ರಾಘವಿ ಈಗ ಸನಾ

Team Udayavani, Nov 4, 2019, 5:00 AM IST

ಸಾಮಾನ್ಯವಾಗಿ ಚಿತ್ರರಂಗಕ್ಕೆ ಕಾಲಿಟ್ಟ ಮೇಲೆ ನಟ-ನಟಿಯರು, ನಿರ್ದೇಶಕರು, ನಿರ್ಮಾಪಕರು ತಮ್ಮ ಹೆಸರನ್ನು ಬದಲಾವಣೆ ಮಾಡಿಕೊಳ್ಳುವುದು, ಹೊಸ ಹೆಸರನ್ನು ಇಟ್ಟುಕೊಳ್ಳುವುದು ಅಥವಾ ತಮ್ಮ ಹೆಸರಿನ ಹಿಂದೆ-ಮುಂದೆ ಬೇರೆ ಅಕ್ಷರಗಳನ್ನು, ಪದಗಳನ್ನು ಸೇರಿಸಿಕೊಳ್ಳುವುನ್ನು ನೀವು ನೋಡಿರುತ್ತೀರಿ.

ನಟ ಮುರಳಿ ಶ್ರೀಮುರಳಿ ಆಗಿದ್ದು, ಸಂಜನಾ ಗಾಂಧಿ ನಂತರ ಪೂಜಾ ಗಾಂಧಿ ಆಗಿದ್ದು, ಸುದೀಪನಾ ಅದಿತಿ ಪ್ರಭುದೇವ ಆಗಿದ್ದು, ಸಂಯುಕ್ತಾ ಬೆಳವಾಡಿ ಸಂಯುಕ್ತಾ ಹೊರನಾಡ್‌ ಆಗಿದ್ದು, ಹೀಗೆ ಕನ್ನಡ ಚಿತ್ರರಂಗದಲ್ಲಿ ಹೆಸರು ಬದಲಾವಣೆ ಮಾಡಿಕೊಂಡ ಇಂತಹ ನೂರಾರು ಉದಾಹರಣೆಗಳು ಸಿಗುತ್ತವೆ.

ಅದೆಲ್ಲ ಸರಿ, ಈಗ ಯಾಕೆ ಈ ಬಗ್ಗೆ ಮಾತು ಅಂತೀರಾ? ಅದಕ್ಕೊಂದು ಕಾರಣವಿದೆ. ಇಲ್ಲೊಬ್ಬ ನಾಯಕ ನಟಿ ಮೊದಲ ಚಿತ್ರದಲ್ಲೇ ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಜೊತೆ ನಟಿಸುವ ಅವಕಾಶ ಗಿಟ್ಟಿಸಿಕೊಂಡಿದ್ದು, ಇನ್ನೇನು ತಮ್ಮ ಚೊಚ್ಚಲ ಚಿತ್ರ ಬಿಡುಗಡೆಯಾಗಬೇಕು ಎನ್ನುವ ಹೊತ್ತಲ್ಲೇ, ತಮ್ಮ ಹೆಸರನ್ನು ಬದಲಾಯಿಸಿಕೊಂಡು ಅದೃಷ್ಟದ ಪರೀಕ್ಷೆಗೆ ಇಳಿಯುತ್ತಿದ್ದಾರೆ.

ಅಂದಹಾಗೆ, ಆ ನಾಯಕ ನಟಿಯ ಹೆಸರು ರಾಘವಿ ತಿಮ್ಮಯ್ಯ. ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಅಭಿನಯದ “ಒಡೆಯ’ ಚಿತ್ರದ ಮೂಲಕ ಪ್ರೇಕ್ಷಕರ ಮುಂದೆ ಬರುತ್ತಿರುವ ರಾಘವಿ ತಿಮ್ಮಯ್ಯ, ಈಗ ತಮ್ಮ ಹೆಸರನ್ನು ಸನಾ ತಿಮ್ಮಯ್ಯ ಅಂತ ಬದಲಾವಣೆ ಮಾಡಿಕೊಂಡಿದ್ದಾರೆ.

ಆದರೆ ತಮ್ಮ ಹೆಸರನ್ನು ರಾಘವಿ ತಿಮ್ಮಯ್ಯ ಬದಲು, ಸನಾ ತಿಮ್ಮಯ್ಯ ಅಂತ ಬದಲಾವಣೆ ಮಾಡಿಕೊಳ್ಳಲು ಕಾರಣ ಏನು ಎಂಬುದರ ಗುಟ್ಟು ಬಿಟ್ಟುಕೊಡದ ಈ ಹುಡುಗಿ, ಅದನ್ನು ಈಗಲೇ ಹೇಳಲಾರೆ ಅಂತ ನಗು ಚೆಲ್ಲುತ್ತಾಳೆ.