ರಿಷಭ್‌ ಶೆಟ್ಟಿ ಹೊಸ ಚಿತ್ರ “ಅಂಟಗೋನಿ ಶೆಟ್ಟಿ’

ನಿರ್ಮಾಣದ ಜೊತೆ ನಾಯಕರಾಗಿ ಕೆಲಸ

Team Udayavani, May 5, 2019, 3:00 AM IST

ನಿರ್ದೇಶಕ ರಿಷಭ್‌ ಶೆಟ್ಟಿ “ಬೆಲ್‌ ಬಾಟಂ’ ಚಿತ್ರದ ಮೂಲಕ ನಾಯಕ ನಟನಾಗಿ ಎಂಟ್ರಿಯಾಗಿದ್ದು ಗೊತ್ತೇ ಇದೆ. “ಬೆಲ್‌ ಬಾಟಂ’ ಚಿತ್ರದಲ್ಲಿ “ಡಿಟೆಕ್ಟಿವ್‌’ ದಿವಾಕರನಾಗಿ ಗಮನಸೆಳೆದ ನಿರ್ದೇಶಕ ಕಂ ನಾಯಕ ರಿಷಭ್‌ ಶೆಟ್ಟಿ, ಆ ಚಿತ್ರದ ಸಕ್ಸಸ್‌ ಖುಷಿಯಲ್ಲಿರುವಾಗಲೇ, ಇದೀಗ ಮತ್ತೂಂದು ಹೊಸ ಸಿನಿಮಾಗೆ ಹೀರೋ ಆಗಿದ್ದಾರೆ.

ಹೌದು, ಸದ್ಯ ರಿಷಭ್‌ ಶೆಟ್ಟಿ ಅಭಿನಯದ “ನಾಥೋರಾಮ್‌’ ಚಿತ್ರದ ಕೆಲಸಗಳು ಭರದಿಂದ ನಡೆಯುತ್ತಿರುವಂತೆಯೇ ರಿಷಭ್‌ ಅಭಿನಯದ “ಅಂಟಗೋನಿ ಶೆಟ್ಟಿ’ ಎಂಬ ಹೆಸರಿನ ಚಿತ್ರ ಅನೌನ್ಸ್‌ ಆಗಿದೆ. ಇತ್ತೀಚೆಗೆ ಈ ಚಿತ್ರದ ಫ‌ಸ್ಟ್‌ ಲುಕ್‌ ಅನ್ನು ಚಿತ್ರತಂಡ ಸೋಷಿಯಲ್‌ ಮೀಡಿಯಾಗಳಲ್ಲಿ ಬಿಡುಗಡೆ ಮಾಡುವ ಮೂಲಕ ಹೊಸ ಕುತೂಹಲ ಹುಟ್ಟುಹಾಕಿದೆ.

ರಿಷಭ್‌ ಶೆಟ್ಟಿ ಅವರ “ಅಂಟಗೋನಿ ಶೆಟ್ಟಿ’ ಚಿತ್ರಕ್ಕೆ ಸಮರ್ಥ್ ಕಡಕೊಳ ಕಥೆ ಹಾಗೂ ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ. ಇನ್ನು ಚಿತ್ರದ ಟೈಟಲ್‌ನಂತೆ ಚಿತ್ರ ಕೂಡ ಅಷ್ಟೆ ವಿಭಿನ್ನವಾಗಿ ಮೂಡಿಬರಲಿದೆ ಎಂಬುದು ಚಿತ್ರತಂಡದ ಮಾತು.

ಇದು 2004 ರಿಂದ 2019ರ ವರೆಗೆ ನಡೆಯುವ ಕಥೆಯಾಗಿದ್ದು, “ಅಂಟಗೋನಿ ಶೆಟ್ಟಿ’ ಕನ್ನಡ ಚಿತ್ರರಂಗಕ್ಕೆ ಹೊಸ ರೀತಿಯ ಸಿನಿಮಾ ಆಗಲಿದೆ ಎನ್ನುವ ಚಿತ್ರತಂಡ, ಸದ್ಯಕ್ಕೆ ಚಿತ್ರದ ಕಥಾಹಂದರ ಮತ್ತು ಪಾತ್ರಗಳ ಗುಟ್ಟನ್ನು ಬಿಟ್ಟುಕೊಟ್ಟಿಲ್ಲ. ಇನ್ನು “ಅಂಟಗೋನಿ ಶೆಟ್ಟಿ’ ಚಿತ್ರಕ್ಕೆ ರಿಷಭ್‌ ಶೆಟ್ಟಿ ಅವರೇ ಬಂಡವಾಳ ಹೂಡುತ್ತಿದ್ದಾರೆ. ಉಳಿದಂತೆ ಈ ಚಿತ್ರದಲ್ಲಿ ಅಭಿನಯಿಸುವ ಕಲಾವಿದರು, ತಂತ್ರಜ್ಞರ ಮಾಹಿತಿ ಇನ್ನಷ್ಟೇ ಹೊರಬೀಳಬೇಕಿದೆ.

“ಬೆಲ್‌ ಬಾಟಂ’ ಸಿನಿಮಾದಲ್ಲಿ ಡಿಟೆಕ್ಟಿವ್‌ ದಿವಾಕರನ ಪಾತ್ರ ನೋಡಿ ಖುಷಿಪಟ್ಟಿದ್ದ ನಿರ್ದೇಶಕ ಸಮರ್ಥ್ “ಅಂಟಗೋನಿ ಶೆಟ್ಟಿ’ ಚಿತ್ರಕ್ಕೆ ರಿಷಬ್‌ ಶೆಟ್ಟಿ ಸರಿಹೊಂದುತ್ತಾರೆ ಎಂದು ಅವರನ್ನೆ ನಾಯಕನಾಗಿ ಆಯ್ಕೆ ಮಾಡಿಕೊಂಡಿದ್ದಾರಂತೆ. ಈಗಾಗಲೆ ಟೈಟಲ್‌ ಮೂಲಕ ಕುತೂಹಲ ಮೂಡಿಸಿರುವ “ಅಂಟಗೋನಿ ಶೆಟ್ಟಿ’ ಎಲ್ಲಾ ಅಂದುಕೊಂಡಂತೆ ನಡೆದರೆ, ಇದೇ ವರ್ಷದ ಕೊನೆಗೆ ಸೆಟ್ಟೇರಲಿದೆ.