ಸಂಗೀತಾ ಕೈಯಲ್ಲಿ ಲೋಡೆಡ್‌ ಗನ್‌!

Team Udayavani, Apr 17, 2017, 11:36 AM IST

“ಎರಡನೇ ಸಲ’ ಚಿತ್ರ ದೊಡ್ಡ ಹಿಟ್‌ ಆಗುತ್ತದೆ, ಈ ಸಿನಿಮಾ ಮೂಲಕ ತನಗೆ ಒಂದಷ್ಟು ಆಫ‌ರ್‌ಗಳು ಬರುತ್ತವೆ ಎಂದು ಭಾವಿಸಿಕೊಂಡಿದ್ದ ಸಂಗೀತಾಗೆ ಆ ಸಿನಿಮಾದಿಂದ ಹೇಳಿಕೊಳ್ಳುವಂತಹ ಲಾಭವಾಗಲಿಲ್ಲ. ಸಿನಿಮಾ ಬಗ್ಗೆ, ಸಂಗೀತಾ ನಟನೆ ಬಗ್ಗೆ ಮೆಚ್ಚುಗೆ ವ್ಯಕ್ತವಾದರೂ ಚಿತ್ರ ಮಾತ್ರ ಹೆಚ್ಚು ದಿನ ಚಿತ್ರಮಂದಿರಗಳಲ್ಲಿ ನಿಲ್ಲಲಿಲ್ಲ.

ನಂಬಿಕೆ ಇಟ್ಟ ಚಿತ್ರ ಕೈ ಹಿಡಿಯದೇ ಹೋದ ಬೇಸರ ಸಂಗೀತಾಗೆ ಕಾಡಿದ್ದು ಸುಳ್ಳಲ್ಲ. ಇದೇ ಬೇಸರದಲ್ಲಿ ಸಂಗೀತಾ ಮತ್ತೆ ಕೈಗೆ “ಲೋಡೆಡ್‌ ಗನ್‌’ ತಗೊಂಡಿದ್ದಾರೆ! ಹೌದು, ಸಂಗೀತಾ ಭಟ್‌ ಈಗ ಹೊಸ ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾರೆ. ಅದು “ಲೋಡೆಡ್‌ ಗನ್‌’. ಈ ಚಿತ್ರ ಆರಂಭವಾಗಿದ್ದು “ಎರಡನೇ ಸಲ’ ಬಿಡುಗಡೆಗೆ ಮುನ್ನವಾದರೂ ನೋಟ್‌ ಬ್ಯಾನ್‌ ಎಫೆಕ್ಟ್ ಚಿತ್ರತಂಡಕ್ಕೆ ತಟ್ಟಿದ್ದರಿಂದ ಕೆಲ ಚಿತ್ರೀಕರಣ ನಿಲ್ಲಿಸಿದ ಚಿತ್ರತಂಡ ಈಗ ಮತ್ತೆ ಚಿತ್ರೀಕರಣ ಆರಂಭಿಸಿದೆ.

ಈ ಚಿತ್ರದಲ್ಲಿ ಸಂಗೀತಾ ಭಟ್‌ ನಾಯಕಿಯಾಗಿ ನಟಿಸುತ್ತಿದ್ದು, ಬ್ಲಾಗ್‌ ಬರೆಯುವ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರಂತೆ. ತಾನು ಕಂಡ ಯಾವುದಾದರೂ ಘಟನೆಯ ಸತ್ಯಾಸತ್ಯತೆ ತಿಳಿದುಕೊಂಡು ಆ ಕುರಿತು ತನ್ನ ಬ್ಲಾಗ್‌ನಲ್ಲಿ ಬರೆದುಕೊಳ್ಳುವ ಪಾತ್ರ ಅವರದಂತೆ. ಚಿತ್ರದಲ್ಲಿ ಕಾಮಿಡಿಗೂ ಹೆಚ್ಚಿನ ಆದ್ಯತೆ ಇದ್ದು, ಕನ್ನಡದ ಬಹುತೇಕ ಹಾಸ್ಯ ಕಲಾವಿದರು ಈ ಚಿತ್ರದಲ್ಲಿ ನಟಿಸುತ್ತಿದ್ದಾರಂತೆ.

ಪ್ರತಾಪ್‌ ಪವನ್‌ ಈ ಚಿತ್ರದ ನಾಯಕ. ತೆಲುಗಿನ ಶಂಕರ್‌ ನಾರಾಯಣ ರೆಡ್ಡಿ ಎನ್ನುವವರು ಈ ಸಿನಿಮಾವನ್ನು ನಿರ್ದೇಶನ ಮಾಡುತ್ತಿದ್ದಾರೆ. ಇದು ಬಿಟ್ಟರೆ ಸಂಗೀತಾ ಭಟ್‌ ಈಗ “ದಯವಿಟ್ಟು ಗಮನಿಸಿ’ ಹಾಗೂ “ಕಿಸ್ಮತ್‌’ ಚಿತ್ರಗಳಿಗೆ ಎದುರು ನೋಡುತ್ತಿದಾರೆ. ಆ ಎರಡೂ ಚಿತ್ರಗಳು ಬಿಡುಗಡೆಗೆ ರೆಡಿಯಾಗಿದ್ದು, ಎರಡಲ್ಲೂ ಸಂಗೀತಾಗೆ ಒಳ್ಳೆಯ ಪಾತ್ರ ಸಿಕ್ಕಿದೆಯಂತೆ.