Kantara: Chapter 1: ‘ಕಾಂತಾರ’ ಸೆಟ್ ಗೆ ಮರಳಿದ ರಿಷಬ್; ಮೂರನೇ ಹಂತದ ಚಿತ್ರೀಕರಣ ಶುರು

Team Udayavani, Nov 6, 2024, 10:50 AM IST

ಬೆಂಗಳೂರು: ಡಿವೈನ್ ಸ್ಟಾರ್ ರಿಷಬ್ ಶೆಟ್ಟಿ‌ (Rishab Shetty) ‘ಕಾಂತಾರ -1’ ಮ್ಯಾಜಿಕ್ ನೋಡಲು ಪ್ಯಾನ್ ಇಂಡಿಯಾ ಕಾಯುತ್ತಿದೆ.

2022 ರಲ್ಲಿ ತೆರೆಕಂಡಿದ್ದ ‘ಕಾಂತಾರ’ ದೊಡ್ಡ ಯಶಸ್ಸು ಸಾಧಿಸಿತು. ಈ ಸಿನಿಮಾದ ಪ್ರೀಕ್ವೆಲ್ ಬರುವುದಾಗಿ ರಿಷಬ್ ಸಕ್ಸಸ್ ಮೀಟ್ ನಲ್ಲಿ ರಿವೀಲ್ ಮಾಡಿದ್ದರು.

ಅಂದಿನಿಂದ ಶುರುವಾದ ಹೈಪ್ ಪ್ರತಿ ಅಪ್ಡೇಟ್ ನಿಂದ ಹೆಚ್ಚಾಗುತ್ತಲೇ ಬಂದಿದೆ. ಕಲಾವಿದರ ಆಯ್ಕೆ, ಲೋಕೇಷನ್ ಹುಡುಕಾಟ, ಬೃಹತ್ ಸೆಟ್ ಹೀಗೆ ನಾನಾ ವಿಚಾರದಿಂದ ‘ಕಾಂತಾರ ಪ್ರೀಕ್ವೆಲ್’ (Kantara: Chapter 1) ಸದ್ದು‌ ಮಾಡುತ್ತಿದೆ.

ಇದನ್ನೂ ಓದಿ: Lawyer Jagadish: ಕೊಲೆ ಬೆದರಿಕೆ; ದರ್ಶನ್, ಅಭಿಮಾನಿ ಮೇಲೆ ದೂರು ದಾಖಲಿಸಿದ ಜಗದೀಶ್

ರಿಷಬ್ ತನ್ನ ಹುಟ್ಟೂರು ಕುಂದಾಪುರದ ಕೆರಾಡಿಯಲ್ಲಿ ಚಿತ್ರೀಕರಣಕ್ಕೆ ಚಾಲನೆ ನೀಡಿದ್ದರು. ಮೊದಲ ಹಂತ, ಎರಡನೇ ಹಂತದ ಚಿತ್ರೀಕರಣದ ಬಳಿಕ ಚಿತ್ರತಂಡ ಮೂರನೇ ಹಂತದ ಶೂಟಿಂಗ್ ಆರಂಭಿಸಿದೆ ಎಂದು ವರದಿಯಾಗಿದೆ.

ಚಿತ್ರದ ಬೆಳವಣಿಗೆಗೆ ಹತ್ತಿರವಿರುವ ಮೂಲಗಳ ಪ್ರಕಾರ, ಈಗಾಗಲೇ ಸಿನಿಮಾದ ಅರ್ಧದಷ್ಟು ಚಿತ್ರೀಕರಣವನ್ನು ಪೂರ್ಣಗೊಂಡಿದ್ದು, ಉಳಿದ ಭಾಗದ ಚಿತ್ರೀಕರಣ ಈಗ ನಡೆಯುತ್ತಿದೆ. ಇದಲ್ಲದೆ, ರಿಷಬ್ ಕುದುರೆ ಸವಾರಿ ಮತ್ತು ಪುರಾತನ ಸಮರ ಕಲೆಯಾದ ಕಳರಿಪಯಟ್ಟು ತರಬೇತಿಯನ್ನು ಕಳೆದ ಒಂದು ವರ್ಷದಿಂದ ಪಡೆಯುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ.

ʼಕಾಂತಾರ: ಅಧ್ಯಾಯ 1ʼ ಚಲನಚಿತ್ರದಾದ್ಯಂತ ಪ್ರಾಚೀನ ಸಮರ ಕಲೆಗಳು ಹೆಚ್ಚಾಗಿ ಕಾಣಸಿಗಲಿದೆ. ಮೂರನೇ ಹಂತದ ಚಿತ್ರೀಕರಣ 60 ದಿನಗಳ ಕಾಲ ನಡೆಯಲಿದೆ. ಇದರಲ್ಲಿ ಹಾಡಿನ ಚಿತ್ರೀಕರಣ, ಆ್ಯಕ್ಷನ್ ದೃಶ್ಯ ಸೇರಿದಂತೆ ಕಥೆಯ ಸ್ವರೂಪಕ್ಕೆ ವಿಶಿಷ್ಟವಾದ ಹಲವಾರು ದೃಶ್ಯಗಳ ಶೂಟ್ ಆಗಲಿದೆ ಎಂದು ವರದಿಯಾಗಿದೆ.

ಇತ್ತೀಚೆಗೆ ರಿಷಬ್ ಶೆಟ್ಟಿ ‘ಹನುಮಾನ್’ ಖ್ಯಾತಿಯ ತೆಲುಗಿನ ನಿರ್ದೇಶಕ ಪ್ರಶಾಂತ್ ವರ್ಮಾ (Prasanth Varma) ಅವರ ‘ಜೈ ಹನುಮಾನ್’ (Jai Hanuman) ಸಿನಿಮಾದ ಫಸ್ಟ್ ಲುಕ್ ನಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ರಿಷಬ್ ಹನುಮಾನ್ ಆಗಿ ಲೀಡ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಹೊಂಬಾಳೆ ಫಿಲ್ಮ್ಸ್‌ ನಿರ್ಮಾಣದ ʼಕಾಂತಾರ ಪ್ರೀಕ್ವೆಲ್‌ʼ ಪಂಜರ್ಲಿ ದೈವದ ಹುಟ್ಟು ಮತ್ತು ಇತಿಹಾಸದ ಕಥೆಯನ್ನೊಳಗೊಳ್ಳಲಿದೆ ಎನ್ನಲಾಗಿದೆ. ಮುಂದಿನ ವರ್ಷ ಸಿನಿಮಾ ತೆರೆ ಕಾಣುವ ಸಾಧ್ಯತೆಯಿದೆ.