ಪಟ್ಟು ಹಾಕುವ ಪೈಲ್ವಾನ್ ಬಂದ ; ಟ್ರೈಲರ್ ನಲ್ಲಿ ಸುದೀಪ್ ರಾಕಿಂಗ್

Team Udayavani, Aug 22, 2019, 10:13 PM IST

‘ಬಲ ಇದೆ ಅಂತ ಹೊಡೆದಾಡೋನು ರೌಡಿ, ಬಲವಾದ ಕಾರಣಕ್ಕೆ ಹೊಡೆದಾಡೋನು ಯೋಧ’ ಎಂಬ ಸಾಲಿನೊಂದಿಗೆ ಪ್ರಾರಂಭವಾಗುವ ‘ಪೈಲ್ವಾನ್’ ಚಿತ್ರದ ಟ್ರೈಲರ್ ಇದೀಗ ಕಿಚ್ಚನ ಅಭಿಮಾನಿಗಳಲ್ಲಿ ನಿರೀಕ್ಷೆಯ ಕಿಚ್ಚನ್ನು ಹೆಚ್ಚಿಸಿದೆ.

ಅಭಿನಯ ಚಕ್ರವರ್ತಿ ಮೊಟ್ಟಮೊದಲ ಬಾರಿಗೆ ಪೈಲ್ವಾನ್ ಪಾತ್ರದಲ್ಲಿ ಅಭಿನಯಿಸುತ್ತಿದ್ದು ಈ ಚಿತ್ರದ ಪಾತ್ರಕ್ಕಾಗಿ ಕಿಚ್ಚ ತನ್ನ ದೇಹವನ್ನು ಸಾಮು ಮಾಡಿ ಹುರಿಗೊಳಿಸಿದ್ದಾರೆ. ಅದರ ಫಲಿತಾಂಶ ಈ ಚಿತ್ರದ ಟ್ರೈಲರ್ ನಲ್ಲಿ ಭರ್ಜರಿಯಾಗಿಯೇ ಕಾಣಿಸುತ್ತಿದೆ.

ಪೈಲ್ವಾನ್ ಚಿತ್ರದ ಕಥೆ ಏನಿರಬಹುದೆಂಬ ಕುತೂಹಲ ಈ ಟ್ರೈಲರ್ ನೋಡುವವರಲ್ಲಿ ಮೂಡುತ್ತದೆ. ಪಕ್ಕಾ ಗ್ರಾಮೀಣ ಸೊಗಡು ಮತ್ತು ವೃತ್ತಿಪರ ಬಾಕ್ಸಿಂಗ್ ಕಾದಾಟದ ಹಿಂಟ್ ಅನ್ನು ಟ್ರೈಲರ್ ನಲ್ಲಿ ನೀಡಿರುವುದು ಸುದೀಪ್ ಅಭಿಮಾನಿಗಳನ್ನು ಕುತೂಹಲಕ್ಕೀಡು ಮಾಡಿದೆ.

ಬಾಲಿವುಡ್ ಸ್ಟಾರ್ ಸುನಿಲ್ ಶೆಟ್ಟಿ ಅವರ ದೇಸೀ ಲುಕ್ ಗಮನ ಸೆಳೆಯುತ್ತದೆ. ಈ ಚಿತ್ರದಲ್ಲಿ ಶೆಟ್ರಿಗೆ ಒಂದು ಜಬರ್ದಸ್ತ್ ಪಾತ್ರವಿರುವುದಂತೂ ನಿಜ. ಚಂದನವನದ ಬಹುನಿರೀಕ್ಷಿತ ಚಿತ್ರ ಪೈಲ್ವಾನ್ ಮುಂದಿನ ತಿಂಗಳು 12ನೇ ತಾರೀಖಿಗೆ ವಿಶ್ವಾದ್ಯಂತ ಬಿಡುಗಡೆಗೊಳ್ಳುತ್ತಿದೆ.

ಸುದೀಪ್ ಅವರಿಗೆ ನಾಯಕಿಯಾಗಿ ಆಕಾಂಕ್ಷಾ ಸಿಂಗ್ ಕಾಣಿಸಿಕೊಂಡಿದ್ದಾರೆ. ಇನ್ನುಳಿದಂತೆ ಸುನಿಲ್ ಶೆಟ್ಟಿ, ಸುಶಾಂತ್ ಸಿಂಗ್, ಕಬೀರ್ ದುಹಾನ್ ಸಿಂಗ್, ಶರತ್ ಲೋಹಿತಾಶ್ವ ಸೇರಿದಂತೆ ಹೆಸರಾಂತ ನಟ-ನಟಿಯರ ದಂಡೇ ಪೈಲ್ವಾನ್ ನಲ್ಲಿದೆ.

ಶುಕ್ರವಾರ ಬಿಡುಗಡೆಗೊಂಡಿರುವ ಪೈಲ್ವಾನ್ ಟ್ರೈಲರ್ ಯೂ-ಟ್ಯೂಬ್ ನಲ್ಲಿ ಈಗಾಗಲೇ ಒಂಭತ್ತು ಲಕ್ಷ ವೀಕ್ಷಣೆಗೆ ಒಳಪಟ್ಟಿದೆ.