ಟ್ರೇಲರ್‌ನಲ್ಲಿ ‘ಸಾಮರ್ಥ್ಯ’ ದರ್ಶನ

Team Udayavani, May 31, 2022, 12:24 PM IST

“ಕಾರ್ತಿಕ್‌ ಮೂವೀಸ್‌’ ಬ್ಯಾನರ್‌ನಲ್ಲಿ ರಾಜರಬಂಡಿ ಕಾರ್ತಿಕ್‌ ನಿರ್ಮಿಸುತ್ತಿರುವ “ಸಾಮರ್ಥ್ಯ’ ಚಿತ್ರ ತೆರೆಗೆ ಬರಲು ಸಿದ್ಧವಾಗಿದೆ. ಇದೀಗ ಚಿತ್ರದ ಪ್ರಚಾರ ಕಾರ್ಯಗಳಿಗೆ ಚಾಲನೆ ನೀಡಿರುವ ಚಿತ್ರತಂಡ, ಇತ್ತೀಚೆಗೆ “ಸಾಮರ್ಥ್ಯ’ ಚಿತ್ರದ ಆಡಿಯೋ ಮತ್ತು ಟ್ರೇಲರ್‌ ಅನ್ನು ಬಿಡುಗಡೆ ಮಾಡಿದೆ.

ಹೆಚ್‌. ವಾಸು ನಿರ್ದೇಶನದಲ್ಲಿ ಮೂಡಿಬಂದಿರುವ “ಸಾಮರ್ಥ್ಯ’ ಚಿತ್ರದಲ್ಲಿ ಯುವನಟ ಬಾಲಾಜಿ ಶರ್ಮ, ಗಗನ ಮಧು ಜೋಡಿಯಾಗಿ ಕಾಣಿಸಿಕೊಂಡಿದ್ದು, ಉಳಿದಂತೆ ಶೋಭರಾಜ್‌, ಅವಿನಾಶ್‌, ದಶರಥ್‌ ಅಭಿ, ರವೀಂದ್ರನಾಥ್‌, ಪೆಟ್ರೋಲ್‌ ಪ್ರಸನ್ನ, ಮಡೆನೂರು ಮನು, ಸ್ವಾತಿ, ಶಶಿಕುಮಾರ್‌ ಮೊದಲಾದವರು ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಟ್ರೇಲರ್‌ ಮತ್ತು ಆಡಿಯೋ ಬಿಡುಗಡೆ ವೇಳೆ ಮಾತನಾಡಿದ ನಿರ್ದೇಶಕ ಹೆಚ್‌. ವಾಸು, “1994ರಲ್ಲಿ “ರವಿತೇಜ’ ಚಿತ್ರದ ಮೂಲಕ ನಿರ್ದೇಶಕನಾಗಿ ಗುರುತಿಸಿಕೊಂಡು, ಇಲ್ಲಿಯವರೆಗೂ ಸುಮಾರು 24 ಸಿನಿಮಾಗಳನ್ನು ನಿರ್ದೇಶಿಸಿದ್ದೇನೆ. “ಸಾಮರ್ಥ್ಯ’ ಲವ್‌ ಕಂ ಸಸ್ಪೆನ್ಸ್‌- ಥ್ರಿಲ್ಲರ್‌ ಸಬ್ಜೆಕ್ಟ್ ಸಿನಿಮಾ. ನನ್ನ ಹಿಂದಿನ ಎಲ್ಲ ಸಿನಿಮಾಗಳಿಗಿಂತ ವಿಭಿನ್ನ ರೀತಿಯಲ್ಲಿ ಸಿನಿಮಾ ಬಂದಿದೆ. ಇಂದಿನ ಆಡಿಯನ್ಸ್‌ಗೆ ಇಷ್ಟವಾಗುವಂತೆ ಸಿನಿಮಾ ಇದೆ’ ಎಂದು ಕಥಾಹಂದರದ ಬಗ್ಗೆ ಮಾಹಿತಿ ನೀಡಿದರು.

“ಎಲ್ಲಾ ತರಹ ಉದ್ಯಮಗಳನ್ನು ಕಂಡಿದ್ದೇನೆ. ಸಿನಿಮಾ ವ್ಯವಹಾರ ತಿಳಿಯಲು ಬಂಡವಾಳ ಹೂಡಿದೆ. ಆದರೂ ಸಿನಿಮಾ ಮಾಡಲು ಎರಡು ಗುಂಡಿಗೆ ಇರಬೇಕು. ಒಂದು ಒಳ್ಳೆಯ ಸಿನಿಮಾ ಮಾಡಿದ್ದೇವೆ. ಜುಲೈ ತಿಂಗಳಿನಲ್ಲಿ ಸಿನಿಮಾ ಬಿಡುಗಡೆ ಮಾಡುವ ಯೋಚನೆ ಇದೆ’ ಎನ್ನುವುದು ನಿರ್ಮಾಪಕ ಶ್ರೀನಾಥ್‌ ಮಾತು.

“ಸಾಮರ್ಥ್ಯ’ ಚಿತ್ರದ ಹಾಡುಗಳಿಗೆ ಕಲೈ, ತ್ರಿಭುವನ್‌ ನೃತ್ಯ ಸಂಯೋಜಿಸಿದ್ದು, ಸಾಹಸ ದೃಶ್ಯಗಳಿಗೆ ಅರ್ಜುನ್‌, ಡಿಫ‌ರೆಂಟ್‌ ಡ್ಯಾನಿ, ಕೌರವ ವೆಂಕಟೇಶ್‌, ವಿನೋದ್‌ ತಲಾ ಒಂದೊಂದು ಸಾಹಸಕ್ಕೆ ಸಂಯೋಜನೆ ಮಾಡಿದ್ದಾರೆ. ಸಕಲೇಶಪುರ, ಹಾಸನ, ಚಿಕ್ಕಮಗಳೂರು, ಬೆಂಗಳೂರು ಸುತ್ತಮುತ್ತ ಸುಮಾರು 35 ದಿನಗಳ ಕಾಲ ಒಂದೇ ಹಂತದಲ್ಲಿ “ಸಾಮರ್ಥ್ಯ’ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ. ಚಿತ್ರಕ್ಕೆ ಕೆ. ಕೃಷ್ಣಕುಮಾರ್‌ ಛಾಯಾಗ್ರಹಣವಿದೆ.