Sandalwood: ಶಿವಣ್ಣ – ಗಣೇಶ್‌ ʼಶಿವಗಣʼಕ್ಕೆ ನಂದ ಕಿಶೋರ್‌ ಆ್ಯಕ್ಷನ್ ಕಟ್

Team Udayavani, Jul 15, 2024, 5:22 PM IST

ಬೆಂಗಳೂರು: ಇತ್ತೀಚೆಗೆ ಶಿವರಾಜ್‌ ಕುಮಾರ್‌ (Shiva Rajkumar) ಅವರ ಹುಟ್ಟುಹಬ್ಬದ ಸಂದರ್ಭದಲ್ಲಿ ಅವರ ಮುಂದಿನ ಸಿನಿಮಾಗಳ ಬಗ್ಗೆ ಸಾಲು ಸಾಲು ಅಪ್ಡೇಟ್‌ಗಳು ಹೊರಬಿದ್ದಿವೆ. ಹೊಸ ಪೋಸ್ಟರ್‌,ಟೀಸರ್‌ ಹೀಗೆ.. ಶಿವಣ್ಣ ಅಭಿಮಾನಿಗಳೊಂದಿಗೆ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳದೆ ಇದ್ರು, ಅಭಿಮಾನಿಗಳಿಗಾಗಿ ಸಿನಿಮಾದ ಸುದ್ದಿಗಳನ್ನು ಕೊಟ್ಟು ಸರ್ಪ್ರೈಸ್‌ ನೀಡಿದ್ದಾರೆ.

ಶಿವರಾಜ್‌ ಕುಮಾರ್‌ ಅವರ ʼಭೈರತಿ ರಣಗಲ್‌ʼ(Bhairathi Ranagal) ಸಿನಿಮಾ ಇದೇ ವರ್ಷದ ಸೆಪ್ಟೆಂಬರ್‌ ತಿಂಗಳಿನಲ್ಲಿ ರಿಲೀಸ್‌ ಆಗಲಿದೆ. ಈ ನಡುವೆ ಅವರ ಮುಂದಿನ ಸಿನಿಮಾಗಳ ಬಗ್ಗೆ ಪ್ರೇಕ್ಷಕರಿಗೆ ಕುತೂಹಲ ಹೆಚ್ಚಾಗಿದೆ. ವಯಸ್ಸು 60 ದಾಟಿದರೂ ಶಿವರಾಜ್‌ ಕುಮಾರ್‌ ಹೊಸ ಸಿನಿಮಾಗಳಿಗೆ ಗ್ರೀನ್‌ ಸಿಗ್ನಲ್‌ ನೀಡುತ್ತಿದ್ದಾರೆ.

ಹೊಸ ಸಿನಿಮಾಗಳು ಅನೌನ್ಸ್‌ ಆದ ಪಟ್ಟಿಯಲ್ಲಿ ʼಶಿವಗಣʼ(Shivagana) ಎನ್ನುವ ಸಿನಿಮಾ ಕೂಡ ಸೇರಿದೆ. ಈ ಸಿನಿಮಾದಲ್ಲಿ ಇದೇ ಮೊದಲ ಬಾರಿಗೆ ಶಿವರಾಜ್‌ ಕುಮಾರ್‌ ಹಾಗೂ ಗೋಲ್ಡನ್‌ ಸ್ಟಾರ್‌ ಗಣೇಶ್‌ (Golden Star Ganesh) ಜೊತೆಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ಸಿನಿಮಾದ ಪೋಸ್ಟರ್‌ ವೊಂದು ಶಿವಣ್ಣನ ಬರ್ತ್‌ ಡೇ ಸಂದರ್ಭದಲ್ಲಿ ಸೋಶಿಯಲ್‌ ಮೀಡಿಯಾದಲ್ಲಿ ಹರಿದಾಡಿತ್ತು.

ಇದೀಗ ಸಿನಿಮಾದ ಬಗ್ಗೆ ಇತರೆ ಮಾಹಿತಿ ಹೊರಬಿದ್ದಿದೆ. ಸ್ಯಾಂಡಲ್‌ ವುಡ್‌ ನಲ್ಲಿʼ ಕೋಟಿಗೊಬ್ಬ 2ʼ ಮತ್ತು ʼಕೋಟಿಗೊಬ್ಬ 3ʼ ನಂತಹ ಸಿನಿಮಾಗಳಿಗೆ ಬಂಡವಾಳ ಹಾಕಿರುವ ನಿರ್ಮಾಪಕ ಸೂರಪ್ಪ ಬಾಬು (Producer Soorappa Babu) ಈ ಸಿನಿಮಾವನ್ನು ನಿರ್ಮಾಣ ಮಾಡಲಿದ್ದಾರೆ.

ಈ ಸಿನಿಮಾಕ್ಕೆ ಈಗಾಗಲೇ ʼಅಧ್ಯಕ್ಷʼ, ʼರನ್ನʼ, ʼವಿಕ್ಟರಿʼ, ʼಮುಕುಂದ ಮುರಾರಿʼ, ʼಪೊಗರುʼ ನಂತಹ ಹಿಟ್‌ ಸಿನಿಮಾಗಳನ್ನು ನೀಡಿರುವ ನಂದ ಕಿಶೋರ್(Nanda Kishore) ಅವರು ಆ್ಯಕ್ಷನ್ ಕಟ್ ಹೇಳಲಿದ್ದಾರೆ.

ಸದ್ಯ ನಂದ ಕಿಶೋರ್‌ ಮೋಹನ್‌ ಲಾಲ್‌ ಅವರೊಂದಿಗೆ ʼವೃಷಭʼ ಸಿನಿಮಾವನ್ನು ಮಾಡುತ್ತಿದ್ದಾರೆ. ಸೆಪ್ಟೆಂಬರ್ ನೊಳಗೆ ನಂದ ಕಿಶೋರ್‌ ತಮ್ಮ ಎಲ್ಲಾ ಶೂಟ್‌ ಗಳನ್ನು ಮುಗಿಸಿಕೊಂಡು  ಅಕ್ಟೋಬರ್‌ ವೇಳೆಗೆ ʼಶಿವಗಣʼ ಶುರು ಮಾಡುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ.

ಇದೊಂದು ಫ್ಯಾಮಿಲಿ ಎಂಟರ್ಟೈನ್ಮೆಂಟ್ ಸಿನಿಮಾವಾಗಲಿದೆ ಎನ್ನಲಾಗಿದೆ.

ಸದ್ಯ ಶಿವಣ್ಣ ನರ್ತನ್‌ ಅವರ ʼಭೈರತಿ ರಣಗಲ್‌ʼ, ಅರ್ಜುನ್‌ ಜನ್ಯ ಅವರ ʼ45ʼ , ರೋಹಿತ್‌ ಪದಕಿ ಅವರ ʼಉತ್ತರಕಾಂಡʼ, ಹೇಮಂತ್‌ ರಾವ್‌ ಅವರ ʼಭೈರವನ ಕೊನೆ ಪಾಠʼ,  ಲಕ್ಕಿ ಗೋಪಾಲ್‌ ಅವರ ʼಐವಿ  ರಿಟರ್ನ್ಸ್‌ʼ, ಶ್ರೀನಿ ಅವರ ʼದಳವಾಯಿʼ, ರವಿ ಬಸ್ರೂರು ಅವರ ʼಜಾವʼ , ಕಾರ್ತಿಕ್‌ ಅದ್ವೈತ್‌ ಅವರ ಇನ್ನು ಟೈಟಲ್‌ ಫಿಕ್ಸ್‌ ಆಗದ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಇತ್ತ ಗಣೇಶ್‌ ʼಕೃಷ್ಣಂ ಪ್ರಣಯ ಸಖಿʼ, ವಿಖ್ಯಾತ್‌ ನಿರ್ದೇಶನದ ರಮೇಶ್‌ ಅರವಿಂದ್‌ ಅವರೊಂದಿಗಿನ ಸಿನಿಮಾ ಸೇರಿದಂತೆ, ಪನ್ನಗಭರಣ ಅವರೊಂದಿಗಿನ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.