ರಾಗಿಣಿ ಈಗ ವೆಂಕಟ್‌ ಫ್ಯಾನ್‌

Team Udayavani, Jun 12, 2017, 11:47 AM IST

“ಐಟಂ ಸಾಂಗ್‌ ಬ್ಯಾನ್‌ ಆಗ್ಬೇಕು … ನನ್ಮಗಂದ್‌ …’  ಹೀಗೆ ವೆಂಕಟ್‌ ಅದೆಷ್ಟು ಸಾರಿ ಗುಡುಗಿದ್ದಾರೋ ಲೆಕ್ಕವಿಲ್ಲ. ಅವರ “ಹುಚ್ಚ ವೆಂಕಟ್‌’ ಸಿನಿಮಾದ ಪತ್ರಿಕಾಗೋಷ್ಠಿಯಿಂದ ಹಿಡಿದು ಮಾಧ್ಯಮದ ಎದುರು ಬಂದಾಗಲೆಲ್ಲಾ “ಐಟಂ ಸಾಂಗ್‌ ಬ್ಯಾನ್‌ ಆಗ್ಬೇಕು ..’ ಎಂದು ಹೇಳುತ್ತಲೇ ಇದ್ದರು. ಈಗ ಅದೇ ಹೇಳಿಕೆಯನ್ನಿಟ್ಟುಕೊಂಡು ಒಂದು ಐಟಂ ಸಾಂಗ್‌ ಸಿದ್ಧವಾಗಿದೆ. ಮುಂದಿನ ವಾರ ಅದನ್ನು ನೀವು ತೆರೆಮೇಲೂ ನೋಡಬಹುದು.

ಹೌದು, “ಐಟಂ ಸಾಂಗು ಆಗ್ಬೇಕು ಬ್ಯಾನು, ಯಾಕಂದ್ರೆ ನಾನು ವೆಂಕಣ್ಣನ ಫ್ಯಾನು …’ ಎಂಬ ಐಟಂ ಸಾಂಗ್‌ ರೆಡಿಯಾಗಿದೆ. ಪ್ರದೀಪ್‌ ನಾಯಕರಾಗಿರುವ “ಟೈಗರ್‌’ ಚಿತ್ರ ಬಿಡುಗಡೆಗೆ ರೆಡಿಯಾಗಿದ್ದು, ಇದೇ ಶುಕ್ರವಾರ ತೆರೆಕಾಣುತ್ತಿದೆ. ಈ ಚಿತ್ರದಲ್ಲಿ  “ಐಟಂ ಸಾಂಗು ಆಗ್ಬೇಕು ಬ್ಯಾನು, ಯಾಕಂದ್ರೆ ನಾನು ವೆಂಕಣ್ಣನ ಫ್ಯಾನು …’  ಎಂಬ ಐಟಂ ಸಾಂಗ್‌ ಇದ್ದು, ರಾಗಿಣಿ ಸಖತ್‌ ಹಾಟ್‌ ಆಗಿ ಈ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ.

ವಿ.ನಾಗೇಂದ್ರ ಪ್ರಸಾದ್‌ ಅವರು ಬರೆದಿರುವ ಈ ಹಾಡನ್ನು ಮಂಜುಳಾ ಗುರುರಾಜ್‌ ಅವರು ಹಾಡಿದ್ದಾರೆ. ಐಟಂ ಸಾಂಗ್‌ ಅನ್ನು ಯಾರು ಮಾಡಬಾರದು. ನಾಯಕಿಯರು ಕೂಡಾ ಮೈ ತುಂಬಾ ಬಟ್ಟೆ ಹಾಕಿಕೊಂಡೇ ನಟಿಸಬೇಕು ಎಂದು ಹೇಳುತ್ತಲೇ ಬಂದಿದ್ದ ವೆಂಕಟ್‌ ಅವರ ಹೇಳಿಕೆಯೇ ಈಗ ಐಟಂ ಸಾಂಗ್‌ವೊಂದಕ್ಕೆ ಲೀಡ್‌ ತಗೊಂಡಿದೆ. ಕಲರ್‌ಫ‌ುಲ್‌ ಸೆಟ್‌ನಲ್ಲಿ ಸಖತ್‌ ಹಾಟ್‌ ಆಗಿಯೇ ಈ ಹಾಡನ್ನು ಕೂಡಾ ಚಿತ್ರೀಕರಿಸಲಾಗಿದೆ.

“ಟೈಗರ್‌’ ಚಿತ್ರವನ್ನು ನಂದಕಿಶೋರ್‌ ನಿರ್ದೇಶನ ಮಾಡಿದ್ದು, ಪ್ರದೀಪ್‌ ನಾಯಕರಾಗಿ ನಟಿಸಿದ್ದಾರೆ. ಕೆ.ಶಿವರಾಂ ಈ ಸಿನಿಮಾದ ನಿರ್ಮಾಪಕರು. ಜೊತೆಗೆ ಚಿತ್ರದಲ್ಲೊಂದು ಪ್ರಮುಖ ಪಾತ್ರ ಕೂಡಾ ಮಾಡಿದ್ದಾರೆ.