ಚಿರು ನಿಧನದ ಬೆನ್ನಲ್ಲೇ “ಸಲಗಾ” ಸಿನಿಮಾ ನಟ ಸುಶೀಲ್ ಆತ್ಮಹತ್ಯೆಗೆ ಶರಣು; ವಿಜಿ ಕಂಬನಿ

Team Udayavani, Jul 8, 2020, 6:02 PM IST

ಬೆಂಗಳೂರು: ಇತ್ತೀಚೆಗಷ್ಟೇ ಸ್ಯಾಂಡಲ್ ವುಡ್ ಯುವ ಪ್ರತಿಭೆ, ಖ್ಯಾತ ನಟ ಚಿರಂಜೀವಿ ಸರ್ಜಾ ಅಕಾಲಿಕ ಸಾವನ್ನಪ್ಪಿದ್ದ ಘಟನೆ ಚಿತ್ರಪ್ರೇಮಿಗಳ ನೆನಪಿನಿಂದ ಮಾಸುವ ಮುನ್ನವೇ ಇದೀಗ ಕನ್ನಡ ಚಿತ್ರರಂಗದ ಮತ್ತೊಂದು ಯುವ ಪ್ರತಿಭೆ ಸುಶೀಲ್ ಗೌಡ(30ವರ್ಷ) ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ನಡೆದಿದೆ.

ನಟನೆ ಜತೆಗೆ ಫಿಟ್ನೆಸ್ ಟ್ರೈನರ್ ಆಗಿದ್ದ ಸುಶೀಲ್ ಅವರು ಆತ್ಮಹತ್ಯೆಗೆ ಶರಣಾಗಿರುವುದು ಅವರ ಅಭಿಮಾನಿಗಳು ಮತ್ತು ಆಪ್ತರಿಗೆ ಆಘಾತಕಾರಿ ವಿಷಯವಾಗಿದೆ. ಅಕಾಲಿಕ ನಿಧನದ ಬಗ್ಗೆ ಸುಶೀಲ್ ಮೊದಲ ಟಿವಿ ಶೋ ಅಂತಃಪುರ ನಿರ್ದೇಶಕ ಅರವಿಂದ್ ಕೌಶಿಕ್ ಫೇಸ್ ಬುಕ್ ನಲ್ಲಿ ಪೋಸ್ಟ್ ಹಾಕಿದ್ದು, ನಾನು ದುಃಖಕರ ವಿಷಯ ಹಂಚಿಕೊಳ್ಳುತ್ತಿದ್ದೇನೆ. ನಾನು ನಿರ್ದೇಶಿಸಿದ್ದ ಅಂತಃಪುರ ಟಿವಿ ಸೀರಿಯಲ್ ಲೀಡ್ ರೋಲ್ ನಿರ್ವಹಿಸಿದ್ದ ಸುಶೀಲ್ ವಿಧಿವಶರಾಗಿದ್ದಾರೆ ಎಂದು ಉಲ್ಲೇಖಿಸಿದ್ದರು.

ಮತ್ತೊಂದೆಡೆ ದುನಿಯಾ ವಿಜಯ್ ಮತ್ತು ಸಂಜನಾ ಅಭಿನಯದ ಸಲಗಾ ಸಿನಿಮಾದಲ್ಲಿ ಸುಶೀಲ್ ಅಭಿನಯಿಸಿದ್ದರು. ಅವರ ಸಾವಿನ ವಿಚಾರವನ್ನು ವಿಜಿ ಕೂಡಾ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಕಂಬನಿ ಮಿಡಿದಿದ್ದಾರೆ. ಸಲಗ ಚಿತ್ರದಲ್ಲಿನ ಸುಶೀಲ್ ಪಾತ್ರ, ಇಂಡಸ್ಟ್ರೀಯಲ್ಲಿ ಬೆಳೆಯುತ್ತಿರುವ ಉದಯೋನ್ಮುಖ ನಟನ ಬಗ್ಗೆ ವಿಜಿ ಫೇಸ್ ಬುಕ್ ನಲ್ಲಿ ಮನದಾಳದ ಮಾತನ್ನು ಹಂಚಿಕೊಂಡಿದ್ದಾರೆ.

ಸುಶೀಲ್ ಗೌಡ ಅವರು ಯಾವ ಕಾರಣಕ್ಕಾಗಿ ಮಂಡ್ಯದ ಇಂಡವಾಳು ಗ್ರಾಮದಲ್ಲಿರುವ ತನ್ನ ಸ್ನೇಹಿತನ ಮನೆಯಲ್ಲಿ ಆತ್ಮಹತ್ಯೆಗೆ ಶರಣಾದರು ಎಂಬ ಬಗ್ಗೆ ಹೆಚ್ಚಿನ ಮಾಹಿತಿ ಲಭ್ಯವಾಗಿಲ್ಲ. ಚಿತ್ರರಂಗದ ಹಲವಾರು ಗಣ್ಯರು ಸುಶೀಲ್ ನಿಧನಕ್ಕೆ ಸಂತಾಪ ವ್ಯಕ್ತಪಡಿಸಿದ್ದಾರೆ. ಸುಶೀಲ್ ಆತ್ಮಹತ್ಯೆಗೆ ಏನು ಕಾರಣ ಎಂಬುದು ಪೊಲೀಸ್ ತನಿಖೆಯಿಂದ ಬಹಿರಂಗವಾಗಬೇಕಿದೆ.