ರಾಗಿಣಿಗೆ ದಶಕದ ಸಂಭ್ರಮ

Team Udayavani, Apr 8, 2019, 3:00 AM IST

ಸ್ಯಾಂಡಲ್‌ವುಡ್‌ನ‌ ತುಪ್ಪದ ಬೆಡಗಿ ರಾಗಿಣಿ ದ್ವಿವೇದಿ ಸದ್ಯ ಹ್ಯಾಪಿ ಮೂಡ್‌ನ‌ಲ್ಲಿದ್ದಾರೆ. ರಾಗಿಣಿ ಈ ಹ್ಯಾಪಿ ಮೂಡ್‌ಗೆ ಕಾರಣವಾಗಿದ್ದು ಕನ್ನಡ ಚಿತ್ರರಂಗದಲ್ಲಿ ಅವರ ಜರ್ನಿ. ಹೌದು, ಕನ್ನಡ ಚಿತ್ರರಂಗದಲ್ಲಿ ರಾಗಿಣಿ ಸದ್ದಿಲ್ಲದೆ ಹತ್ತು ವರ್ಷಗಳ ಸಿನಿಜರ್ನಿಯನ್ನು ಯಶಸ್ವಿಯಾಗಿ ಪೂರೈಸಿದ್ದಾರೆ.

ಅದೇ ಖುಷಿಯಲ್ಲಿ ರಾಗಿಣಿ, ಚಿತ್ರರಂಗದಲ್ಲಿ ಕಳೆದ ಹತ್ತು ವರ್ಷಗಳಿಂದ ತಮಗೆ ಸಹಕಾರ, ಪ್ರೋತ್ಸಾಹ, ಬೆಂಬಲ ನೀಡುತ್ತಾ ಬಂದಿರುವ ಹಿತೈಷಿಗಳು, ಸ್ನೇಹಿತರಿಗಾಗಿ ಕೃತಜ್ಞತೆ ತಿಳಿಸುತ್ತಲೇ ತಮ್ಮ ಸಿನಿಮಾ ಜರ್ನಿ ಬಗ್ಗೆ ಮಾತನಾಡಿದ್ದಾರೆ. “ಕನ್ನಡ ಚಿತ್ರರಂಗಕ್ಕೆ ಬಂದಿರುವುದಕ್ಕೆ ತುಂಬಾ ಖುಷಿಯಿದೆ. ಆರಂಭದಿಂದ ಇಲ್ಲಿಯವರೆಗೆ ಎಲ್ಲರೂ ನನಗೆ ಬೆಂಬಲ, ಪ್ರೋತ್ಸಾಹ, ಸಹಕಾರ ನೀಡುತ್ತಾ ಬಂದಿದ್ದಾರೆ.

ಅದರಲ್ಲೂ ಈಗಿನ ಮಟ್ಟಿಗೆ ಹೇಳುವುದಾದರೆ, ಚಿತ್ರರಂಗದಲ್ಲಿ ಹೀರೊಯಿನ್‌ ಆಗಿ ಹತ್ತು ವರ್ಷಗಳನ್ನು ಪೂರೈಸುವುದು ಅಂದ್ರೇನೆ ದೊಡ್ಡ ವಿಷಯ ಅಂಥ ಎಲ್ಲರೂ ಹೇಳ್ತಾರೆ. ಹೀಗಿರುವಾಗ ಹತ್ತು ವರ್ಷಗಳಿಂದ ಅದೇ ಪ್ರೀತಿ, ವಿಶ್ವಾಸ ಇಲ್ಲಿ ಸಿಗುತ್ತಿದೆ ಅಂದ್ರೆ ನಾನು ನಿಜಕ್ಕೂ ಲಕ್ಕಿ ಎಂದೇ ಭಾವಿಸುತ್ತೇನೆ’ ಎನ್ನುವುದು ರಾಗಿಣಿ ಮಾತು.

ಇನ್ನು ಇಲ್ಲಿಯವರೆಗೆ ಹಳ್ಳಿ ಹುಡುಗಿ, ಕಾಲೇಜ್‌ ಗರ್ಲ್, ಪೊಲೀಸ್‌ ಆಫೀಸರ್‌, ಲೇಡಿ ಡಾನ್‌, ಐಟಂ ಡ್ಯಾನ್ಸರ್‌, ಅಕ್ಕ, ತಂಗಿ, ಲವರ್‌ ಹೀಗೆ ಹತ್ತು ಹಲವು ಪಾತ್ರಗಳಿಗೆ ಬಣ್ಣ ಹಚ್ಚಿರುವ ಮಾಡಿರುವ ರಾಗಿಣಿಗೆ ಈ ಥರದ ಎಲ್ಲಾ ಪಾತ್ರಗಳು ಸಾಕಾಗಿದೆಯಂತೆ!. ರಾಗಿಣಿ ಹೇಳುವಂತೆ, “ನಾನು ಇಲ್ಲಿ ನಟಿಯಾಗಬೇಕು ಎಂಬ ಕನಸನ್ನು ಇಟ್ಟುಕೊಂಡು ಬಂದವಳು.

ನಾನು ಯಾವಾಗಲೂ ಯಾವುದೋ ಒಂದೇ ಒಂದು ಪಾತ್ರದಲ್ಲಿ ಗುರುತಿಸಿಕೊಳ್ಳಲು ಇಷ್ಟಪಡುವುದಿಲ್ಲ. ನನಗೆ ಸವಾಲಿನ ಪಾತ್ರಗಳನ್ನು ಮಾಡಬೇಕು ಎಂಬ ಕನಸಿದೆ. ಪ್ರತಿ ಚಿತ್ರದಲ್ಲೂ ನನಗೆ ಹೊಸ ಥರದ ಪಾತ್ರಗಳು ಸಿಗಬೇಕು ಎಂದು ಬಯಸುತ್ತೇನೆ. ಅಂಥ ಪಾತ್ರಗಳನ್ನು ಮಾಡುವುದು ನಿಜಕ್ಕೂ ನನಗೆ ಖುಷಿ ಕೊಡುತ್ತದೆ.

ಅದರಲ್ಲೂ ಕನ್ನಡದಲ್ಲಿ ಬಯೋಪಿಕ್‌ ಚಿತ್ರಗಳಲ್ಲಿ ಅಭಿನಯಿಸಬೇಕೆಂಬ ಆಸೆಯಿದೆ. ಸ್ಪೋರ್ಟ್ಸ್ ಸಬ್ಜೆಕ್ಟ್ ಚಿತ್ರಗಳು, ಮಹಿಳಾ ಪ್ರಧಾನ ಚಿತ್ರಗಳು ಅಂದ್ರೆ ನನಗಿಷ್ಟ. ಅಂಥ ಚಿತ್ರಗಳು ಸಿಕ್ಕರೆ ಖಂಡಿತಾ ಮಾಡುತ್ತೇನೆ. ಮುಂದಿನ ದಿನಗಳಲ್ಲಿ ಅಂಥ ಚಿತ್ರಗಲು ಸಿಗಬಹುದು ಎನ್ನುವ ನಿರೀಕ್ಷೆ ಇದೆ’ಎನ್ನುತ್ತಾರೆ ರಾಗಿಣಿ. ಸದ್ಯ ರಾಗಿಣಿ “ಗಾಂಧಿಗಿರಿ’ ಚಿತ್ರದಲ್ಲಿ ನಟಿಸುತ್ತಿದ್ದಾರೆ.