‘ಲಕ್ಕಿಮ್ಯಾನ್’ ಟೀಸರ್ ನಲ್ಲಿ ಪುನೀತ್ ದರ್ಶನ: ದೇವರಾಗಿ ಎಂಟ್ರಿಕೊಟ್ಟ ಅಪ್ಪು

Team Udayavani, Jul 28, 2022, 12:35 PM IST

ಡಾರ್ಲಿಂಗ್‌ ಕೃಷ್ಣ ನಾಯಕನಾಗಿ ಅಭಿನಯಿಸಿರುವ “ಲಕ್ಕಿ ಮ್ಯಾನ್‌’ ಸಿನಿಮಾದಲ್ಲಿ ಪವರ್‌ಸ್ಟಾರ್‌ ಪುನೀತ್‌ ರಾಜಕುಮಾರ್‌ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ವಿಷಯ ನಿಮಗೆ ಗೊತ್ತಿರಬಹುದು. ಕೆಲವು ದಿನಗಳ ಹಿಂದಷ್ಟೇ “ಲಕ್ಕಿ ಮ್ಯಾನ್‌’ ಸಿನಿಮಾದಲ್ಲಿ ಪುನೀತ್‌ ರಾಜಕುಮಾರ್‌ ಅವರ ಪಾತ್ರದ ಬಗ್ಗೆ ತಿಳಿಸುವ ಮೊದಲ ಪೋಸ್ಟರ್‌ ಒಂದಷ್ಟು ಬಿಡುಗಡೆಗೊಳಿಸಿದ್ದ ಚಿತ್ರತಂಡ, ಅಪ್ಪು ಅಭಿಮಾನಿಗಳ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿತ್ತು. ಇದೀಗ “ಲಕ್ಕಿಮ್ಯಾನ್‌’ ಸಿನಿಮಾದ ಮೊದಲ ಟೀಸರ್‌ ಬಿಡುಗಡೆ ಮಾಡಿರುವ ಚಿತ್ರತಂಡ, ಸಿನಿಮಾದಲ್ಲಿ ಪುನೀತ್‌ ರಾಜಕುಮಾರ್‌ ಪಾತ್ರ ಪರಿಚಯವನ್ನು ಮಾಡಿಕೊಟ್ಟಿದೆ.

ಸದ್ಯ ಬಿಡುಗಡೆಯಾಗಿರುವ “ಲಕ್ಕಿ ಮ್ಯಾನ್‌’ ಸಿನಿಮಾದ ಚಿತ್ರದ ಟೀಸರ್‌ನಲ್ಲಿ ಪುನೀತ್‌ ರಾಜಕುಮಾರ್‌ ದೇವರ ರೂಪದಲ್ಲಿ ಸ್ಟೈಲಿಶ್‌ ಆಗಿ ತೆರೆಮೇಲೆ ಕಾಣಿಸಿಕೊಂಡಿದ್ದಾರೆ. ಅಂದಹಾಗೆ, ದೇವರ ರೂಪದ ಪಾತ್ರವಾದರೂ, ಪುನೀತ್‌ ರಾಜಕುಮಾರ್‌ ಫಾರ್ಮಲ್ಸ… ತೊಟ್ಟು ಹಲವು ಸ್ಟೈಲಿಶ್‌ ಕಾಸ್ಟೂಮ್ಸ್‌ನಲ್ಲಿ ಮಿಂಚಿದ್ದಾರೆ. ಅಲ್ಲದೆ ಸಿನಿಮಾದಲ್ಲಿರುವ ಹಾಡೊಂದಕ್ಕೆ ಪುನೀತ್‌ ಹೆಜ್ಜೆ ಹಾಲಿರುವ ಝಲಕ್‌ ಅನ್ನು ಟೀಸರ್‌ನಲ್ಲಿ ತೋರಿಸಲಾಗಿದೆ. ಇದರ ಜೊತೆಗೆ ಪುನೀತ್‌ ಅವರದ್ದೇ ಧ್ವನಿಯಲ್ಲಿ, “ನಿನ್ನ ಲೈಫ್ನಲ್ಲಿ ಆಗಿರುವ ಮಿಸ್ಟೇಕ್‌ಗಳನ್ನು ಸರಿ ಮಾಡಿಕೊಳ್ಳಲು ನಿನಗೆ ಸೆಕೆಂಡ್‌ ಚಾನ್ಸ್‌ ಕೊಡ್ತೀನಿ…’ ಎನ್ನುವ ಒಂದೇ ಒಂದು ಡೈಲಾಗ್‌ ಕೂಡ ಟೀಸರ್‌ನಲ್ಲಿ ಅನಾವರಣಗೊಂಡಿದೆ.

ಇದನ್ನೂ ಓದಿ: ಕನ್ನಡದಲ್ಲಿ ‘ದಿ ಲೆಜೆಂಡ್’ ಸಿನಿಮಾ; ಅರುಲ್‌ ಸರವಣನ್‌ ಹೀರೋ

ಇನ್ನು “ಲಕ್ಕಿ ಮ್ಯಾನ್‌’ ಸಿನಿಮಾದ ಟೀಸರ್‌ನಲ್ಲಿ ಪುನೀತ್‌ ರಾಜಕುಮಾರ್‌ ಅವರೊಂದಿಗೆ ಪ್ರಭುದೇವ ಕೂಡ ಕಾಣಿಸಿಕೊಂಡಿದ್ದು, ಇಬ್ಬರ ಡ್ಯಾನ್ಸಿಂಗ್‌ ಜುಗಲ್‌ಬಂದಿ ಜೋರಾಗಿರುವಂತೆ ಕಾಣುತ್ತಿದೆ. ಒಟ್ಟಾರೆ ಪುನೀತ್‌ ರಾಜಕುಮಾರ್‌ ಅವರನ್ನು ಬಿಗ್‌ ಸ್ಕ್ರೀನ್‌ ಮೇಲೆ ಮಿಸ್‌ ಮಾಡಿಕೊಳ್ಳುತ್ತಿದ್ದ ಅಭಿಮಾನಿಗಳಿಗೆ, ಪುನೀತ್‌ ರಾಜಕುಮಾರ್‌ ಇಂಥದ್ದೊಂದು ವಿಭಿನ್ನ ಪಾತ್ರದಲ್ಲಿ ಮತ್ತೆ ತೆರೆಮೇಲೆ ಬರುತ್ತಿರುವುದು ಖುಷಿ ನೀಡಿದೆ.

“ಲಕ್ಕಿ ಮ್ಯಾನ್‌’ ಸಿನಿಮಾದಲ್ಲಿ ಪುನೀತ್‌ ರಾಜಕುಮಾರ್‌ ಹೇಗೆ ಕಾಣಲಿದ್ದಾರೆ ಎಂಬ ಅಭಿಮಾನಿಗಳ ಕುತೂಹಲಕ್ಕೆ ಸಣ್ಣ ಉತ್ತರ ಟೀಸರ್‌ನಲ್ಲಿ ಸಿಕ್ಕಿದ್ದು, ಸದ್ಯ ಸಿನಿಮಾ ಬಿಡುಗಡೆಯ ಕಡೆಗೆ ಅಪ್ಪು ಅಭಿಮಾನಿಗಳ ಚಿತ್ತ ನೆಟ್ಟಿದೆ.