ಪುನೀತ್‌ ಬರ್ತ್‌ಡೇ ಸಾಂಗ್‌

Team Udayavani, Mar 13, 2019, 6:04 AM IST

ಪುನೀತ್‌ರಾಜಕುಮಾರ್‌ ಅಭಿನಯದ “ನಟಸಾರ್ವಭೌಮ’ ಚಿತ್ರ ಮುಂದಿನ ವಾರಕ್ಕೆ 50 ದಿನಗಳನ್ನು ಪೂರ್ಣಗೊಳಿಸಲಿದೆ. ಆ ಖುಷಿಯಲ್ಲಿರುವ ಚಿತ್ರತಂಡ ಇದೀಗ ಪುನೀತ್‌ ಅವರ ಹುಟ್ಟುಹಬ್ಬಕ್ಕೊಂದು ಹಾಡಿನ ಕೊಡುಗೆ ನೀಡಲು ತಯಾರಾಗಿದೆ. ಹೌದು, ನಿರ್ದೇಶಕ ಪವನ್‌ ಒಡೆಯರ್‌, ಪುನೀತ್‌ರಾಜಕುಮಾರ್‌ ಅವರ ಹುಟ್ಟುಹಬ್ಬಕ್ಕೆಂದೇ ಹಾಡೊಂದನ್ನು ಬರೆದಿದ್ದು, ಆ ಹಾಡನ್ನು ಮಾ.16 ರ ಮಧ್ಯರಾತ್ರಿ ಬಿಡುಗಡೆ ಮಾಡಲು ನಿರ್ಧರಿಸಿದ್ದಾರೆ.

ಅಂದಹಾಗೆ,  ಪುನೀತ್‌ ಅವರ ಸಿನಿಮಾ ಪಯಣ ಮತ್ತು ಸಿನಿಮಾಗಳ ಶೀರ್ಷಿಕೆ ಪ್ರಧಾನವಾಗಿಟ್ಟುಕೊಂಡು ಹಾಡನ್ನು ರಚಿಸಲಾಗಿದೆ. ಹಾಡಿನ ಕುರಿತು ಹೇಳಿಕೊಳ್ಳುವ ಪವನ್‌ ಒಡೆಯರ್‌, “ಆಕಾಶದ ಅಭಿಯಾಗಿ, ಕನ್ನಡ ಪೃಥ್ವಿಗೆ ನೀ ಅರಸು, ಅಣ್ಣಾಬಾಂಡ್‌ ದೊಡ್ಮನೆ ಹುಡುಗನ ನಾನ್‌ ಸ್ಟಾಪ್‌ ಸ್ಟೆಪ್‌… ಡ್ಯಾನ್ಸ್‌ ವಿತ್‌ ಅಪ್ಪು….’ ಎಂದು ಶುರುವಾಗುತ್ತದೆ.

ಈ ಹಾಡಿಗೆ “ನಟಸಾರ್ವಭೌಮ’ ಚಿತ್ರದ ಟೈಟಲ್‌ ಟ್ರಾಕ್‌ ಬಳಸಲಾಗಿದ್ದು, ಸ್ವಲ್ಪ ಬದಲಾವಣೆ ಮಾಡಿಕೊಳ್ಳಲಾಗಿದೆ. ಸಂಗೀತ ನಿರ್ದೇಶಕ ಇಮಾನ್‌ ಅವರು ಸಂಗೀತ ನೀಡುತ್ತಿದ್ದಾರೆ. ಚೆನ್ನೈನ ಗಾಯಕರೊಬ್ಬರು ಹಾಡಲಿದ್ದಾರೆ. ಚೆನ್ನೈ ಸ್ಟುಡಿಯೋದಲ್ಲೇ ಹಾಡು ರೆಕಾರ್ಡಿಂಗ್‌ ಆಗಲಿದ್ದು, ಮಾ.16 ರ ಮಧ್ಯರಾತ್ರಿ ಅವರ ಹುಟ್ಟುಹಬ್ಬಕ್ಕೆ ಹಾಡನ್ನು ಬಿಡುಗಡೆ ಮಾಡಲಾಗುತ್ತದೆ.

ಅಭಿಮಾನಿಗಳಿಗೆ ಈ ಹಾಡು ಇಷ್ಟವಾಗುವಂತೆಯೇ ಮಾಡಲಾಗುತ್ತಿದೆ ಎನ್ನುವ ಪವನ್‌ ಒಡೆಯರ್‌, ಸದ್ಯಕ್ಕೆ “ನಟಸಾರ್ವಭೌಮ’ 50 ದಿನದತ್ತ ದಾಪುಗಾಲು ಇಡುತ್ತಿದ್ದು, ನಿರ್ಮಾಪಕರು ಇಷ್ಟರಲ್ಲೇ 50 ದಿನದ ಸಂಭ್ರಮ ಆಚರಿಸಲು ನಿರ್ಧರಿಸಿದ್ದಾರೆ ಎಂಬುದು ನಿರ್ದೇಶಕರ ಹೇಳಿಕೆ.