ಹೊಸಬರ ಪೋಲಿ ಕಥೆ; ಶೂಟಿಂಗ್‌ ಕಡೆಗೆ ‘ನಾನ್‌ ಪೋಲಿ’ ಚಿತ್ರ

Team Udayavani, Mar 19, 2022, 11:23 AM IST

ಬಹುತೇಕ ಹೊಸ ಪ್ರತಿಭೆಗಳೆ ಸೇರಿ ನಿರ್ಮಿಸುತ್ತಿರುವ “ನಾನ್‌ ಪೋಲಿ’ ಚಿತ್ರ ಇತ್ತೀಚೆಗೆ ಸೆಟ್ಟೇರಿತು. ಇನ್ನು ಸಿನಿಮಾದ ಹೆಸರೇ ಹೇಳುವಂತೆ, “ನಾನ್‌ ಪೋಲಿ’ ಅಪ್ಪಟ ಯೂಥ್ಸ್ ಮತ್ತು ಕಾಲೇಜ್‌ ಸ್ಟೋರಿ ಸಿನಿಮಾ.

ನವ ಪ್ರತಿಭೆ ಹರೀಶ್‌ ವಿ. ಚಿತ್ರದಲ್ಲಿ ನಾಯಕನಾಗಿ ಮತ್ತು ದಿಶಾ ಶೆಟ್ಟಿ ನಾಯಕಿಯಾಗಿ ಚಿತ್ರದಲ್ಲಿ ತೆರೆಮೇಲೆ ಉಳಿದಂತೆ ಯಶವಂತ, ಶೋಭರಾಜ್‌, ಸ್ವಪ್ನ ರಾಜ್‌, ದೇವರಾಜ್‌ ಮೋಹನಗಿರಿ, ರಾಮಿಗೌಡ, ಅಶೋಕ್‌, ವತ್ಸಲಾ ಮೊದಲಾದವರು “ನಾನ್‌ ಪೋಲಿ’ ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ.

ಚಿತ್ರದ ಕಥಾಹಂದರದ ಬಗ್ಗೆ ಮಾತನಾಡುವ ಚಿತ್ರತಂಡ, ಸ್ಕೂಲ್‌ ಮುಗಿಸಿ ಕಾಲೇಜು ಮೆಟ್ಟಿಲೇರುವ ಹುಡುಗನಿಗೆ ಎದುರಾಗುವ ಸವಾಲುಗಳು, ಅದನ್ನೆಲ್ಲ ಆತ ಹೇಗೆ ಎದುರಿಸುತ್ತಾನೆ. ಕಾಲೇಜ್‌ ಮೆಟ್ಟಿಲೇರಿದ ಬಳಿಕ ಹುಡುಗನ ಜೀವನದಲ್ಲಿ ಏನೇನು ಬದಲಾವಣೆ ಆಗುತ್ತದೆ ಎನ್ನುವುದರ ಸುತ್ತ “ನಾನ್‌ ಪೋಲಿ’ ಸಿನಿಮಾದ ಕಥಾಹಂದರ ಸಾಗುತ್ತದೆ ಎನ್ನುವುದು ಎಂದು ವಿವರಣೆ ನೀಡುತ್ತದೆ.

ಇದನ್ನೂ ಓದಿ:ಸಪ್ತ ಸಾಗರ ದಾಟಿದ ಪುನೀತ್‌ ಚಿತ್ರ: ವಿದೇಶದಲ್ಲೂ ಜೇಮ್ಸ್‌ ಅಬ್ಬರ

ಸಿನಿಮಾದ ಟೈಟಲ್‌ “ನಾನ್‌ ಪೋಲಿ’ ಅಂತಿದ್ದರೂ, ಎಲ್ಲ ಥರದ ಪ್ರೇಕ್ಷಕರೂ ಬಯಸುವ ಮನರಂಜನೆಯ ಅಂಶಗಳನ್ನು ಇಟ್ಟುಕೊಂಡು ಸಿನಿಮಾವನ್ನು ತೆರೆಮೇಲೆ ತರುತ್ತಿದ್ದೇವೆ ಎನ್ನುವುದು ಚಿತ್ರತಂಡದ ಮಾತು.

ಸುಮಾರು 45 ದಿನಗಳ ಕಾಲ ಬೆಂಗಳೂರು ಸುತ್ತಮುತ್ತ “ನಾನ್‌ ಪೋಲಿ’ ಚಿತ್ರದ ಚಿತ್ರೀಕರಣ ನಡೆಯಲಿದ್ದು, ಬಳಿಕ ಚಿತ್ರದ ಹಾಡುಗಳನ್ನು ಹೊರರಾಜ್ಯದ ಸುಂದರ ತಾಣಗಳಲ್ಲಿ ಚಿತ್ರಿಸುವ ಯೋಜನೆಯಲ್ಲಿದೆ ಚಿತ್ರತಂಡ. ಎಲ್ಲ ಅಂದು ಕೊಂಡಂತೆ ನಡೆದರೆ, ಇದೇ ಜೂನ್‌-ಜುಲೈ ವೇಳೆಗೆ ಚಿತ್ರವನ್ನು ಪ್ರೇಕ್ಷಕರ ಮುಂದೆ ತರುವ ಯೋಚನೆ ಯಲ್ಲಿದೆ ಚಿತ್ರತಂಡ.

“ವೆಂಕಟೇಶ ಪ್ರೊಡಕ್ಷನ್‌’ ಬ್ಯಾನರ್‌ನಲ್ಲಿ ಹರೀಶ್‌ ವಿ, ಯಶವಂತ ಎಂ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಚಿತ್ರಕ್ಕೆ ಎಸ್‌. ಕೀರ್ತಿವರ್ಧನ್‌ ಛಾಯಾಗ್ರಹಣ, ಭಾರ್ಗವ ಕೆ. ಎ ಸಂಕಲನವಿದೆ. ಚಿತ್ರದ ಹಾಡುಗಳಿಗೆ ಚೇತನ್‌ ಸಿ.ಯು ಸಂಗೀತ ಸಂಯೋಜನೆಯಿದೆ.