ಮಲಯಾಳಂ ಸೂಪರ್‌ ಸ್ಟಾರ್‌ ಗೆ ಡೈರೆಕ್ಟ್‌ ಮಾಡಲಿದ್ದಾರೆ ಕನ್ನಡದ ನಂದ ಕಿಶೋರ್

Team Udayavani, Aug 31, 2022, 6:37 PM IST

ಬೆಂಗಳೂರು: ದಕ್ಷಿಣ ಭಾರತದಲ್ಲಿ ಕನ್ನಡ ಸಿನಿಮಾಗಳನ್ನು ನೋಡುವ ದೃಷ್ಟಿಕೋನ ಬದಲಾಗಿದೆ. ಚಿತ್ರಗಳಿಗೆ ಮಾತ್ರವಲ್ಲದೆ, ನಿರ್ದೇಶಕರು, ತಂತ್ರಜ್ಞರು, ಕಲಾವಿದರಿಗೆ ಪರಭಾಷೆಯಲ್ಲಿ ಬೇಡಿಕೆ ಹೆಚ್ಚಾಗಿದೆ.

ಕೆಜಿಎಫ್‌ ಸರಣಿ ಹಿಟ್‌ ಬಳಿಕ ನಿರ್ದೇಶಕ ಪ್ರಶಾಂತ್‌ ನೀಲ್‌ ಟಾಲಿವುಡ್‌ ನ ʼಸಲಾರ್‌ʼ ನಲ್ಲಿ ಬ್ಯುಸಿಯಾಗಿದ್ದಾರೆ. ಈಗ ಈ ಸಾಲಿಗೆ ಕನ್ನಡದ ನಂದ ಕಿಶೋರ್‌ ಅವರು ಎಂಟ್ರಿ ಆಗುತ್ತಿದ್ದಾರೆ.

ಹೌದು ಮಲಯಾಳಂ ಚಿತ್ರವೊಂದಕ್ಕೆ ನಂದ ಕಿಶೋರ್‌ ಅವರು ಡೈರೆಕ್ಟ್‌ ಮಾಡುತ್ತಿರುವುದು ಪಕ್ಕಾ ಆಗಿದೆ. ಮಾಲಿವುಡ್‌ ಸೂಪರ್‌ ಸ್ಟಾರ್‌ ಮೋಹನ್‌ ಲಾಲ್‌ ಅವರ ಚಿತ್ರಕ್ಕೆ ನಂದ ಕಿಶೋರ್‌ ನಿರ್ದೇಶನ ಮಾಡುತ್ತಿದ್ದಾರೆ ಎನ್ನುವ ಸುದ್ದಿಯೊಂದು ಅಧಿಕೃತವಾಗಿ ಹೊರ ಬಿದ್ದಿದೆ.

‘ಅಧ್ಯಕ್ಷʼ, ʼರನ್ನʼ, ʼಮುಕುಂದ ಮುರಾರಿʼ ʼಪೊಗರುʼ ಹೀಗೆ ಸಾಲು – ಸಾಲು ಹಿಟ್‌ ಚಿತ್ರಗಳನ್ನು ನೀಡಿರುವ ನಂದ ಕಿಶೋರ್‌ ಮಲಯಾಳಂ ದಿಗ್ಗಜ ನಟನಿಗೆ ಡೈರೆಕ್ಟ್‌ ಮಾಡಲು ರೆಡಿಯಾಗಿದ್ದಾರೆ.

ಈ ಬಗ್ಗೆ ಸ್ವತಃ ಸೂಪರ್‌ ಸ್ಟಾರ್‌ ಮೋಹನ್‌ ಲಾಲ್‌ ಅವರೇ ವಿಷಯವನ್ನು ಹಂಚಿಕೊಂಡಿದ್ದಾರೆ.  “ನಾನು ‘ವೃಷಭ’ ಚಿತ್ರಕ್ಕೆ ಸಹಿ ಹಾಕಲು ಕಾತರನಾಗಿದ್ದೇನೆ. ಇದು ಎವಿಎಸ್ ಸ್ಟುಡಿಯೋಸ್ ಅವರ ಮೊದಲ ಸಿನಿಮಾ. ಈ ಚಿತ್ರವನ್ನು ನಂದ ಕಿಶೋರ್ ನಿರ್ದೇಶನ ಮಾಡುತ್ತಿದ್ದಾರೆ. ಅಭಿಷೇಕ್ ವ್ಯಾಸ್, ಪ್ರವೀಣ್ ಸಿಂಗ್ ಮತ್ತು ಶ್ಯಾಮ್ ಸುಂದರ್ ಬಂಡವಾಳ ಹೂಡುತ್ತಿದ್ದಾರೆ. ಈ ಬಹುಭಾಷಾ ಸಿನಿಮಾ ಆಕ್ಷನ್ ಮತ್ತು ಭಾವನೆಗಳಿಂದ ತುಂಬಿದೆ. ನಿಮ್ಮೆಲ್ಲರ ಬೆಂಬಲ, ಆಶೀರ್ವಾದವನ್ನು ನಾನು ಕೋರುತ್ತೇನೆ” ಎಂದು ಮೋಹನ್ ಲಾಲ್ ಟ್ವೀಟ್‌ನಲ್ಲಿ ತಿಳಿಸಿದ್ದಾರೆ.

ಜುಲೈ 2023 ರಂದು ಈ ಚಿತ್ರದ ಚಿತ್ರೀಕರಣ ಆರಂಭವಾಗಲಿದೆ. ಇದೊಂದು ಔಟ್ ಅಂಡ್ ಔಟ್ ಕಮರ್ಷಿಯಲ್ ಎಂಟರ್‌ಟೈನರ್ ಸಿನಿಮಾ ಆಗಲಿದೆ.

ಈ ಮೂಲಕ ಕನ್ನಡದ ಮತ್ತೊಂದು ನಿರ್ದೇಶಕ ಪ್ಯಾನ್‌ ಇಂಡಿಯಾ ಡೈರೆಕ್ಟರ್‌ ಆಗಲು ಹೊರಟಿದ್ದಾರೆ.

I’m excited to have signed in for “Vrushabha,” the first movie from AVS Studios, directed by Nanda Kishore and produced by Abhishek Vyas, Praveer Singh, and Shyam Sunder. This multilingual movie is filled with action and emotion, and I seek all your support and blessings. pic.twitter.com/omOaAB2Fub

— Mohanlal (@Mohanlal) August 27, 2022