ಕೆಂಪೇಗೌಡ-2 ಗೆ ನೀಲ್‌ ನಿತಿನ್‌ ಬರ್ತಾರಾ?

Team Udayavani, Jun 11, 2017, 11:35 AM IST

“ಕೆಂಪೇಗೌಡ-2′ ಆರಂಭವಾಗಿದ್ದು, ಅದರಲ್ಲಿ ಕೋಮಲ್‌ ಖಡಕ್‌ ಪೊಲೀಸ್‌ ಆಫೀಸರ್‌ ಆಗಿ ಕಾಣಿಸಿಕೊಳ್ಳುತ್ತಿರುವ ವಿಚಾರ ನಿಮಗೆ ಗೊತ್ತೇ ಇದೆ. “ಕೆಂಪೇಗೌಡ’ದಲ್ಲಿ ಸುದೀಪ್‌ ಎದುರು ಆರ್ಮುಗಂ ಆಗಿ ರವಿಶಂಕರ್‌ ಅಬ್ಬರಿಸಿದ್ದರು. ಈಗ “ಕೆಂಪೇಗೌಡ-2’ನಲ್ಲಿ ಕೋಮಲ್‌ ಎದುರು ಯಾರು ಕೈ ತಟ್ಟಿ ಆರ್ಭಟಿಸುತ್ತಾರೆಂಬ ಕುತೂಹಲ ಇದ್ದೇ ಇದೆ.

ಈ ಕುತೂಹಲದ ನಡುವೆಯೇ ಬಾಲಿವುಡ್‌ ನಟ ನೀಲ್‌ ನಿತಿನ್‌ ಮುಕೇಶ್‌ ಅವರ ಹೆಸರು ಕೇಳಿಬರುತ್ತಿದೆ. ಬಾಲಿವುಡ್‌ನ‌ಲ್ಲಿ ಬಿಝಿಯಾಗಿರುವ ನೀಲ್‌ ನಿತಿನ್‌ “ಕೆಂಪೇಗೌಡ-2’ನಲ್ಲಿ ವಿಲನ್‌ ಆಗಿ ನಟಿಸುತ್ತಾರೆಂಬ ಸುದ್ದಿಯಂತೂ ಹಬ್ಬಿದೆ. ಕೋಮಲ್‌ ಕೂಡಾ ಅವರು ನಟಿಸುವ ಸಾಧ್ಯತೆ ಇದೆ ಎನ್ನುತ್ತಾರೆ.

“ಈಗಾಗಲೇ ನಮ್ಮ ನಿರ್ದೇಶಕರು ಅವರಿಗೆ ಸ್ಕ್ರಿಪ್ಟ್ ಕಳಿಸಿ ಅವರ ಪಾತ್ರದ ಬಗ್ಗೆ ವಿವರಿಸಿದ್ದಾರೆ. ನೀಲ್‌ ನಿತಿನ್‌ ಕೂಡಾ ಪಾತ್ರದ ಬಗ್ಗೆ ಖುಷಿಯಾಗಿದ್ದಾರೆ. ಕಥೆ ಹಾಗೂ ಪಾತ್ರ ಅವರಿಗೆ ಓಕೆಯಾಗಿದೆ. ಇನ್ನು ದುಡ್ಡು, ಕಾಸಿನ ವಿಚಾರ ನನಗೆ ಗೊತ್ತಿಲ್ಲ. ಅದು ನಿರ್ಮಾಪಕರಿಗೆ ಬಿಟ್ಟಿದ್ದು’ ಎನ್ನುತ್ತಾರೆ ಕೋಮಲ್‌.

ಅಂದಹಾಗೆ, ಸದ್ಯ ನೀಲ್‌ ನಿತಿನ್‌ ಮುಕೇಶ್‌ ಪ್ರಭಾಸ್‌ ನಾಯಕರಾಗಿರುವ “ಸಾಹೋ’ ಸಿನಿಮಾದಲ್ಲಿ ವಿಲನ್‌ ಆಗಿ ನಟಿಸುತ್ತಿದ್ದು, ಈಗಾಗಲೇ ಚಿತ್ರೀಕರಣದಲ್ಲೂ ಭಾಗವಹಿಸಿದ್ದಾರೆ. “ಆ್ಯಂಡ್‌ ಇಟ್‌ ಬಿಗಿನ್ಸ್‌. ಡೇ ಒನ್‌ ಆಫ್ “ಸಾಹೋ’ ಎಂದು ಟ್ವೀಟ್‌ ಮಾಡುವ ಮೂಲಕ ತಾವು “ಸಾಹೋ’ ಸಿನಿಮಾದಲ್ಲಿ ನಟಿಸುತ್ತಿರುವುದನ್ನು ಅಧಿಕೃತವಾಗಿ ಘೋಷಿಸಿದ್ದಾರೆ ನೀಲ್‌.

ಇನ್ನು, ಈ ಬಿಝಿ ಶೆಡ್ನೂಲ್‌ನ ಮಧ್ಯೆ “ಕೆಂಪೇಗೌಡ-2′ ಚಿತ್ರದಲ್ಲಿ ನಟಿಸುತ್ತಾರಾ ಎಂಬ ಪ್ರಶ್ನೆಯಂತೂ ಎದ್ದಿದೆ.  “ಕೆಂಪೇಗೌಡ-2′ ಚಿತ್ರವನ್ನು ರೋಶನ್‌ ಮೋಹನ್‌ ನಿರ್ದೇಶನ ಮಾಡುತ್ತಿದ್ದು, ಈ ಹಿಂದೆ “ಕೆಂಪೇಗೌಡ’ ಚಿತ್ರ ನಿರ್ಮಿಸಿದ ಶಂಕರೇಗೌಡ ಅವರೇ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಅವರಿಗೆ ಈ ಬಾರಿ ಶಂಕರ್‌ ರೆಡ್ಡಿ ಕೂಡಾ ಸಾಥ್‌ ನೀಡುತ್ತಿದ್ದಾರೆ.