ಹೊಸ ಅನುಭವ

Team Udayavani, Jul 4, 2017, 10:39 AM IST

“ಸೆಕೆಂಡು ಬಕ್ಕೆಟ್ಟು ಬಾಲ್ಕನಿ’ ಚಿತ್ರ ನಿಂತು ಹೋದ ನಂತರ ಅರಸು ಅಂತಾರೆ, ಸತೀಶ್‌ ನೀನಾಸಂ ಅಭಿನಯದ “ಅನುಭವ’ ಎಂಬ ಚಿತ್ರವನ್ನು ನಿರ್ದೇಶಿಸುತ್ತಾರೆ ಎಂಬ ಸುದ್ದಿ ಇತ್ತು. ಇದು ಹೊಸ ಸುದ್ದಿಯೇನಲ್ಲ. ಎರಡು ವರ್ಷಗಳ ಹಿಂದೆಯೇ “ಅನುಭವ’ ಎಂಬ ಚಿತ್ರ ಮಾಡುವುದಾಗಿ ಘೋಷಿಸಿದ್ದರು ಅರಸು ಅಂತಾರೆ.

ಆದರೆ, ಚಿತ್ರ ಕಾರಣಾಂತರಗಳಿಂದ ಶುರುವಾಗಿರಲಿಲ್ಲ. ಈಗ ಚಿತ್ರ ಶುರುವಾಗುವುದಕ್ಕೆ ಮತ್ತೆ ವೇದಿಕೆ ಸಜ್ಜಾಯಿತು ಎನ್ನುವಷ್ಟರಲ್ಲಿ ನಿರ್ಭಯ್‌ ಚಕ್ರವರ್ತಿ ಎನ್ನುವವರು, “ಅನುಭವ’ ಎಂಬ ಟೈಟಲ್‌ ತಮ್ಮ ಬಳಿ ಇರುವುದಾಗಿ ಹೇಳಿಕೊಂಡಿದ್ದರು.

ಅರಸು ಮತ್ತು ನಿರ್ಭಯ್‌ ಇಬ್ಬರಲ್ಲಿ ಯಾರು “ಅನುಭವ’ವನ್ನು ಬಿಚ್ಚಿಡುತ್ತಾರೆ ಎಂಬ ಕುತೂಹಲ ಎಲ್ಲರಿಗೂ ಇರುವಾಗಲೇ, ಸದ್ದಿಲ್ಲದೆ “ಹೊಸ ಅನುಭವ’ ಎಂಬ ಚಿತ್ರವು ಇದೇ ತಿಂಗಳ 14ರಂದು ಬಿಡುಗಡೆಯಾಗುವುದಕ್ಕೆ ಸಜ್ಜಾಗಿದೆ. ಈ ಚಿತ್ರದಲ್ಲಿ ರಾಷ್ಟ್ರ ಪ್ರಶಸ್ತಿ ವಿಜೇತ ಸಂಚಾರಿ ವಿಜಯ್‌ ನಾಯಕನಾಗಿ ಅಭಿನಯಿಸಿದ್ದಾರೆ. ಜೊತೆಗೆ ಎಸ್‌. ನಾರಾಯಣ್‌, ಭವ್ಯ, ದಯಾಳ್‌, ಕೆಂಪೇಗೌಡ ಸೇರಿದಂತೆ ಹಲವರು ನಟಿಸಿದ್ದಾರೆ.

ಈ ಹೊಸ ಅನುಭವ ಚಿತ್ರವನ್ನು ನಿರ್ದೇಶಿಸಿರುವವರು ಹಿರಿಯ ನಿರ್ದೇಶಕ ಎಸ್‌. ಉಮೇಶ್‌. ಇನ್ನು ಚಿತ್ರಕ್ಕೆ ಕಥೆ, ಸಾಹಿತ್ಯ ಮತ್ತು ಸಂಭಾಷಣೆಯನ್ನು ರಚಿಸಿರುವುದು ಬಿ.ಆರ್‌. ರಮಣಪ್ಪ. ಚಿತ್ರಕ್ಕೆ ಜಿ.ವಿ. ರಮೇಶ್‌ ಅವರ ಛಾಯಾಗ್ರಹಣ ಮತ್ತು ಎ.ಟಿ. ರವೀಶ್‌ ಅವರ ಸಂಗೀತವಿದೆ.