ಸಪ್ತಸಾಗರ ದಾಟಲು ಬಂದ ನಾಯಕಿ: ರಕ್ಷಿತ್‌ ಶೆಟ್ಟಿಗೆ ರುಕ್ಮಿಣಿ ಜೋಡಿ

Team Udayavani, Feb 3, 2021, 9:16 AM IST

ರಕ್ಷಿತ್‌ ಶೆಟ್ಟಿ ಈಗಾಗಲೇ “777 ಚಾರ್ಲಿ’ ಚಿತ್ರದ ಚಿತ್ರೀಕರಣ ಮುಗಿಸಿದ್ದಾರೆ. ಈಗ ಮತ್ತೂಂದು ಹೊಸ ಸಿನಿಮಾಕ್ಕೆ ಅಣಿಯಾಗುತ್ತಿದ್ದಾರೆ. ಅದು “ಸಪ್ತಸಾಗರದಾಚೆ ಎಲ್ಲೋ’. ಹೌದು, ಹೀಗೊಂದು ವಿಭಿನ್ನ ಶೀರ್ಷಿಕೆಯ ಸಿನಿಮಾವನ್ನು ರಕ್ಷಿತ್‌ ಒಪ್ಪಿಕೊಂಡಿರುವ ವಿಚಾರ ನಿಮಗೆ ಗೊತ್ತೇ ಇದೆ. ಈಗ ಆ ಚಿತ್ರಕ್ಕೆ ನಾಯಕಿಯ ಆಯ್ಕೆಯಾಗಿದೆ.

ರುಕ್ಮಿಣಿ “ಸಪ್ತಸಾಗರದಾಚೆ ಎಲ್ಲೋ’ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಲಿದ್ದಾರೆ. ಯಾವ ರುಕ್ಮಿಣಿ ಎಂದು ನೀವು ಕೇಳಬಹುದು. ಈ ಹಿಂದೆ ಶ್ರೀನಿ ನಿರ್ದೇಶನದ “ಬೀರ್‌ಬಲ್‌’ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿರುವ ರುಕ್ಮಿಣಿ ಈಗ ರಕ್ಷಿತ್‌ ಚಿತ್ರಕ್ಕೆ ಆಯ್ಕೆಯಾಗಿದ್ದಾರೆ.

ಈ ಚಿತ್ರವನ್ನು ಪುಷ್ಕರ್‌ ನಿರ್ಮಿಸುತ್ತಿದ್ದು, ಹೇಮಂತ್‌ ರಾವ್‌ ನಿರ್ದೇಶಿಸುತ್ತಿದ್ದಾರೆ. ಈಗಾಗಲೇ ಈ ಮೂವರ ಕಾಂಬಿನೇಶನ್‌ನಲ್ಲಿ “ಗೋಧಿ ಬಣ್ಣ ಸಾಧಾರಣ ಮೈ ಕಟ್ಟು’ ಚಿತ್ರ ಬಂದಿದೆ

ಇದನ್ನೂ ಓದಿ:ಇನ್ಸ್‌ಪೆಕ್ಟರ್‌ ವಿಕ್ರಂ: ಪ್ರಜ್ವಲಿಸುತ್ತಿದೆ ಪವರ್‌ಪ್ಯಾಕ್‌ ಟ್ರೇಲರ್‌

ಈಗ ಮತ್ತೆ ಜೊತೆಯಾಗಿ “ಸಪ್ತ ಸಾಗರ…. ‘ದಾಟುತ್ತಿದ್ದಾರೆ. ಈ ತಿಂಗಳಾಂತ್ಯದಿಂದ ಚಿತ್ರದ ಚಿತ್ರೀಕರಣ ಆರಂಭವಾಗಲಿದೆ. ಬಿಡುಗಡೆಯಾದ ಚಿತ್ರದ ಟೈಟಲ್‌ ಪೋಸ್ಟರ್‌ ಗಮನ ಸೆಳೆಯುತ್ತಿದೆ.

ಸದ್ಯ ಪುಷ್ಕರ್‌ ಬ್ಯಾನರ್‌ನಲ್ಲಿ ಸತತವಾಗಿ ಸಿನಿಮಾಗಳು ಚಿತ್ರೀಕರಣದಲ್ಲಿವೆ. ಈ ವರ್ಷ ಪುಷ್ಕರ್‌ ನಿರ್ಮಾಣದದಲ್ಲಿ ಆರು ಚಿತ್ರಗಳು ತೆರೆಗೆ ಬರಲಿವೆ. “ಅವತಾರ್‌ ಪುರುಷ’, “ಅವತಾರ್‌ ಪುರುಷ-2′, “ಟೆನ್‌’, “777 ಚಾರ್ಲಿ’, “ಸಪ್ತಸಾಗರದಾಚೆ ಎಲ್ಲೋ’ ಹಾಗೂ ಅವರ ನಿರ್ಮಾಣದ ಮಲಯಾಳಂ ಚಿತ್ರ ತೆರೆಗೆ ಬರಲಿದೆ.