ರಾಬರ್ಟ್‌ ಬಿಡುಗಡೆಗೆ ಆತುರವಿಲ್ಲ

Team Udayavani, Oct 21, 2020, 12:44 PM IST

ಬಿಡುಗಡೆಗೆ ಸಿದ್ಧವಾಗಿರುವ ಸ್ಟಾರ್‌ ಸಿನಿಮಾ ಪಟ್ಟಿಯಲ್ಲಿ ದರ್ಶನ್‌ ಅವರ “ರಾಬರ್ಟ್‌’ ಚಿತ್ರಕೂಡಾ ಒಂದು. ಈಗಾಗಲೇ ಚಿತ್ರ ಹಲವು ಕಾರಣಗಳಿಗಾಗಿ ನಿರೀಕ್ಷೆ ಹುಟ್ಟಿಸಿದೆ. ಈಗ ಚಿತ್ರದ ಬಿಡುಗಡೆಕುರಿತಾದ ಚರ್ಚೆ ಜೊರಾಗಿ ನಡೆಯುತ್ತಿದೆ.ಕ್ರಿಸ್‌ಮಸ್‌ಗೆ ಚಿತ್ರ ಬಿಡುಗಡೆಯಾಗಲಿದೆ ಎಂಬ ಸುದ್ದಿ ಜೋರಾಗಿ ಹರಿದಾಡಿದೆ.

ಹಾಗಾದರೆ,ಕ್ರಿಸ್‌ಮಸ್‌ಗೆ ಚಿತ್ರ ಬಿಡುಗಡೆಯಾಗೋದು ಪಕ್ಕಾನಾ… ಈ ಪ್ರಶ್ನೆಯನ್ನು “ರಾಬರ್ಟ್‌’ ಚಿತ್ರದ ನಿರ್ಮಾಪಕ ಉಮಾಪತಿ ಶ್ರೀನಿವಾಸ್‌ ಗೌಡ ಅವರ ಮುಂದಿಟ್ಟರೆ, “ಸದ್ಯಕ್ಕೆ ಯಾವುದೂ ಅಂತಿಮವಾಗಿಲ್ಲ’ ಎನ್ನುತ್ತಾರೆ.

“ರಾಬರ್ಟ್‌’ ಸಿನಿಮಾದ ಬಿಡುಗಡೆ ಕುರಿತಾಗಿ “ಉದಯವಾಣಿ’ಯೊಂದಿಗೆ ಮಾತನಾಡಿದ ನಿರ್ಮಾಪಕ ಉಮಾಪತಿ, “ನಮ್ಮಕಡೆಯಿಂದ ಸಿನಿಮಾ ರೆಡಿ ಇದೆ. ಈಗ ಸೆನ್ಸಾರ್‌ಗೆ ಸಿದ್ಧವಾಗಿದೆ.ಆದರೆ, ಬಿಡುಗಡೆ ದಿನಾಂಕ ಅಂತಿಮವಾಗಿಲ್ಲ.ಸದ್ಯದ ಪರಿಸ್ಥಿತಿಯಲ್ಲಿ ಸಿನಿಮಾವನ್ನು ಇದೇ ದಿನಾಂಕಕ್ಕೆ ಬಿಡುಗಡೆ ಮಾಡುತ್ತೇವೆ ಎಂದು ಹೇಳ್ಳೋದುಕಷ್ಟ. ಜೊತೆಗೆ ಬಿಡುಗಡೆ ಕುರಿತಾಗಿ ನಮ್ಮ ಹೀರೋ ದರ್ಶನ್‌ ಅವರಲ್ಲೂ ಚರ್ಚಿಸಬೇಕಿದೆ. ಅವರ ನಿರ್ಧಾರ ತುಂಬಾ ಮುಖ್ಯ. ಅದಕ್ಕಿಂತ ಹೆಚ್ಚಾಗಿ ನಾವು ಸಿನಿಮಾ ಮಾಡಿರೋದು ಜನರಿಗಾಗಿ. ಜನ ಭಯ ಬಿಟ್ಟು ಚಿತ್ರಮಂದಿರಕ್ಕೆ ಬರುವಂತಾಗಬೇಕು. ಆಗ ಚಿತ್ರ ಬಿಡುಗಡೆ ಮಾಡಿದರೆ ನಾವು ಪಟ್ಟ ಶ್ರಮಕ್ಕೂ ಒಂದು ಸಾರ್ಥಕತೆ ಸಿಗುತ್ತದೆ’ ಎನ್ನುವುದು ಉಮಾಪತಿಯವರ ಮಾತು.

“ರಾಬರ್ಟ್‌’ ಚಿತ್ರ ತೆಲುಗಿನಲ್ಲೂ ಬಿಡುಗಡೆಯಾಗುತ್ತಿದ್ದು, ಅದರ ತಯಾರಿ ಕೂಡಾ ನಡೆಯುತ್ತಿದೆ. ಸಿಂಧೂರ ಲಕ್ಷ್ಮಣ ಬಗ್ಗೆ ಈಗಲೇ ಏನೂ ಹೇಳಲಾರೆ: ನಿರ್ಮಾಪಕ ಉಮಾಪತಿಯವರು ದರ್ಶನ್‌ ಜೊತೆ “ಸಿಂಧೂರ ಲಕ್ಷ್ಮಣ’ ಸಿನಿಮಾ ಮಾಡಲು ಮುಂದಾಗಿದ್ದಾರೆ. ಈ ಚಿತ್ರವನ್ನು ತರುಣ್‌ ಸುಧೀರ್‌ ನಿರ್ದೇಶಿಸಲಿದ್ದಾರೆ.

ಹಾಗಾದರೆ ಈ ಚಿತ್ರ ಯಾವಾಗ ಆರಂಭವಾಗುತ್ತದೆ ಎಂಬ ಕುತೂಹಲ ಸಹಜ. ಈ ಬಗ್ಗೆ ಮಾತನಾಡುವ ಉಮಾಪತಿ, “ಆ ಚಿತ್ರದ ಬಗ್ಗೆ ಈಗಲೇ ಮಾತನಾಡುವುದು ಸರಿಯಲ್ಲ. ಏಕೆಂದರೆ ದರ್ಶನ್‌ ಅವರು ಇಷ್ಟು ವರ್ಷಗಳಲ್ಲಿ ಸಿನಿಮಾ ಪ್ರಮೋಶನ್‌, ಶೂಟಿಂಗ್‌ ವಿಚಾರದಲ್ಲಿ ಒಂದು ನಿಯಮ ಪಾಲಿಸಿಕೊಂಡು ಬಂದಿದ್ದಾರೆ. ಕೈಯಲ್ಲಿರುವ ಸಿನಿಮಾ ಮುಗಿಸದೇ ಅಥವಾ ಬಿಡುಗಡೆಯಾಗದೇ ಅವರು ಮತ್ತೂಂದು ಸಿನಿಮಾ ಬಗ್ಗೆ ಮಾತನಾಡುವುದಿಲ್ಲ. ಹಾಗಾಗಿ, ಸದ್ಯಕ್ಕೆ “ರಾಬರ್ಟ್‌’ ಕಡೆಗಷ್ಟೇ ನಮ್ಮ ಗಮನ’ ಎನ್ನುತ್ತಾರೆ ಉಮಾಪತಿ.­