್ಳಿಕಟ್ಟೆಯಲ್ಲಿನ ಹರಟೆ, ಮಧ್ಯೆ ಒಂದು ಲವ್‌, ಜೊತೆಗೆ ಸಣ್ಣದೊಂದು ಮನಸ್ತಾಪ, ಕೊನೆಗೆ ಒಂದಾಗಿ ಹೋರಾಡುವ ಮನಸ್ಸು … ಇದು “ನಮ್ಮೂರ ಹೈಕ್ಳು’ ಚಿತ್ರದ ಒಟ್ಟು ಸರಕು. ಇಷ್ಟು ಸರಕನ್ನಿಟ್ಟುಕೊಂಡು ನಿರ್ದೇಶಕ ಪ್ರಸನ್ನ ಅವರು ಎರಡು ಗಂಟೆ ಎಳೆದಾಡಿದ್ದಾರೆ. ಊರಿಗೊಂದು ರಸ್ತೆ ಆಗಬೇಕು, ಆ ಮೂಲಕ ಜನರ ಜೀವ ಉಳಿಸಬೇಕು ಎಂಬುದು ಚಿತ್ರದ ಒಟ್ಟು ಆಶಯ.

ಆ ಆಶಯ ಚಿತ್ರದಲ್ಲಿ ಆಗಾಗ ಐದೈದು ನಿಮಿಷ ಬಂದು ಹೋಗುತ್ತದೆ ಅನ್ನೋದು ಬಿಟ್ಟರೆ ಉಳಿದಂತೆ ಚಿತ್ರದಲ್ಲಿ ಹುಡುಗರ ತುಂಟಾಟವೇ ಇಲ್ಲಿ ಮೆರೆದಿದೆ. ಯಾವುದೇ ತುಂಟಾಟ, ಪೋಲಿತನವನ್ನು ಒಂದೆರಡು ದೃಶ್ಯಗಳಲ್ಲಿ ಸಹಿಸಿಕೊಳ್ಳಬಹುದು. ಆದರೆ, ಇಡೀ ಸಿನಿಮಾವೇ ಅದಾಗಿ ಹೋದರೆ ಪ್ರೇಕ್ಷಕರ ತಾಳ್ಮೆ ಪರೀಕ್ಷೆಯಾಗುತ್ತದೆ. ಹಾಗೆ ನೋಡಿದರೆ ಹುಡುಗರ ಗುಂಪು ಊರೂದ್ಧಾರ ಮಾಡಲು ಪಣತೊಡುವ ಕಾನ್ಸೆಪ್ಟ್ ಚೆನ್ನಾಗಿದೆ. ಆ ಆಶಯವನ್ನು ಗಂಭೀರವಾಗಿ ಮಾಡಿದ್ದರೆ “ನಮ್ಮೂರ ಹೈಕ್ಳು’ಗೆ ಒಂದು ಅರ್ಥ, ಗಾಂಭೀರ್ಯ ಬರುತ್ತಿತ್ತು. ಆದರೆ, ಆ ಕೆಲಸ ಇಲ್ಲಿ ಆಗಿಲ್ಲ. ನಿರ್ದೇಶಕರು ಕಾಮಿಡಿ, ತರಲೆ ಬಿಟ್ಟು ಬೇರೇನನ್ನು ಯೋಚನೆ ಮಾಡುವ ಗೋಜಿಗೆ ಹೋಗಿಲ್ಲ. ಅಂದಹಾಗೆ, ಇದು ನಿರ್ದೇಶಕ ಪ್ರಸನ್ನ ಶೆಟ್ಟಿ ಬರೆದ “ಊರ ಉಸಾಬರಿ’ ಕಾದಂಬರಿ  ಯನ್ನಾಧರಿಸಿದ ಸಿನಿಮಾ.

ಇಡೀ ಸಿನಿಮಾದಲ್ಲಿ ಏಕಾತನತೆ ಎದ್ದು ಕಾಣುತ್ತದೆ. ಇಂತಹ ಸಾಕಷ್ಟು ಸಿನಿಮಾಗಳನ್ನು ನೋಡಿ ಪಳಗಿರುವ ಪ್ರೇಕ್ಷಕರಿಗೆ ಸಿನಿಮಾ ಮುಂದೆ ಹೇಗೆ ಸಾಗಬಹುದೆಂಬ ಸ್ಪಷ್ಟ ಚಿತ್ರಣ ಸಿಕ್ಕಿರುತ್ತದೆ. ರೊಮ್ಯಾನ್ಸ್‌ಗೆ ಒಂದು ಸಾಂಗ್‌, ಹೀರೋಯಿಸಂಗೆ ಒಂದು ಫೈಟ್‌, ಮೋಜು ಮಸ್ತಿಗೆ ಐಟಂ ಸಾಂಗ್‌ … ಇದಕ್ಕೆ “ನಮ್ಮೂರ ಹೈಕ್ಳು’ ಚಿತ್ರ ನ್ಯಾಯ ಒದಗಿಸಿದೆ. ಈ ಸಿದ್ಧಸೂತ್ರವನ್ನು ಯಥಾವತ್ತಾಗಿ ಇಲ್ಲಿ ಪಾಲಿಸಲಾಗಿದೆ. ಈ ಹಿಂದೆ ಚಿತ್ರತಂಡವೇ ಹೇಳಿಕೊಂಡಂತೆ, ಇದು ಹಾಸನ ಬ್ಯಾಕ್‌ಡ್ರಾಪ್‌ನಲ್ಲಿ ನಡೆಯುವ ಸಿನಿಮಾ. ಅಲ್ಲಿನ ಭಾಷೆಯನ್ನು ಬಳಸಲಾಗಿದೆ ಎಂದಿತ್ತು. ಆದರೆ, ಚಿತ್ರ ನೋಡುವಾಗ ಮಂಡ್ಯ ಕನ್ನಡಕ್ಕೂ, ಹಾಸನ ಕನ್ನಡಕ್ಕೂ ಯಾವುದೇ ವ್ಯತ್ಯಾಸವಿಲ್ಲವೇನೋ ಎಂಬ ಸಂದೇಹ ಬರುತ್ತದೆ.

ಚಿತ್ರದಲ್ಲಿ ಒಳ್ಳೆಯ ವಿಚಾರವೇ ಇಲ್ಲವೆಂದಲ್ಲ. ಮನೆಗೊಂದು ಶೌಚಾಲಯ, ಪ್ರಾಣಿ ಹಿಂಸೆಗೆ ಕಡಿವಾಣ, ವಿಧವಾ ವಿವಾಹ … ಇಂತಹ ಅಂಶಗಳಿವೆ. ಆದರೆ, ಅವೆಲ್ಲವನ್ನು ಹೈಕ್ಳ “ಓವರ್‌’ ಕಾಮಿಡಿ ಮರೆಮಾಚಿದೆ. ಚಿತ್ರದಲ್ಲಿ ಪವನ್‌, ರಘುರಾಜ್‌, ಸುನೀಲ್‌, ಮಮತಾ ರಾಹುತ್‌, ದೀಪ್ತಿ ಸೇರಿದಂತೆ ಅನೇಕರು ನಟಿಸಿದ್ದಾರೆ. ಇವರೆಲ್ಲರೂ ಆಗಾಗ ಆ್ಯಕ್ಟಿಂಗ್‌ ಹಾಗೂ ಇನ್ನು ಕೆಲವೊಮ್ಮೆ ಓವರ್‌ ಆ್ಯಕ್ಟಿಂಗ್‌ ಮಾಡುತ್ತಾ ಪಾತ್ರದಲ್ಲಿ ಮಿಂಚಲು ಪ್ರಯತ್ನಿಸಿದ್ದಾರೆ.

ಮಮತಾ ರಾಹುತ್‌ ಅವರ ಖಡಕ್‌ ಸಾವಿತ್ರಿ ಪಾತ್ರ ಲುಂಗಿ ಉಟ್ಟುಕೊಂಡು ಬೀಡಿ ಸೇದುತ್ತದೆ. ಅದ್ಯಾವ ಊರಲ್ಲಿ ಹೆಣ್ಣು ಮಕ್ಕಳು ಲುಂಗಿ ಉಟ್ಟುಕೊಂಡು ಓಡಾಡುತ್ತಾರೋ ಗೊತ್ತಿಲ್ಲ. ಕಲ್ಪನೆ ನೈಜತೆಗೆ ಹತ್ತಿರವಾಗಿದ್ದರೆ ಚೆಂದ. ಚಿತ್ರದಲ್ಲಿ ನಟಿಸಿದ ಸತ್ಯಜಿತ್‌ ಹಾಗೂ ಸುಚೇಂದ್ರ ಪ್ರಸಾದ್‌ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ

 ರವಿಪ್ರಕಾಶ್‌ ರೈ