ಏಳು ವರ್ಷಗಳ ನಂತರ ಪೆಟ್ರೋಮ್ಯಾಕ್ಸ್‌ಗೆ ಮರುಜೀವ

Team Udayavani, Sep 30, 2020, 3:56 PM IST

ಪೆಟ್ರೋಮ್ಯಾಕ್ಸ್‌- ಹೀಗೊಂದು ಸಿನಿಮಾದ ಹೆಸರನ್ನು ನೀವು ಐದಾರು ವರ್ಷಗಳ ಹಿಂದೆ ಕೇಳಿರಬಹುದು. ನೀನಾಸಂ ಸತೀಶ್‌ ನಾಯಕರಾಗಿರುವ ಈ ಚಿತ್ರಕ್ಕೆ ಮುಹೂರ್ತ ನಡೆದಿತ್ತು. ವಿಜಯ ಪ್ರಸಾದ್‌ ನಿರ್ದೇಶನದಲ್ಲಿ ಈ ಚಿತ್ರ ಮೂಡಿಬರುವುದಾಗಿ ಹೇಳಲಾಗಿತ್ತು ಕೂಡಾ. ಆದರೆ ಅದೇನಾಯಿತೋ ಏನೋ, ಆ ನಂತರ ಆ ಚಿತ್ರ ಮುಂದುವರೆಯಲೇ ಇಲ್ಲ. ಸತೀಶ್‌ ಹಾಗೂ ವಿಜಯ ಪ್ರಸಾದ್‌ ಬೇರೆ ಬೇರೆ ಚಿತ್ರಗಳಲ್ಲಿ ಬಿಝಿಯಾದರು.

ಈಗ ಮತ್ತೆ “ಪೆಟ್ರೋಮ್ಯಾಕ್ಸ್‌’ಗೆ ಜೀವ ಬಂದಿದೆ. ವಿಜಯ ಪ್ರಸಾದ್‌ ಹಾಗೂ ಸತೀಶ್‌ ಕಾಂಬಿನೇಶನ್‌ನಲ್ಲಿ ಮೂಡಿಬರುತ್ತಿರುವ ಈ ಚಿತ್ರ ಅಕ್ಟೋಬರ್‌ನಲ್ಲಿ ಸೆಟ್ಟೇರಲಿದೆ. ಐದಾರು ವರ್ಷಗಳ ಹಿಂದೆ ಮಾಡಿಕೊಂಡ ಕಥೆಯಲ್ಲಿ ಏನಾದರೂ ಬದಲಾವಣೆಯಾಗಿದೆಯೇ ಎಂದರೆ, ಖಂಡಿತಾ ಆಗಿದೆ ಎಂಬ ಉತ್ತರ ಚಿತ್ರತಂಡದಿಂದ ಬರುತ್ತದೆ. ಟೈಟಲ್‌ ಬಿಟ್ಟು, ಮಿಕ್ಕಂತೆ ಎಲ್ಲವನ್ನೂ ಚಿತ್ರತಂಡ ಬದಲಾವಣೆ ಮಾಡಿಕೊಂಡಿದೆ. ಇ

ಷ್ಟು ವರ್ಷಗಳಲ್ಲಿ ನೀನಾಸಂ ಸತೀಶ್‌ ಬೆಳೆದ ರೀತಿ, ಅವರ ಇಮೇಜ್‌ ಸೇರಿದಂತೆ ಹಲವು ಅಂಶಗಳನ್ನು ಗಮನದಲ್ಲಿಟ್ಟುಕೊಂಡು ಕಥೆಯಲ್ಲಿ ಬದಲಾವಣೆ ಮಾಡಲಾಗಿದೆಯಂತೆ. ಪೆಟ್ರೋಮ್ಯಾಕ್ಸ್‌ನಲ್ಲಿ ನಾಲ್ಕು ಅನಾಥ ಹುಡುಗರ ಕಥೆಯನ್ನು ಹೇಳಲು ವಿಜಯ ಪ್ರಸಾದ್‌ ಹೊರಟಿದ್ದಾರೆ. ಚಿತ್ರದಲ್ಲಿ ಸತೀಶ್‌ ಜೊತೆಗೆ “ಗೊಂಬೆಗಳ ಲವ್‌’ ಖ್ಯಾತಿಯ ಅರುಣ್‌, ನಾಗಭೂಷಣ್‌ಕೂಡಾ ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ. ಚಿತ್ರದಲ್ಲೊಂದು ಸಂದೇಶದ ಜೊತೆಗೆ ಸಖತ್‌ ಫ‌ನ್ನಿ ಅಂಶಗಳೊಂದಿಗೆ ಸಾಗುತ್ತದೆಯಂತೆ.

ಅದಿತಿ ನಾಯಕಿ ಅಲ್ಲ: “ಪೆಟ್ರೋಮ್ಯಾಕ್ಸ್‌’ ಚಿತ್ರಕ್ಕೆ ಅದಿತಿ ನಾಯಕಿ ಎಂದು ಆರಂಭದಲ್ಲಿ ಹೇಳಲಾಗಿತ್ತು. ಆದರೆ, ಅದಿತಿ ಆ ಚಿತ್ರದಲ್ಲಿ ನಟಿಸುತ್ತಿಲ್ಲ. ಅದಿತಿ ಬೇರೆ ಚಿತ್ರಗಳಲ್ಲಿ ಬಿಝಿಯಾಗಿರುವುದರಿಂದ ಚಿತ್ರತಂಡ ಈಗ ಬೇರೆ ನಾಯಕಿಯ ತಲಾಶ್‌ನಲ್ಲಿದೆ.