ಹೊಸತನದ ನನ್ನಪ್ರಕಾರಕ್ಕೀಗ ಇಪ್ಪತೈದರ ಸಂಭ್ರಮ!

Team Udayavani, Sep 21, 2019, 5:01 PM IST

ಪ್ರಿಯಾಮಣಿ, ಕಿಶೋರ್ ಥರದ ಪ್ರತಿಭಾವಂತ ನಟನಟಿಯರ ತಾರಾಗಣದೊಂದಿಗೆ, ಪೋಸ್ಟರ್ ಮೂಲಕವೇ ಥಳಥಳಿಸಿದ ತಾಜಾತನದೊಂದಿಗೆ ಸದ್ದು ಮಾಡುತ್ತಾ ತೆರೆ ಕಂಡಿದ್ದ ಚಿತ್ರ ನನ್ನಪ್ರಕಾರ. ಈ ಚಿತ್ರತಂಡವೀಗ ಭರ್ಜರಿ ಗೆಲುವಿನ ಖುಷಿಯಲ್ಲಿ ಮಿಂದೇಳುತ್ತಿದೆ. ಭಾರೀ ನಿರೀಕ್ಷೆಗಳ ಒಡ್ಡೋಲಗದಲ್ಲಿಯೇ ಬಿಡುಗಡೆಯಾಗಿದ್ದರೂ, ಅದಕ್ಕೆ ತಕ್ಕುದಾದ ಓಪನಿಂಗ್ ಸಿಕ್ಕಿದ್ದರೂ ಕೂಡಾ ಪರಭಾಷಾ ಚಿತ್ರಗಳ ಹಾವಳಿಯಿಂದ ಈ ನಿನಿಮಾಗೂ ಒಂದಷ್ಟು ಅಡೆತಡೆಗಳು ಎದುರಾಗಿದ್ದವು. ಆದರೂ ಛಲ ಬಿಡದೆ ಮುಂದುವರೆದು ಬಂದ ನನ್ನಪ್ರಕಾರಕ್ಕೆ ಕನ್ನಡ ಪ್ರೇಕ್ಷಕರ ಕಡೆಯಿಂದ ಪ್ರೀತಿ ಸಿಕ್ಕಿದೆ. ಈ ಕಾರಣದಿಂದಲೇ ಇಪ್ಪತೈದರ ಸಂಭ್ರಮವನ್ನು ಚಿತ್ರತಂಡ ಎದುರುಗೊಳ್ಳುವಂತಾಗಿದೆ.

ಇದು ವಿನಯ್ ಬಾಲಾಜಿ ನಿರ್ದೇಶನದ ಚಿತ್ರ. ಅವರ ಪಾಲಿನ ಮೊದಲ ಪ್ರಯತ್ನವೂ ಹೌದು. ಆದರೆ ಸಸ್ಪೆನ್ಸ್ ಥ್ರಿಲ್ಲರ್ ಜಾನರಿನ ಈ ಕಥೆಯನ್ನವರು ರೂಪಿಸಿದ ರೀತಿಗೆ ಪ್ರೇಕ್ಷಕರು ಅತೀವ ಪ್ರೀತಿಯನ್ನೇ ತೋರಿಸಿದ್ದಾರೆ. ಇಂಥಾ ಸಕಾರಾತ್ಮಕ ಅಂಶಗಳೊಂದಿಗೆ ಹೌಸ್ ಫುಲ್ ಪ್ರದರ್ಶನ ಕಾಣುತ್ತಿದ್ದ ಈ ಸಿನಿಮಾಗೆ ಸಾಹೋ ಕಂಟಕದಂತೆ ಬಂದೆರಗಿತ್ತು. ಆದರೂ ಸಾವರಿಸಿಕೊಂಡು ನಿಂತ ಈ ಸಿನಿಮಾಗೆ ಆ ನಂತರದಲ್ಲಿ ಹೆಚ್ಚು ಹೆಚ್ಚು ಚಿತ್ರಮಂದಿರಗಳನ್ನು ಪಡೆದುಕೊಳ್ಳುತ್ತಾ, ಮತ್ತೆ ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಾ ಇದೀಗ ಇಪ್ಪತೈದನೇ ದಿನವನ್ನು ಸಮರ್ಥವಾಗಿ ದಾಟಿಕೊಂಡಿದೆ.

ಇದೀಗ ಕರ್ನಾಟಕದಲ್ಲಿ ಗೆಲುವು ಕಂಡಿರೋ ನನ್ನಪ್ರಕಾರ ವಿದೇಶಗಳಲ್ಲಿಯೂ ತೆರೆಕಾಣಲು ರೆಡಿಯಾಗಿದೆ. ಇದರೊಂದಿಗೇ ಹಿಂದಿಗೆ ಕೂಡಾ ರೀಮೇಕ್ ಆಗಲಿದೆಯಂತೆ. ಇದು ಕನ್ನಡ ಚಿತ್ರರಂಗದ ಘನತೆ ಮಿರುಗುವಂಥಾ ಸಂಗತಿ. ಬೇರೆ ಭಾಷೆಗಳಲ್ಲಿ ರೀಮೇಕ್ ಆಗುವಷ್ಟು ಚೆಂದದ ಕಥೆಯನ್ನೊಳಗೊಂಡಿರೋ ನನ್ನಪ್ರಕಾರ ಇಪ್ಪತೈದು ದಿನದಾಚೆಗೂ ಯಶಸ್ವಿ ಯಾನ ಕೈಗೊಂಡಿದೆ. ಈ ವರ್ಷದ ಸೂಪರ್ ಹಿಟ್ ಚಿತ್ರಗಳ ಸಾಲಿನಲ್ಲಿ ಸೇರ್ಪಡೆಯಾಗೋ ಹುಮ್ಮಸ್ಸಿನೊಂದಿಗೆ ಮುಂದವರೆಯುತ್ತಿದೆ.