ಹೊಸ ಲುಕ್‌ನಲ್ಲಿ ರವಿಚಂದ್ರನ್‌

Team Udayavani, Jul 25, 2019, 3:02 AM IST

ಅನುಮಾನ ಬೇಡ ಸುದೀಪ್‌ ಜೊತೆ ಈ ಫೋಟೋದಲ್ಲಿರುವುದು ಕ್ರೇಜಿಸ್ಟಾರ್‌ ರವಿಚಂದ್ರನ್‌. ಅರೇ, ಉದ್ದನೆಯ ಬಿಳಿ ಗಡ್ಡ ಬಿಟ್ಟು ಹೊಸ ಅವತಾರದಲ್ಲಿರುವ ರವಿಚಂದ್ರನ್‌, ಸುದೀಪ್‌ ಜೊತೆಗೆ ಹೊಸ ಚಿತ್ರದಲ್ಲೇನಾದರೂ ಕಾಣಿಸಿಕೊಳ್ಳುತ್ತಿದ್ದಾರಾ? ಇಂಥದ್ದೊಂದು ಪ್ರಶ್ನೆ ಸಹಜವಾಗಿಯೇ ಎದುರಾಗುತ್ತದೆ. ಈ ಪ್ರಶ್ನೆಗೆ ಕಾರಣ, ಈಗಾಗಲೇ ರವಿಚಂದ್ರನ್‌ ಅವರು ಸುದೀಪ್‌ ಅಭಿನಯದ “ಮಾಣಿಕ್ಯ’ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು.

ಅದಾದ ಬಳಿಕ “ಹೆಬ್ಬುಲಿ ‘ ಚಿತ್ರದಲ್ಲೂ ನಟಿಸಿದ್ದರು. ಈಗ ಇನ್ನೊಂದು ಚಿತ್ರದಲ್ಲಿ ನಟಿಸಲಿದ್ದಾರೆಯೇ? ನಟಿಸಿದರೂ ಅಚ್ಚರಿ ಇಲ್ಲ. ಅಷ್ಟಕ್ಕೂ ಈ ಅಪರೂಪದ ಭೇಟಿಯಾಗಿದ್ದು, ಹೈದರಾಬಾದ್‌ನ ರಾಮೋಜಿರಾವ್‌ ಫಿಲ್ಮ್ಸಿಟಿಯಲ್ಲಿ. ಹೌದು, ಸುದೀಪ್‌ ಅಭಿನಯದ “ಪೈಲ್ವಾನ್‌ ‘ ಬಿಡುಗಡೆಯ ತಯಾರಿಯಲ್ಲಿದೆ. ಅದರ ಜೊತೆಯಲ್ಲೇ ಸುದೀಪ್‌ “ಕೋಟಿಗೊಬ್ಬ 3 ‘ ಚಿತ್ರೀಕರಣದಲ್ಲಿ ನಿರತರಾಗಿದ್ದಾರೆ. ರಾಮೋಜಿ ಫಿಲ್ಮ್ಸಿಟಿಯಲ್ಲಿ ನಡೆಯುತ್ತಿರುವ “ಕೋಟಿಗೊಬ್ಬ 3 ‘ ಚಿತ್ರದ ಚಿತ್ರೀಕರಣದ ಸೆಟ್‌ಗೆ ರವಿಚಂದ್ರನ್‌ ಭೇಟಿ ನೀಡಿದ್ದಾರೆ.

ಅಷ್ಟಕ್ಕೂ ರವಿಚಂದ್ರನ್‌ ಅವರು ಸುದೀಪ್‌ ಚಿತ್ರದ ಸೆಟ್‌ಗೆ ಭೇಟಿಯಾಗಲು ಕಾರಣ, ರವಿಚಂದ್ರನ್‌ ಅಭಿನಯಿಸುತ್ತಿರುವ ಚಿತ್ರದ ಚಿತ್ರೀಕರಣ ಕೂಡ ರಾಮೋಜಿ ಫಿಲ್ಮ್ಸಿಟಿಯಲ್ಲೇ ನಡೆಯುತ್ತಿದೆ. ಬಿಡುವಿನ ಸಮಯದಲ್ಲಿ ರವಿಚಂದ್ರನ್‌ ಅವರು, “ಕೋಟಿಗೊಬ್ಬ 3 ‘ ಸೆಟ್‌ಗೆ ಸಡನ್‌ ಭೇಟಿ ಕೊಟ್ಟು, ಸುದೀಪ್‌ಗೆ ಅಚ್ಚರಿ ಮೂಡಿಸಿದ್ದಾರೆ. ಈ ಅಪರೂಪದ ಕ್ಷಣದ ಬಗ್ಗೆ ಸ್ವತಃ ಸುದೀಪ್‌ ಅವರೇ, ತಮ್ಮ ಟ್ವಿಟ್ಟರ್‌ ಖಾತೆಯಲ್ಲಿ ರವಿಚಂದ್ರನ್‌ ಜೊತೆಗಿರುವ ಸೆಲ್ಫಿ ಫೋಟೋವೊಂದನ್ನು ಹಾಕಿ ವಿಷಯ ಹಂಚಿಕೊಂಡಿದ್ದು, ಸಾಮಾಜಿಕ ತಾಣದಲ್ಲಿ ಇಬ್ಬರ ಭೇಟಿ ಕುರಿತು ಸಾಕಷ್ಟು ಮೆಚ್ಚುಗೆ ಹಾಗು ಪ್ರತಿಕ್ರಿಯೆಗಳು ಸಿಗುತ್ತಿವೆ.

ಅಂದಹಾಗೆ, ರವಿಚಂದ್ರನ್‌ ಅವರು ಈ ಫೋಟೋದಲ್ಲಿ ಸಖತ್‌ ಲುಕ್‌ನಲ್ಲಿ ಮಿಂಚುತ್ತಿದ್ದಾರೆ. ಅವರ ಹೊಸ ಶೈಲಿಯ ದಾಡಿ ನೋಡಿದರೆ, ಅವರು ಹೊಸ ಚಿತ್ರದಲ್ಲೊಂದು ವಿಶೇಷ ಪಾತ್ರ ಮಾಡುತ್ತಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಒಂದು ಮೂಲದ ಪ್ರಕಾರ, ರವಿಚಂದ್ರನ್‌ ಅವರೇ, ಸದ್ದಿಲ್ಲದೆಯೇ ಒಂದು ಸಿನಿಮಾ ನಿರ್ದೇಶನ ಮಾಡುತ್ತಿದ್ದಾರೆ ಎನ್ನಲಾಗಿದೆ. ಆದರೆ, ಅದಕ್ಕೆ ಹೀರೋ ಯಾರು, ಯಾರೆಲ್ಲಾ ಇದ್ದಾರೆ, ಆ ಸಿನಿಮಾದ ಹೆಸರೇನು ಇತ್ಯಾದಿ ಕುರಿತು ಮಾಹಿತಿ ಇಲ್ಲ.

ಆದರೆ, ಅವರ ಚಿತ್ರವೊಂದು ರಾಮೋಜಿ ಫಿಲ್ಮ್ಸಿಟಿಯಲ್ಲಿ ಚಿತ್ರೀಕರಣ ನಡೆಯುತ್ತಿರುವುದಂತೂ ಸತ್ಯ. ಇನ್ನು, ಇತ್ತೀಚೆಗೆ ಹೈದರಾಬಾದ್‌ ರಾಮೋಜಿ ಫಿಲ್ಮ್ ಸಿಟಿಯಲ್ಲಿ ಖಳನಟ ರವಿಶಂಕರ್‌ ಕೂಡ ಸುದೀಪ್‌ ಅವರನ್ನು ಭೇಟಿಯಾಗಿದ್ದರು. ಅ ಸಮಯದಲ್ಲಿ ಸುದೀಪ್‌ ತೆಗೆದ ಸೆಲ್ಫಿ ಫೋಟೋ ಕೂಡ ಸಾಮಾಜಿಕ ತಾಣದಲ್ಲಿ ಹರಿದಾಡುತ್ತಿದೆ. ಅತ್ತ, ರಾಘವೇಂದ್ರ ರಾಜಕುಮಾರ್‌ ಅವರು ಕೂಡ ಸುದೀಪ್‌ ಅವರನ್ನು ಭೇಟಿ ಮಾಡಿದ್ದ ಫೋಟೋವೊಂದು ಸೋಶಿಯಲ್‌ ಮೀಡಿಯಾದಲ್ಲಿ ಓಡಾಡುತ್ತಿದೆ.