ಹೊಸಬರ “5 ಅಡಿ 7 ಅಂಗುಲ’ ತೆರೆಗೆ ಸಿದ್ಧ

Team Udayavani, Jan 29, 2020, 7:00 AM IST

ಬಹುತೇಕ ಹೊಸ ಪ್ರತಿಭೆಗಳೆ ಸೇರಿ ನಿರ್ಮಿಸಿರುವ “5 ಅಡಿ 7 ಅಂಗುಲ’ ಚಿತ್ರ ತೆರೆಗೆ ಬರೋದಕ್ಕೆ ತಯಾರಾಗಿದೆ. ಸದ್ಯ ಬಹುತೇಕ ತನ್ನ ಕೆಲಸಗಳನ್ನು ಪೂರ್ಣಗೊಳಿಸಿ ಫ‌ಸ್ಟ್‌ ಕಾಪಿಯೊಂದಿಗೆ ಹೊರಬಂದಿರುವ “5 ಅಡಿ 7 ಅಂಗುಲ’ ಚಿತ್ರವನ್ನು ಇತ್ತೀಚೆಗೆ ವೀಕ್ಷಿಸಿದ ಪ್ರಾದೇಶಿಕ ಸೆನ್ಸಾರ್‌ ಮಂಡಳಿ ಚಿತ್ರಕ್ಕೆ “ಯು/ಎ’ ಸರ್ಟಿಫಿಕೆಟ್‌ ನೀಡಿ, ಬಿಡುಗಡೆಗೆ ಗ್ರೀನ್‌ ಸಿಗ್ನಲ್‌ ಕೊಟ್ಟಿದೆ.

“ಬಿಯಾನ್‌ ಡ್ರೀಮ್ಸ್‌ ಕ್ರಿಯೇಷನ್ಸ್‌’ ಬ್ಯಾನರ್‌ನಲ್ಲಿ ನಂದಳಿಕೆ ನಿತ್ಯಾನಂದ ಪ್ರಭು ಕಥೆ ಬರೆದು ನಿರ್ದೇಶಿಸಿರುವ ಚೊಚ್ಚಲ ಚಿತ್ರ “5 ಅಡಿ 7 ಅಂಗುಲ’ಕ್ಕೆ ರುದ್ರಮುನಿ ಬೆಳೆಗೆರೆ ಛಾಯಾಗ್ರಹಣ, ಬಿ.ಎಸ್‌ ಕೆಂಪರಾಜು ಸಂಕಲನ ಕಾರ್ಯವಿದೆ. ಚಿತ್ರದ ಹಾಡುಗಳಿಗೆ ರಘುತಾಣೆ, ಆರ್‌.ಎಸ್‌.ಗಣೇಶ್‌ ಸಂಗೀತ ಸಂಯೋಜಿಸಿದ್ದಾರೆ.

ಸಸ್ಪೆನ್ಸ್‌-ಥ್ರಿಲ್ಲರ್‌ ಕಥಾಹಂದರ ಹೊಂದಿರುವ “5 ಅಡಿ 7 ಅಂಗುಲ’ ಚಿತ್ರವನ್ನು ಬೆಂಗಳೂರು, ನೆಲಮಂಗಲ, ತಡಿಯಾಂಡಮೌಳ್‌, ಶುಂಟಿಕೊಪ್ಪ, ಮಡಿಕೇರಿ ಮುಂತಾದ ಕಡೆಗಳಲ್ಲಿ ಚಿತ್ರೀಕರಿಸಲಾಗಿದೆ. ನವ ಪ್ರತಿಭೆಗಳಾದ ರಾಸಿಕ್‌ಕುಮಾರ್‌, ಭುವನ್‌, ಅದಿತಿ ಚಿತ್ರದ ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸಿದ್ದಾರೆ.

ಉಳಿದಂತೆ ವೀಣಾ ಸುಂದರ್‌, ಸತ್ಯನಾಥ್‌, ಪ್ರಣವ ಮೂರ್ತಿ, ಚಕ್ರವರ್ತಿ, ಮಹದೇವ್‌, ಪವನ್‌ ಕುಮಾರ್‌, ಸಂತೋಷ್‌, ವೆಂಕಟ್‌, ಶ್ರೀಶ ಭಾರದ್ವಾಜ್‌, ನವೀನ್‌, ಕಿಶೋರ್‌, ಕುಶಾಲ್‌ ರಾಜ್‌, ಮದನ್‌ ರಾಜ್‌, ಮಾಸ್ಟರ್‌ ನಾಗೇಂದ್ರ ಪ್ರಸಾದ್‌ ಮುಂತಾದವರು ಚಿತ್ರದ ಇತರೆ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿ ಕೊಂಡಿದ್ದಾರೆ. ಸದ್ಯ ನಿಧಾನವಾಗಿ ಚಿತ್ರದ ಪ್ರಚಾರ ಕಾರ್ಯಗಳಿಗೆ ಸಿದ್ಧತೆ ಮಾಡಿಕೊಳ್ಳುತ್ತಿರುವ ಚಿತ್ರತಂಡ, ಫೆಬ್ರವರಿ ವೇಳೆಗೆ ಚಿತ್ರವನ್ನು ಪ್ರೇಕ್ಷಕರ ಮುಂದೆ ತರುವ ಯೋಚನೆಯಲ್ಲಿದೆ.