Kannada Movie: ಚಿತ್ರ ಕಲಾವಿದನ ಸುತ್ತ ಪರಿಸ್ಥಿತಿ

Team Udayavani, Dec 2, 2024, 7:10 PM IST

ಬಹುತೇಕ ಹೊಸಬರ ತಂಡವೊಂದು ಕಂಟೆಂಟ್‌ ಆಧರಿಸಿ “ಪರಿಸ್ಥಿತಿ” ಸಿನಿಮಾ ನಿರ್ಮಿಸಿದ್ದು, ಇತ್ತೀಚೆಗಷ್ಟೇ ತೆರೆ ಕಂಡಿದೆ.

ಚಿತ್ರ ಬಿಡಿಸುವ ಕಲಾವಿದನ ಜೀವನ, ವೃತ್ತಿ ಕುರಿತ “ಪರಿಸ್ಥಿತಿ’ಯನ್ನು ಎಳೆ ಎಳೆಯಾಗಿ ವಿವರಿಸಲಾಗಿದೆ. ಗಣೇಶ್‌ ನಾರಾಯಣ ಅವರು ಈ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿರುವುದರ ಜೊತೆಗೆ ನಾಯಕನಾಗಿ ಅಭಿನಯಿಸಿದ್ದಾರೆ.

ಸಂಗೀತ ನಿರ್ದೇಶನ ಕೂಡ ಅವರದ್ದೇ ಆಗಿದೆ. ಚಿತ್ರ ಕಲಾವಿದನಿಗೆ ಅತ್ಯುತ್ತಮ ಪ್ರತಿಭೆ ಇದ್ದರೂ ಸಂಸಾರಿಕ ಜೀವನ ತ್ಯಜಿಸುವುದು, ರಸ್ತೆಯಲ್ಲಿ ಭಿಕ್ಷೆ ಬೇಡುವುದು, ಅವಕಾಶ ದೊರೆತು ವೃತ್ತಿಯಲ್ಲಿ ಏಳಿಗೆ ಕಂಡಾಗ ಏನಾಗುತ್ತದೆ ಎಂಬುದು ಚಿತ್ರದ ತಿರುಳು. ಎಂಸಿಎಂ ಆರಾಧ್ಯ ನಿರ್ಮಾಪಕರಾಗಿರುವ ಈ ಚಿತ್ರಕ್ಕೆ ಗೌತಮ್‌ ಮನು ಛಾಯಾಗ್ರಹಣ ವಿದ್ದು, ನಮೃತಾ, ಅಜಿತ್‌ ಕುಮಾರ್‌ ಮತ್ತಿತರರು ತಾರಾಗಣದಲ್ಲಿದ್ದಾರೆ.

ಎಲ್ಲ ವಯೋಮಾನದವರು ನೋಡಬಹುದಾದ ಈ ಸಿನಿಮಾ ನ.22ರಂದು ತೆರೆ ಕಂಡಿದ್ದು, ಪ್ರೇಕ್ಷಕರಿಂದ ಉತ್ತಮ ಸ್ಪಂದನೆ ವ್ಯಕ್ತವಾಗುತ್ತಿದೆ ಎನ್ನುತ್ತಾರೆ ನಿರ್ದೇಶಕರು.