ಮತ್ತೆ ಮದುವೆ ಎಂದ ನರೇಶ್-ಪವಿತ್ರಾ ಲೋಕೇಶ್

Team Udayavani, Mar 25, 2023, 3:28 PM IST

ಕೆಲ ತಿಂಗಳ ಹಿಂದಷ್ಟೇ ಮರು ಮದುವೆ ವಿಷಯಕ್ಕೆ ಸಂಬಂಧಿಸಿದಂತೆ, ನಟಿ ಪವಿತ್ರಾ ಲೋಕೇಶ್‌ ಮತ್ತು ನಟ ನರೇಶ್‌ ಹೆಸರುಗಳು ಕನ್ನಡ ಮತ್ತು ತೆಲುಗು ಚಿತ್ರರಂಗದಲ್ಲಿ ದೊಡ್ಡ ಸುದ್ದಿಯಾಗಿತ್ತು. ಸದ್ಯಕ್ಕೆ ಈ ಸುದ್ದಿ ತಣ್ಣಗಾಗಿರುವಂತೆಯೇ, ಪವಿತ್ರಾ ಲೋಕೇಶ್‌ ಮತ್ತು ನರೇಶ್‌ ಜೋಡಿಯಾಗಿ ಅಭಿ ನಯಿಸುತ್ತಿರುವ “ಮತ್ತೆ ಮದುವೆ’ ಸಿನಿಮಾ ಸುದ್ದಿಯಾಗುತ್ತಿದೆ.

ಹೌದು, ಪವಿತ್ರಾ ಲೋಕೇಶ್‌ ಮತ್ತು ನರೇಶ್‌ ಜೋಡಿ ಯಾಗಿ ಅಭಿನಯಿಸಿರುವ “ಮತ್ತೆ ಮದುವೆ’ ಸಿನಿಮಾದ ಫ‌ಸ್ಟ್‌ಲುಕ್‌ ಪೋಸ್ಟರ್‌ ಇದೀಗ ಬಿಡುಗಡೆಯಾಗಿದೆ.

“ವಿಜಯ ಕೃಷ್ಣ ಮೂವೀಸ್‌’ ಬ್ಯಾನರಿನಲ್ಲಿ ನರೇಶ್‌ ನಿರ್ಮಾಣ ಮಾಡಿರುವ ಈ ಚಿತ್ರಕ್ಕೆ ಎಂ. ಎಸ್‌ ರಾಜು ಕಥೆ ಚಿತ್ರಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ಈ ಸಿನಿಮಾ ನಿರ್ಮಾಣವಾಗಿದ್ದು, ಇದೇ ಏಪ್ರಿಲ್‌ ಅಥವಾ ಮೇ ವೇಳೆಗೆ ಸಿನಿಮಾವನ್ನು ಎರಡೂ ಭಾಷೆಗಳಲ್ಲೂ ತೆರೆಗೆ ತರುವ ಯೋಚನೆಯಲ್ಲಿದೆ ಚಿತ್ರತಂಡ.

ಅಂದಹಾಗೆ, “ಮತ್ತೆ ಮದುವೆ’ ಕಂಪ್ಲೀಟ್‌ ಫ್ಯಾಮಿಲಿ ಎಂಟರ್‌ಟೈನ್ಮೆಂಟ್‌ ಸಿನಿಮಾವಾಗಿದ್ದು ನರೇಶ್‌, ಪವಿತ್ರಾಲೋಕೇಶ್‌ ಜೊತೆಗೆ ಜಯಸುಧಾ, ಶರತ್‌ ಬಾಬು, ವನಿತಾ ವಿಜಯಕುಮಾರ್‌, ಅನನ್ಯಾ ನಾಗೆಲ್ಲ, ರೋಷನ್‌, ರವಿ ವರ್ಮ, ಅನ್ನಪೂರ್ಣ, ಭದ್ರಂ, ಯುಕ್ತ, ಪ್ರವೀಣ್‌ ಯಂಡ ಮುರಿ, ಮಧೂ ಮೊದಲಾದವರು ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.