ಓಂ ಪ್ರಕಾಶ್ ರಾವ್ ‘ಫಿನಿಕ್ಸ್’ ಗೆ ನಿಮಿಕಾ ರತ್ನಾಕರ್ ನಾಯಕಿ

Team Udayavani, Aug 1, 2023, 3:02 PM IST

phoenix movie; Nimika Ratnakar is in the lead role

ಕನ್ನಡ ಚಿತ್ರರಂಗಕ್ಕೆ ಸಾಕಷ್ಟು ಸೂಪರ್‌ಹಿಟ್‌ ಆ್ಯಕ್ಷನ್‌ ಸಿನಿಮಾಗಳನ್ನು ನೀಡಿರುವ ನಿರ್ದೇಶಕ ಓಂ ಪ್ರಕಾಶ್‌ ರಾವ್‌, ಈಗ ಸದ್ದಿಲ್ಲದೆ “ಫಿನಿಕ್ಸ್‌’ ಎಂಬ ಹೊಸ ಸಿನಿಮಾಕ್ಕೆ ತಯಾರಿ ಆರಂಭಿಸಿದ್ದಾರೆ.

ಹೌದು, ಓಂ ಪ್ರಕಾಶ್‌ ರಾವ್‌ ನಿರ್ದೇಶನದ 49ನೇ ಸಿನಿಮಾ ಇದಾಗಿದ್ದು, “ಶ್ರೀಗುರು ಚಿತ್ರಾಲಯ’ ಬ್ಯಾನರ್‌ನಲ್ಲಿ ತ್ರಿಷಾ ಪ್ರಕಾಶ್‌ ಈ ಸಿನಿಮಾಕ್ಕೆ ಬಂಡವಾಳ ಹೂಡಿ ನಿರ್ಮಾಣ ಮಾಡುತ್ತಿದ್ದಾರೆ. ಈಗಾಗಲೇ “ಫಿನಿಕ್ಸ್‌’ ಸಿನಿಮಾದ ಬಹುತೇಕ ಪ್ರೀ-ಪ್ರೊಡಕ್ಷನ್‌ ಕೆಲಸಗಳನ್ನು ಪೂರ್ಣಗೊಳಿಸಿರುವ ಓಂ ಪ್ರಕಾಶ್‌ ರಾವ್‌ ಮತ್ತು ಚಿತ್ರತಂಡ, ಇದೇ ಆಗಸ್ಟ್‌ ತಿಂಗಳಿನಲ್ಲಿ ಸಿನಿಮಾದ ಚಿತ್ರೀಕರಣ ಆರಂಭಿಸುವ ಯೋಜನೆ ಹಾಕಿಕೊಂಡಿದೆ.

ಇನ್ನು “ಫಿನಿಕ್ಸ್‌’ ಔಟ್‌ ಆ್ಯಂಡ್‌ ಔಟ್‌ ಮಹಿಳಾ ಪ್ರಧಾನ ಕಥಾಹಂದರದ ಸಿನಿಮಾವಾಗಿದ್ದು, ಜೊತೆಗೆ ಆ್ಯಕ್ಷನ್‌-ಥ್ರಿಲ್ಲರ್‌ ಅಂಶಗಳು ಸಿನಿಮಾದಲ್ಲಿದೆ. ನಿಮಿಕಾ ರತ್ನಾಕರ್‌, ಶಿಲ್ಪಾ ಶೆಟ್ಟಿ ಹಾಗೂ ಕೃತಿಕಾ ಲೋಬೊ ಮೂವರು ನಾಯಕಿಯರಾಗಿ ಮತ್ತು ಜಗದೀಶ್‌, ಭಾಸ್ಕರ್‌ ಶೆಟ್ಟಿ ಮತ್ತು ಪ್ರತಾಪ್‌ ನಾಯಕರಾಗಿ ಕಾಣಿಸಿಕೊಳ್ಳಲಿದ್ದಾರೆ. ಉಳಿದಂತೆ ಕಿನ್ನಿ ವಿನೋದ್‌, ಪ್ರದೀಪ್‌ ರಾಹುತ್‌, ಸ್ವಸ್ತಿಕ್‌ ಶಂಕರ್‌, ಅನಿಲ್‌ ಕುಮಾರ್‌ ಮುಂತಾದವರು ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭನಯಿಸುತ್ತಿದ್ದಾರೆ.

ಕಮರ್ಷಿಯಲ್‌ ಸಿನಿಮಾದಲ್ಲಿ ಇರಬಹುದಾದ ಎಲ್ಲ ಥರದ ಎಂಟರ್‌ಟೈನ್ಮೆಂಟ್‌ ಈ ಸಿನಿಮಾದಲ್ಲಿ ಇರಲಿದೆ. ಆಗಸ್ಟ್ ನಲ್ಲಿ ಚಿತ್ರೀಕರಣ ಶುರುವಾಗಲಿದ್ದು, ಮೊದಲ ಹಂತದಲ್ಲಿ ಬೆಂಗಳೂರು ಆನಂತರ ಜರ್ಮನ್‌ ಹಾಗೂ ಆಸ್ಟ್ರಿಯಾದಲ್ಲಿ ಚಿತ್ರೀಕರಣ ನಡೆಯಲಿದೆ ಎಂಬುದು ಎಂದು ನಿರ್ದೇಶಕ ಓಂಪ್ರಕಾಶ್‌ ರಾವ್‌ ಮತ್ತು ಚಿತ್ರತಂಡ ನೀಡಿರುವ ಮಾಹಿತಿ.

“ಫಿನಿಕ್ಸ್‌’ ಸಿನಿಮಾಕ್ಕೆ ಸುಬ್ರಹ್ಮಣಿ ಕಥೆ, ಚಿತ್ರಕಥೆ, ಎಂ. ಎಸ್‌ ರಮೇಶ್‌ ಸಂಭಾಷಣೆ ಬರೆಯುತ್ತಿದ್ದಾರೆ. ಚಿತ್ರದ ಹಾಡುಗಳಿಗೆ ಸಾಧುಕೋಕಿಲ ಸಂಗೀತ ಸಂಯೋಜಿಸಿದ್ದು, ರವಿಕುಮಾರ್‌ ಛಾಯಾಗ್ರಹಣ, ಲಕ್ಷ್ಮಣ್‌ ರೆಡ್ಡಿ ಸಂಕಲನವಿದೆ. ಇತ್ತೀಚಿಗೆ ನಿರ್ದೇಶಕ ಓಂ ಪ್ರಕಾಶ್‌ ರಾವ್‌ ಹಾಗೂ ನಾಯಕಿ ನಿಮಿಕಾ ಅವರ ಹುಟ್ಟುಹಬ್ಬದಂದು “ಫಿನಿಕ್ಸ್‌’ ಸಿನಿಮಾದ ಮೊದಲ ಟೈಟಲ್‌ ಪೋಸ್ಟರ್‌ ಬಿಡುಗಡೆಯಾಗಿದೆ.