ಲವ್‌ ಮಾಕ್ಟೇಲ್‌ ಹುಡುಗಿ ಸಿಕ್ಕಾಪಟ್ಟೆ ಬಿಝಿ

Team Udayavani, Aug 5, 2023, 10:36 AM IST

“ಲವ್‌ ಮಾಕ್ಟೇಲ್‌’ ಚಿತ್ರದಲ್ಲಿ ಸಖತ್‌ ಎನರ್ಜಿಟಿಕ್‌ ಆಗಿ ಪಟ್‌ ಪಟ್‌ ಅಂತಾ ಮಾತನಾಡುತ್ತಾ, ಪ್ರತಿ ಮಾತಿಗೂ “ಹೆಂಗೆ ನಾವೂ’ ಅಂತಾ ಹೇಳುತ್ತಲೇ ಕೋಟಿ ಕನ್ನಡಿಗರ ಹೃದಯ ಗೆದ್ದೆ ಚೆಲುವೆ ರಚನಾ ಇಂದರ್‌. ಲವ್‌ ಮಾಕ್ಟೇಲ್‌ ಚಿತ್ರದಲ್ಲಿನ ತಮ್ಮ  ಅಭಿನಯಕ್ಕೆ ಸಾಕಷ್ಟು ಪ್ರಶಂಸೆಯನ್ನು ಪಡೆದ ರಚನಾ, ಈಗ ಸಖತ್‌ ಬ್ಯುಸಿಯಾಗಿದ್ದಾರೆ. ಒಂದರ ಮೇಲೊಂದು ಚಿತ್ರಗಳಲ್ಲಿ  ಅಭಿನಯಿಸುತ್ತಿರುವ ರಚನಾ ಕೈಯಲ್ಲಿ ಮೂರ್‍ನಾಲ್ಕು ಸಿನಿಮಾಗಳಿವೆ. ಅದರಲ್ಲಿ “4ಎನ್‌6′ ಹಾಗೂ “ನಾನು ಮತ್ತು ಗುಂಡ-2′ ಚಿತ್ರಗಳು ಕೂಡಾ ಸೇರಿವೆ.

ಡಿಟೆಕ್ಟಿವ್‌ ರಚನಾ:

ನಟಿ ರಚನಾ ಇಂದರ್‌ “4 ಎನ್‌ 6′ ಎಂಬ ಸಿನಿಮಾದಲ್ಲಿ  ನಟಿಸಿದ್ದು, ಸದ್ದಿಲ್ಲದೇ ಚಿತ್ರೀಕರಣ ಪೂರೈಸಿದೆ ಚಿತ್ರತಂಡ. ಮರ್ಡರ್‌ ಮಿಸ್ಟರಿ ಜೊತೆಗೆ ಥ್ರಿಲ್ಲರ್‌ ಕಥಾಹಂದರದ ಈ ಚಿತ್ರವನ್ನು ಸಾಯಿಪ್ರೀತಿ ಅವರು ನಿರ್ಮಾಣ ಮಾಡುತ್ತಿದ್ದಾರೆ. ನವೀನ್‌ ಕುಮಾರ್‌ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿರುವ ಈ ಚಿತ್ರಕ್ಕೆ  ದರ್ಶನ್‌ ಶ್ರೀನಿವಾಸ್‌ ಅವರು  ನಿರ್ದೇಶನವಿದೆ. ಕೊಲೆಯೊಂದರ ತನಿಖೆಯ ಸುತ್ತ ನಡೆಯುವ ಕಥಾಹಂದರ ಒಳಗೊಂಡ ಚಿತ್ರ ಇದಾಗಿದ್ದು, ನಟಿ ರಚನಾ ಇಂದರ್‌ ಅವರು ಮೊದಲ ಬಾರಿಗೆ ಫಾರೆನ್ಸಿಕ್‌ ಡಿಟೆಕ್ಟಿವ್‌ ಪಾತ್ರದಲ್ಲಿ ನಟಿಸಿದ್ದಾರೆ.

ಸದ್ಯ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳಲ್ಲಿ ಬಿಝಿಯಾಗಿರುವ ಚಿತ್ರತಂಡ ಶೀಘ್ರದಲ್ಲಿ ಚಿತ್ರದ ಟೀಸರ್‌  ರಿಲೀಸ್‌ ಮಾಡಲಿದೆ. ಚರಣ್‌ ತೇಜ್‌ ಅವರ ಛಾಯಾಗ್ರಹಣ, ಸತ್ಯಕಹಿ ಅವರ ಸಂಭಾಷಣೆ ಹಾಗೂ ಸಾಯಿ ಸೋಮೇಶ್‌ ಅವರ ಸಂಗೀತ ಚಿತ್ರಕ್ಕಿದೆ. ಭವಾನಿ ಪ್ರಕಾಶ್‌, ಮೇಘನಾ, ಸಂಜಯ್‌ ನಾಯಕ್‌, ಸೌರವ್‌, ಸತ್ಯ ಹಾಗೂ ರೇಣುಕಾ ಹಾಗೂ ಇತರರು ಈ ಚಿತ್ರದಲ್ಲಿ ಅಭಿನಯಿಸಿದ್ದಾರೆ.

ಮಾಡಲಿಂಗ್‌ ಬಯಸಿದ್ದ ರಚನಾ:

ಸಾಮಾನ್ಯವಾಗಿ ಸಿನಿಮಾ ಕ್ಷೇತ್ರಕ್ಕೆ ಎಂಟ್ರಿಕೊಡಬೇಕು ಅಂದರೆ ಒಂದು ಬ್ಯಾಗ್ರೌಂಡ್‌, ಮಾಡಲಿಂಗ್‌ ಅನುಭವ ಇರಬೇಕು. ಇಲ್ಲ ಅಂದರೆ ತುಸು ಕಷ್ಟ ಇಲ್ಲಿ ಉಳಿಯಲು ಅನ್ನೋ ಭಾವನೆಯಿದೆ. ಮಾಡೆಲಿಂಗ್‌ ಕ್ಷೇತ್ರದಲ್ಲಿ ಮಿಂಚಿ ಬಳಿಕ ನಟಿಯಾದವರ ಸಂಖ್ಯೆ ಬಹಳಷ್ಟಿದೆ. ಈ ನಿಟ್ಟಿನಲ್ಲಿ ತಾನು ಮಾಡೆಲಿಂಗ್‌ ಪ್ರವೇಶಿದರೆ ಸಿನಿರಂಗಕ್ಕೆ ಪ್ರವೇಶ ಪಡೆಯಬಹುದು ಎಂಬ ಆಸೆ ರಚನಾಗೆ. ಬಾಲ್ಯದ ದಿನಗಳಿಂದ ಅಭಿನಯ, ಸಿನಿಮಾ ಕ್ಷೇತ್ರದಲ್ಲಿ  ಆಸಕ್ತಿ ಇದ್ದ  ರಚನಾಗೆ ಮಾಡೆಲಿಂಗ್‌ ಮೂಲಕ ಸಿನಿರಂಗ ಪ್ರವೇಶಿಸಬಹುದು ಎಂದು ಮೊದಲು ಅದರ ತಯಾರಿ ಆರಂಭಿಸದರಂತೆ. ಮಾಡೆಲ್‌ಗ‌ಳಂತೆ ಫೋಟೋ ಶೂಟ್‌ ಕೂಡಾ ಮಾಡಿಸಿದ್ದರಂತೆ. ಅದರ ಪರಿಣಾಮ ಈಗ ಚಿತ್ರರಂಗದಲ್ಲಿ ಅವಕಾಶ ಸಿಕ್ಕಿ, ಬಿಝಿಯಾಗುತ್ತಿದ್ದಾರೆ.  ಇಂಥದ್ದೇ ಪಾತ್ರ ಮಾಡಬೇಕು ಎಂದು ಗೆರೆ ಹಾಕಿಕೊಂಡಿಲ್ಲವಂತೆ ರಚನಾ. “ನಾನು ಪಾತ್ರ ಎಂಥದ್ದೇ ಆದರು ನನಗೆ ಅಭಿನಯದ ಅವಕಾಶ ವಿರಬೇಕು. ಆದರೆ ಆ್ಯಕ್ಷನ್‌ ಪಾತ್ರಗಳು, ಚಿತ್ರದ ಕಥೆಯನ್ನು ಪ್ರಭಾವಿಸುವ ಪಾತ್ರಗಳು ಮಾಡಬೇಕು. ತೆರೆ ಮೇಲೆ ಕೇವಲ ಬಂದು ಹೋಗುವ ಬದಲು  ಅಭಿನಯನಕ್ಕೆ ಒತ್ತು ಇರುವ ಪಾತ್ರ ನನಗಿಷ್ಟ’ ಎನ್ನುವುದು ರಚನಾ ಅವರ ಆಶಯ.

ಬಯಸದೇ ಬಂದ ಭಾಗ್ಯ :

ತರಬೇತಿ ಕೇಂದ್ರದಲ್ಲಿ ಅಭಿನಯದ ಕುರಿತು ಪಳಗುವ ಮುನ್ನವೇ ಬಂದ ಮೊದಲ ಸಿನಿಮಾದ ಅವಕಾಶ ಅಭಿನಯದ ಕುರಿತು ಸಾಕಷ್ಟು ಕಲಿಯುವಂತೆ ಮಾಡಿತ್ತು. ಚಿತ್ರತಂಡ ಅಭಿನಯದ ಮತ್ತಷ್ಟು ಮಜಲುಗಳನ್ನು  ರಚನಾಗೆ ತಿಳಿಸಿತ್ತು. “ಆಗ ತಾನೆ ನಟನಾ ತರಬೇತಿಗೆ ಸೇರಿದವಳು ನಾನು , ಈ ಚಿತ್ರಕ್ಕೆ ಆಯ್ಕೆ ಆದೆ. ಹಾಗಾಗಿ, ಅಭಿನಯದ ಕುರಿತು ಅಷ್ಟು  ತಿಳಿದಿರಲಿಲ್ಲ . ಆದರೆ ಲವ್‌ ಮಾಕ್ಟೇಲ್‌ನಲ್ಲಿ ಅದರ ಅನುಭವ ಪಡೆದೆ. ಮೊದಲ ಚಿತ್ರದ ಮೂಲಕ ಕಲಿತೆ’ ಎನ್ನುವುದು ರಚನಾ ಮಾತು.