ಸೆನ್ಸಾರ್‌ ಮುಂದೆ ಹೊಸಬರ ದಂಡು

Team Udayavani, Sep 23, 2020, 2:09 PM IST

ಲಾಕ್‌ಡೌನ್‌ ತೆರವಾದ ಬಳಿಕ ಸಾಲು ಸಾಲು ಸಿನಿಮಾಗಳು ತಮ್ಮ ಬಾಕಿ ಉಳಿದಿದ್ದ ಸಿನಿಮಾ ಕೆಲಸಗಳನ್ನು ಮುಗಿಸಿಕೊಂಡು ಸೆನ್ಸಾರ್‌ ಮುಂದೆ ಬಂದಿವೆ. ಇದರಲ್ಲಿ ಹೊಸಬರ ಸಂಖ್ಯೆಯೇ ಹೆಚ್ಚು.  ಬಹುತೇಕ ಹೊಸಬರ ಚಿತ್ರಗಳು ಸೆನ್ಸಾರ್‌ ಪಾಸ್‌ ಆಗಿ, ಬಿಡುಗಡೆಯ ಹಾದಿಯಲ್ಲಿವೆ.

ಒಮ್ಮೆ ಚಿತ್ರಮಂದಿರ ಓಪನ್‌ ಆದರೆ, ಮೊದಲು ಧೈರ್ಯ ಮಾಡೋದು ಹೊಸಬರು ಎಂದರೆ ತಪ್ಪಾಗಲಾರದು. ಅದೇ ಕಾರಣದಿಂದ ಸೆನ್ಸಾರ್‌ ಪಾಸ್‌ ಆಗಿ ಕಾಯುತ್ತಿದ್ದಾರೆ. ಚಿತ್ರಮಂದಿರ ಓಪನ್‌ ಆಗಿ ಪ್ರೇಕ್ಷಕ ಸಿನಿಮಾದತ್ತ ಬರಲು ಆರಂಭಿಸಿದ ಕೂಡಲೇ ಸಿನಿಮಾ ಬಿಡುಗಡೆ ಮಾಡಬೇಕೆಂಬ ಕಾತರ ಹೊಸಬರದು. ತಡ ಮಾಡುತ್ತಾ ಕುಳಿತರೆ ಸ್ಟಾರ್‌ಗಳ

ಸಿನಿಮಾ ಬಂದು ಬಿಡುತ್ತದೆ. ಒಮ್ಮೆ ಸ್ಟಾರ್‌ ಸಿನಿಮಾ ರಿಲೀಸ್‌ ಆರಂಭವಾದರೆ ಒಂದರ ಹಿಂದೊಂದರಂತೆ ಸಿನಿಮಾಗಳು ಬರಲಿದ್ದು, ಹೊಸಬರಿಗೆ ಅವಕಾಶ ಸಿಗೋದು ಕಷ್ಟ ಎಂಬುದು ಹೊಸಬರ ಲೆಕ್ಕಾಚಾರ.ಆ ಕಾರಣದಿಂದಲೇ ತಮ್ಮ ಕೆಲಸಗಳನ್ನು ಮುಗಿಸಿಕೊಂಡು ಹೊಸಬರು ರಿಲೀಸ್‌ಗೆ ಸಿದ್ದರಾಗಿದ್ದಾರೆ. ಈಗ ಈ ಸಾಲಿಗೆ “ಕ್ರಿಟಿಕಲ್‌ ಕೀರ್ತನೆಗಳು’ ಕೂಡಾ ಸೇರಿದೆ. ಈ ಹಿಂದೆ “ಕೆಮಿಸ್ಟ್ರಿ ಆಫ್ ಕರಿಯಪ್ಪ’ ಚಿತ್ರವನ್ನು ನಿರ್ದೇಶಿಸಿದ್ದ ಯುವ ನಿರ್ದೇಶಕ ಕುಮಾರ್‌ ಎಲ್‌. ಈ ಬಾರಿ “ಕ್ರಿಟಿಕಲ್‌ಕೀರ್ತನೆಗಳು’ ಎನ್ನುವ ಮತ್ತೂಂದು ಚಿತ್ರಕ್ಕೆ ಆ್ಯಕ್ಷನ್‌-ಕಟ್‌ ಹೇಳಿ ಪ್ರೇಕ್ಷಕರ ಮುಂದೆ ತರುವ ಸಿದ್ಧತೆಯಲ್ಲಿದ್ದಾರೆ. ಈಗಾಗಲೇ ತನ್ನ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳನ್ನು ಪೂರ್ಣಗೊಳಿಸಿ ಫ‌ಸ್ಟ್‌ಕಾಪಿಯೊಂದಿಗೆ ಹೊರಬಂದಿರುವ “ಕ್ರಿಟಿಕಲ್‌ ಕೀರ್ತನೆಗಳು’ ಸದ್ಯ ಸೆನ್ಸಾರ್‌ ಮುಂದಿದೆ.

“ಕೇಸರಿ ಫಿಲಂ ಕ್ಯಾಪcರ್‌’ ಬ್ಯಾನರ್‌ ಅಡಿಯಲ್ಲಿ ನಿರ್ಮಾಣವಾರುವ “ಕ್ರಿಟಿಕಲ್‌ ಕೀರ್ತನೆಗಳು’ ಚಿತ್ರಕ್ಕೆ ಕುಮಾರ್‌ ಎಲ್‌. ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶಿಸಿದ್ದಾರೆ. ಚಿತ್ರಕ್ಕೆ ಶಿವಸೇನ ಮತ್ತು ಶಿವಶಂಕರ್‌ ಛಾಯಾಗ್ರಹಣವಿದೆ. ಚಿತ್ರದ ಮೂರು ಹಾಡುಗಳಿಗೆ ವೀರ್‌ ಸಮರ್ಥ್ ಸಂಗೀತ ಸಂಯೋಜಿಸಿದ್ದಾರೆ. ಐಪಿಎಲ್‌ ಬೆಟ್ಟಿಂಗ್‌ನ ವಿಷಯಕ್ಕೆ ಸಂಬಂಧಿಸಿದ ನೈಜ ಘಟನೆ ಆಧಾರಿಸಿದ ಈ ಚಿತ್ರ ಸಂಪೂರ್ಣ ಹಾಸ್ಯಮಯವಾಗಿ ಮೂಡಿಬಂದಿದೆ.

ತಬಲ ನಾಣಿ, ಸುಚೀಂದ್ರ ಪ್ರಸಾದ್‌, ರಾಜೇಶ್‌ ನಟರಂಗ, ತರಂಗ ವಿಶ್ವ, ಅಪೂರ್ವಾ, ಅಪೂರ್ವಾ ಭಾರದ್ವಾಜ್‌, ಅರುಣಾ ಬಾಲರಾಜ್‌, ಧರ್ಮ, ದಿನೇಶ್‌ ಮಂಗಳೂರು, ರಘು ಪಾಂಡೇಶ್ವರ, ಯಶಸ್‌ ಅಭಿ, ದೀಪಾ, ಗುರುರಾಜ ಹೊಸಕೋಟೆ, ಮಾಸ್ಟರ್‌ ಮಹೇಂದ್ರ, ಮಾಸ್ಟರ್‌ ಪುಟ್ಟರಾಜು, ಯಶ್ವಂತ್‌ ಶೆಟ್ಟಿ ಮೊದಲಾದವರು “ಕ್ರಿಟಿಕಲ್‌ ಕೀರ್ತನೆಗಳು’ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಬೆಂಗಳೂರು , ಕುಂದಾಪುರ, ಮಂಡ್ಯ, ಬೆಳಗಾವಿ ಸುತ್ತಮುತ್ತ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ. ಎಲ್ಲ ಅಂದುಕೊಂಡಂತೆ ನಡೆದರೆಇದೇ ಅಕ್ಟೋಬರ್‌ಕೊನೆಗೆ “ಕ್ರಿಟಿಕಲ್‌ಕೀರ್ತನೆಗಳು’ ಚಿತ್ರವನ್ನು ಪ್ರೇಕ್ಷಕರ ಮುಂದೆ ತರುವ ಯೋಚನೆಯಲ್ಲಿದೆ ಚಿತ್ರತಂಡ.