ರಾಜ್‌ ಮೊಮ್ಮಗನ ಚಿತ್ರಕ್ಕೆ “ಶಿವ 143′ ಟೈಟಲ್‌ ಫಿಕ್ಸ್‌

Team Udayavani, Oct 14, 2019, 3:05 AM IST

ಡಾ.ರಾಜಕುಮಾರ್‌ ಮೊಮ್ಮಗ ಧೀರನ್‌ ರಾಮ್‌ಕುಮಾರ್‌ ಚಿತ್ರರಂಗಕ್ಕೆ ಎಂಟ್ರಿಯಾಗಿರುವುದು ಗೊತ್ತೇ ಇದೆ. ಅದಾಗಲೇ ಸದ್ದಿಲ್ಲದೆಯೇ ಸಿನಿಮಾವೊಂದರ ಚಿತ್ರೀಕರಣ ಕೂಡ ಮುಗಿದಿದ್ದು, ಬಿಡುಗಡೆಗೆ ಸಜ್ಜಾಗಿದೆ. ಈ ಹಿಂದೆ ಧೀರನ್‌ ಅಭಿನಯದ ಚಿತ್ರಕ್ಕೆ “ದಾರಿ ತಪ್ಪಿದ ಮಗ’ ಎಂದು ಹೆಸರಿಡಲಾಗಿತ್ತು. ಆದರೆ, ಚಿತ್ರದ ಕಥೆಗೆ ಆ ಶೀರ್ಷಿಕೆ ಹೊಂದಿಕೆ ಆಗಲ್ಲ ಎಂಬ ಕಾರಣಕ್ಕೆ ಶೀರ್ಷಿಕೆ ಬದಲಿಸಲು ಚಿತ್ರತಂಡ ತೀರ್ಮಾನಿಸಿ, ಬದಲಿಸಿತ್ತು.

ಈಗ ಧೀರನ್‌ ನಟಿಸಿರುವ ಚಿತ್ರಕ್ಕೆ ಹೊಸ ಶೀರ್ಷಿಕೆ ಇಡಲಾಗಿದೆ. ಅಂದಹಾಗೆ, ಅದರ ಹೆಸರು “ಶಿವ 143′. ಹೌದು, ಚಿತ್ರರಂಗದಲ್ಲಿ ಆಗಾಗ ಒಂದಷ್ಟು ಬದಲಾವಣೆಗಳು ಆಗುತ್ತಲೇ ಇರುತ್ತವೆ. ಆರಂಭದಲ್ಲಿ ಇದ್ದದ್ದು, ಕ್ಲೈಮ್ಯಾಕ್ಸ್‌ ವೇಳೆಗೆ ಇರೋದಿಲ್ಲ. ಅದು ನಾಯಕ, ನಾಯಕಿ, ನಿರ್ದೇಶಕ, ನಿರ್ಮಾಪಕ, ಕಲಾವಿದರು, ತಂತ್ರಜ್ಞರು ಹೀಗೆ ಒಂದಲ್ಲ ಒಂದು ಬದಲಾವಣೆ ಸಹಜ. ಹಾಗೆಯೇ ಧೀರನ್‌ ಅಭಿನಯದ “ದಾರಿ ತಪ್ಪಿದ ಮಗ’ ಚಿತ್ರದ ಹೆಸರು ಬದಲಾಗಿದ್ದು, ಈಗ “ಶಿವ 143′ ಎಂಬ ಹೆಸರಿಟ್ಟಿರುವುದು ಸದ್ಯದ ಸುದ್ದಿ.

“ಶಿವ 143′ ಚಿತ್ರದ ಚಿತ್ರೀಕರಣ ಪೂರ್ಣಗೊಂಡಿದ್ದು, ಈಗ ಬಿಡುಗಡೆಯ ಕೆಲಸದಲ್ಲಿ ಚಿತ್ರತಂಡ ನಿರತವಾಗಿದೆ. ಚಿತ್ರದಲ್ಲಿ ಧೀರನ್‌ ರಾಮ್‌ಕುಮಾರ್‌ ಅವರಿಗೆ ನಾಯಕಿಯಾಗಿ ಮಾನ್ವಿತಾ ಕಾಮತ್ ಕಾಣಿಸಿಕೊಂಡಿದ್ದಾರೆ. ಅಂದಹಾಗೆ, ಈ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಯಾಗಿರುವ ಧೀರನ್‌, ಚಿತ್ರದ ಪಾತ್ರಕ್ಕಾಗಿ ಸಾಕಷ್ಟು ವರ್ಕೌಟ್‌ ಮಾಡಿದ್ದಾರೆ. ಅನಿಲ್‌ಕುಮಾರ್‌ ನಿರ್ದೇಶನದ ಈ ಚಿತ್ರವನ್ನು ಜಯಣ್ಣ ನಿರ್ಮಿಸಿದ್ದಾರೆ.