ರೇಸರ್‌ ಜೊತೆ ಅದ್ವಿತಿ ಶೆಟ್ಟಿ‌

Team Udayavani, Jan 30, 2023, 1:34 PM IST

ನಿರ್ಮಾಪಕ ಹಾಗೂ ನಿರ್ದೇಶಕ ವಿಷ್ಣುಕಾಂತ್‌ ಪುತ್ರ ಭರತ್‌ ವಿಷ್ಣುಕಾಂತ್‌ “ರೇಸರ್‌’ ಸಿನಿಮಾ ಮೂಲಕ ನಿರ್ದೇಶಕನಾಗಿ ಹೊರ ಹೊಮ್ಮುತ್ತಿದ್ದಾರೆ. ಬೈಕ್‌ ರೇಸಿಂಗ್‌ ಕುರಿತ ನೈಜ ಘಟನೆ ಆಧಾರಿತ “ರೇಸರ್‌’ ಚಿತ್ರದ ಮುಹೂರ್ತ ಇತ್ತೀಚೆಗೆ ನಡೆದಿದೆ.

ಚಿತ್ರದಲ್ಲಿ ಸಂದೇಶ್‌ ಪ್ರಸನ್ನ, ಅದ್ವಿತಿ ಶೆಟ್ಟಿ ನಾಯಕ-ನಾಯಕಿಯಾಗಿ ನಟಿಸುತ್ತಿದ್ದು, ಭರತ್‌ ವಿಷ್ಣುಕಾಂತ್‌ ನಿರ್ದೇಶನದ ಜೊತೆಗೆ ಭರತ್‌ ಫಿಲಂಸ್‌ನಡಿ ತಾವೇ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದಾರೆ.

ನಿರ್ದೇಶಕ ಭರತ್‌ ವಿಷ್ಣುಕಾಂತ್‌ ಮಾತನಾಡಿ, “ಇದು ನನ್ನ ನಿರ್ದೇಶನದ ಮೊದಲ ಸಿನಿಮಾ. ನನ್ನ ಗುರು ಖಲೀಮ್‌ ಮೆಕಾನಿಕ್‌ ಹಾಗೂ ನ್ಯಾಶನಲ್‌ ಚಾಂಪಿಯನ್‌. ಅವರ ಗ್ಯಾರೇಜ್‌ನಲ್ಲಿ ನಡೆದ ನೈಜ ಘಟನೆ ಇಟ್ಟುಕೊಂಡು ಅದಕ್ಕೆ ಸಿನಿಮ್ಯಾಟಿಕ್‌ ಟಚ್‌ ಕೊಟ್ಟು ರೇಸರ್‌ ಕಥೆ ಹೆಣೆಯಲಾಗಿದೆ. ಸಿನಿಮಾ ಬೈಕ್‌ ರೇಸರ್‌ ಬಗ್ಗೆ ಆಗಿರುವು ದ ರಿಂದ ರಿಯಲ್‌ ಬೈಕ್‌ ರೇಸರನ್ನೇ ಹಾಕಿಕೊಂಡು ಸಿನಿಮಾ ಮಾಡುತ್ತಿದ್ದೇನೆ. ಬುದ್ಧ್ ಇಂಟರ್‌ ನ್ಯಾಶನಲ್‌ ಸರ್ಕ್ಯೂಟ್‌ನಲ್ಲಿ ಭಾರತೀಯ ಚಿತ್ರರಂಗ ದಲ್ಲಿ ಇದೇ ಮೊದಲು ಚಿತ್ರೀಕರಣ ಮಾಡುತ್ತಿದ್ದೇವೆ. ಅರ್ಜುನ್‌ ಜನ್ಯ ಸಂಗೀತ ನಿರ್ದೇಶನ, ಮೈಸೂರು ಸ್ವಾಮಿ ಛಾಯಾಗ್ರಹಣ ಚಿತ್ರಕ್ಕಿದೆ. ಭಜರಂಗಿ ಲೋಕಿ, ಯಶ್‌ ಶೆಟ್ಟಿ, ಕಾಕ್ರೋಚ್‌ ಸುಧಿ, ಬಾಲರಾಜ್ವಾಡಿ, ಕಾಮಿಡಿ ಕಿಲಾಡಿ ಸೂರಜ್‌ ಸೇರಿದಂತೆ ಹಲವು ಕಲಾವಿದರು ಚಿತ್ರದ ತಾರಾಬಳಗದಲ್ಲಿದ್ದಾರೆ’ ಎಂದು ಸಿನಿಮಾ ಬಗ್ಗೆ ಮಾಹಿತಿ ಹಂಚಿಕೊಂಡರು.

ನಾಯಕ ನಟ ಸಂದೇಶ್‌ ಪ್ರಸನ್ನ ಮಾತನಾಡಿ ನಾನು ಪೊ›ಫೆಶನಲ್‌ ಸೂಪರ್‌ ಬೈಕ್‌ ರೇಸರ್‌. ನಿರ್ದೇಶಕರು ಬೈಕ್‌ ರೇಸರ್‌ ಗಳು ಇಂಟರ್‌ ನ್ಯಾಶನಲ್‌ ಚಾಂಪಿಯನ್‌ ಶಿಪ್‌ಗೆ ಹೋಗಲು ಯಾವೆಲ್ಲ ರೀತಿ ಕಷ್ಟ ಪಡುತ್ತಾರೆ ಅನ್ನೋದನ್ನು ಕೇಳಿ ಕಥೆಯಲ್ಲಿ ಸೇರಿಸಲು ನನ್ನ ಬಳಿ ಬಂದಿದ್ದರು. ನಂತರ ನೀವೇ ಹೀರೋ ಆಗಿ ಮಾಡಿ ಅಂದ್ರು. ಒಬ್ಬ ರೇಸರ್‌ ಕಥೆ ಚಿತ್ರದಲ್ಲಿದೆ. ಕಥೆ ತುಂಬಾ ಸ್ಫೂರ್ತಿದಾಯಕ ವಾಗಿದೆ’ ಎಂದರು. ನಾಯಕಿ ಅದ್ವಿತಿ ಶೆಟ್ಟಿ ಕೂಡಾ ಮಾತನಾಡಿದರು.