Samarjit Lankesh: ʼಗೌರಿʼ ಬಳಿಕ ಇಂದ್ರಜಿತ್‌ ಪುತ್ರನಿಗೆ ಬಾಲಿವುಡ್‌ನಿಂದ‌ ಬಿಗ್‌ ಆಫರ್

Team Udayavani, Sep 24, 2024, 12:52 PM IST

ಬೆಂಗಳೂರು: ಸ್ಯಾಂಡಲ್‌ ವುಡ್(‌Sandalwood) ನಲ್ಲಿ ʼಗೌರಿʼ(Gowri) ಸಿನಿಮಾದ ಮೂಲಕ ಮಿಂಚಿರುವ ನಿರ್ದೇಶಕ ಇಂದ್ರಜಿತ್ ಲಂಕೇಶ್ ಪುತ್ರ ಸಮರ್ಜಿತ್ ಲಂಕೇಶ್ ಅವರಿಗೆ ಬಾಲಿವುಡ್‌ನಿಂದ ಬುಲಾವ್‌ ಬಂದಿದೆ ಎಂದು ವರದಿಯಾಗಿದೆ.

ಇಂದ್ರಜಿತ್ ಲಂಕೇಶ್ ತಮ್ಮ ಪುತ್ರನನ್ನು ನಾಯಕನಾಗಿಸಿ ʼಗೌರಿʼ ಎನ್ನುವ ಸಿನಿಮಾವನ್ನು ಮಾಡಿದ್ದರು. ಈ ಸಿನಿಮಾಕ್ಕಾಗಿ ಸಮರ್ಜಿತ್ ಸಾಕಷ್ಟು ಶ್ರಮವಹಿಸಿ ತನ್ನ ನಟನೆಯ ಪ್ರತಿಭೆಯನ್ನು ತೋರಿಸಿದ್ದರು. ಸಿನಿಮಾದಲ್ಲಿನ ಅವರ ಅಭಿನಯ, ಡ್ಯಾನ್ಸ್‌ ಹಾಗೂ ಆ್ಯಕ್ಷನ್ ನೋಡಿ ಪ್ರೇಕ್ಷಕರು ಮೆಚ್ಚಿಕೊಂಡಿದ್ದರು.

ಸ್ಟೈಲಿಸ್ಟ್‌ & ಸ್ಮಾರ್ಟ್‌ ಆಗಿರುವ ಸಮರ್ಜಿತ್ ಚಾಕ್ಲೇಟ್‌ ಹೀರೋಯಂತೆ ಕಂಡರೂ ʼಗೌರಿʼಯಲ್ಲಿನ ಅವರ ಅಭಿನಯ ಎಲ್ಲಾ ವರ್ಗದ ಪ್ರೇಕ್ಷಕರಿಗೆ ಇಷ್ಟವಾಗಿತ್ತು. ಕಿಚ್ಚ ಸುದೀಪ್‌ ʼಗೌರಿʼ ಸಿನಿಮಾ ನೋಡಿ ಸಮರ್ಜಿತ್ ಬಾಲಿವುಡ್‌ಗೆ ಹೋಗುವ ಭವಿಷ್ಯವಿದೆ ಎನ್ನುವ ಅರ್ಥದಲ್ಲಿ ಅವರನ್ನು ಶ್ಲಾಘಿಸಿದ್ದರು.

ಇದೀಗ ಸಮರ್ಜಿತ್ ಅವರಿಗೆ ಬಾಲಿವುಡ್‌ನ ಖ್ಯಾತ ನಿರ್ಮಾಣ ಸಂಸ್ಥೆಯಿಂದ ಆಫರ್‌ ಬಂದಿದೆ ಎಂದು ಹೇಳಲಾಗುತ್ತಿದೆ. ನವ ಪ್ರತಿಭೆಗಳನ್ನು, ಸ್ಟಾರ್‌ ಕಿಡ್‌ ಗಳನ್ನು ಬಿಟೌನ್‌ಗೆ ಪರಿಚಯಿಸಿರುವ ಯಶಸ್ವಿಯಾಗಿರುವ ಖ್ಯಾತ ನಿರ್ಮಾಪಕ ಕರಣ್‌ ಜೋಹರ್‌ ಅವರ ಧರ್ಮ ಪ್ರೊಡಕ್ಷನ್ಸ್‌ ಸಮರ್ಜಿತ್ ಅವರಿಗೆ ಸಿನಿಮಾ ಮಾಡಲು ಯೋಜಿಸಿದ್ದು, ಈ ವಿಚಾರವಾಗಿ ಕರಣ್‌ ಜೋಹರ್‌ ನಿರ್ಮಾಣ ಸಂಸ್ಥೆ ಅವರ ಬಳಿ ಮಾತುಕತೆ ನಡೆಸಿದೆ ಎನ್ನಲಾಗಿದೆ.

ಬಹುತೇಕ ಸಮರ್ಜಿತ್ ಬಿಟೌನ್‌ಗೆ ಕಾಲಿಡುವುದು ಅಧಿಕೃತ ಎನ್ನಲಾಗುತ್ತಿದ್ದು, ಈ ನಡುವೆ ʼಗೌರಿʼ ಬಳಿಕ ತಮಿಳು – ತೆಲುಗಿನಿಂದಲೂ ಅವರಿಗೆ ಆಫರ್‌ ಬರುತ್ತಿದೆ ಎನ್ನಲಾಗಿದೆ. ತಮಿಳಿನ ಖ್ಯಾತ ನಿರ್ಮಾಣ ಸಂಸ್ಥೆ ಲೈಕಾ ಪ್ರೊಡಕ್ಷನ್ ಹೌಸ್‌ ಕೂಡ ಸಮರ್ಜಿತ್ ಅವರೊಂದಿಗೆ ಸಿನಿಮಾ ಮಾಡಲು ಯೋಜಿಸಿದೆ ಎನ್ನಲಾಗಿದೆ.

ಬಾಲಿವುಡ್‌ – ಕಾಲಿವುಡ್‌ ಎರಡೂ ಕಡೆಯಿಂದ ಬಂದಿರುವ ಆಫರ್‌ನಲ್ಲಿ ಮೊದಲು ಯಾವ ಸಿನಿಮಾಕ್ಕೆ ಸಮರ್ಜಿತ್ ಗ್ರೀನ್‌ ಸಿಗ್ನಲ್‌ ನೀಡುತ್ತಾರೆ ಎನ್ನುವುದನ್ನು ಕಾದುನೋಡಬೇಕಿದೆ.

‘ಗೌರಿʼ ಸಿನಿಮಾದಲ್ಲಿ ಸಮರ್ಜಿತ್ ಜತೆ ಸಾನ್ಯಾ ಅಯ್ಯರ್, ಮಾನಸಿ ಸುಧೀರ್, ಸಂಪತ್ ಮೈತ್ರೇಯ ಮುಂತಾದವರು ನಟಿಸಿದ್ದರು.