ಮೊಂಬತ್ತಿಯಲ್ಲಿ ಬಿಗ್‌ಬಾಸ್‌ ಖ್ಯಾತಿಯ ಸಂಜನಾ!

Team Udayavani, Jan 19, 2017, 11:36 AM IST

ಬಿಗ್‌ಬಾಸ್‌ ಮನೆಯ ಕಾಲ್ಗುಣವೇ ಅಂಥದ್ದು! ಈಗಾಗಲೇ ಆ ಮನೆಗೆ ಹೋಗಿ ಬಂದವರು ಗುರುತಿಸಿಕೊಂಡಿದ್ದು ನಿಜ. ಕೆಲವರಿನ್ನೂ ಆ ಪ್ರಯತ್ನದಲ್ಲಿದ್ದಾರೆ. ಈಗ ಹೊಸ ಸುದ್ದಿಯೆಂದರೆ, “ಬಿಗ್‌ಬಾಸ್‌’ ಮನೆಯಲ್ಲಿ ತುಂಡುಡುಗೆ ಹುಡುಗಿ ಎಂದೇ ಕರೆಸಿಕೊಂಡಿದ್ದ ಸಂಜನಾ ಈಗ, ಗಾಂಧಿನಗರಕ್ಕೆ ಎಂಟ್ರಿಕೊಟ್ಟಿದ್ದಾರೆ. “ಬಿಗ್‌ಬಾಸ್‌’ ಮನೆಯಿಂದ ಹೊರಬಂದ ಸಂಜನಾಗೆ ಸಿನಿಮಾವೊಂದರ ಅವಕಾಶ ಸಿಕ್ಕಿದೆ. ಹಾಗಂತ, ಸಂಜನಾ ನಾಯಕಿ ಅಂದುಕೊಳ್ಳಬೇಡಿ!! ಬದಲಿಗೆ ಆ ಚಿತ್ರದ ಐಟಂ ಸಾಂಗ್‌ವೊಂದಕ್ಕೆ ಸ್ಟೆಪ್‌ ಹಾಕಿದ್ದಾರೆ.

ಹೌದು, ಬಿಗ್‌ಬಾಸ್‌ ಮನೆಯಿಂದ ಹೊರಬರುತ್ತಿದ್ದಂತೆಯೇ ಸಂಜನಾಗೆ ಈ ಅಪೂರ್ವ ಅವಕಾಶವೊಂದು ಸಿಕ್ಕಿದೆ! ಬಪ್ಪರೆ, ಸಂಜನಾ ಅಷ್ಟಕ್ಕೂ ಆ ಸಾಂಗ್‌ನಲ್ಲಿ ಕಾಣಿಸಿಕೊಂಡ ಚಿತ್ರ ಯಾವುದು ಗೊತ್ತಾ? “ಮೊಂಬತ್ತಿ’. ಪ್ರಭಾಕರ್‌ ನಿರ್ಮಾಣದ ಈ ಚಿತ್ರವನ್ನು ಶ್ರೀನಿವಾಸ್‌ ಕೌಶಿಕ್‌ ನಿರ್ದೇಶಿಸುತ್ತಿದ್ದಾರೆ. ಚಿತ್ರಕಥೆ, ಸಂಭಾಷಣೆಯೂ ಇವರದೇ. ಈ ಸಿನಿಮಾದಲ್ಲಿ ರವಿಕುಮಾರ್‌ ಮತ್ತು ರಚನಾ ನಾಯಕ, ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. 

ಇತ್ತೀಚೆಗೆ ಕಂಠೀರವ ಸ್ಟುಡಿಯೋದಲ್ಲಿ ಹಾಕಿದ್ದ ಅದ್ಧೂರಿ ಸೆಟ್‌ನಲ್ಲಿ “ಏನೇ ಬರಲಿ ಡ್ಯಾಮ್‌ ಐ ಡೋಂಟ್‌ ಕೇರ್‌…’ ನಾನಾಡೋ ಮಾತುಗಳು ಎಲ್ಲಾ ಫೇರ್‌’ ಎಂಬ ಹಾಡಿಗೆ ಸಂಜನಾ ಸ್ಟೆಪ್‌ ಹಾಕಿದ್ದಾರೆ. ಅಕ್ಷಯ್‌ ಮತ್ತು ರೋಬೋ ಗಣೇಶ್‌ ಕೂಡ ಈ ಹಾಡಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಹಾಡಿನ ಮೂಲಕ ಚಿತ್ರೀಕರಣ ಮುಕ್ತಾಯಗೊಂಡಿದೆ. ಸಕಲೇಶಪುರ ಹಾಗೂ ಮಂಗಳೂರು ಸುತ್ತಮುತ್ತ “ಕಣ್ಣ ರೆಪ್ಪ ಮುಚ್ಚಲು ನಿನ್ನದೇ ಧ್ಯಾನ’ ಮತ್ತು “ಜಾರಿ ಹೋದಂತೆ ಮನಸೂರೆಯಾದಂಗೆ’ ಎಂಬ ಎರಡು ಹಾಡುಗಳನ್ನು ಚಿತ್ರೀಕರಿಸಿತ್ತು ಚಿತ್ರತಂಡ.

ಒಂದು ಐಟಂ ಸಾಂಗ್‌ವೊಂದನ್ನು ಬಾಕಿ ಉಳಿಸಿಕೊಂಡಿತ್ತು. ಆ ಹಾಡಲ್ಲಿ ಯಾರನ್ನು ಕುಣಿಸಬೇಕು ಅಂದುಕೊಳ್ಳುತ್ತಿದ್ದಂತೆಯೇ, “ಬಿಗ್‌ಬಾಸ್‌’ನಿಂದ ಹೊರಬಂದ ಸಂಜನಾ ನೆನಪಾಗಿ, ಕೊನೆಗೆ ಆ ಹಾಡು ಸಂಜನಾಳ ಪಾಲಾಗಿದೆ. ಚಿತ್ರಕ್ಕೆ ಶ್ಯಾಮ್‌ ಸಿಂಧನೂರು ಕ್ಯಾಮೆರಾ ಹಿಡಿದರೆ, ಸತೀಶ್‌ಬಾಬು ಸಂಗೀತವಿದೆ. ಕಂಬಿರಾಜ್‌ ಮತ್ತು ಜಗ್ಗು ನೃತ್ಯ ನಿರ್ದೇಶನ ಮಾಡಿದ್ದಾರೆ. ಚಿತ್ರದಲ್ಲಿ ನೀತು, ಗಿರೀಶ್‌, ಜತ್ತಿ, ಪ್ರಭಾಕರ್‌, ಯತಿರಾಜ್‌, ಸಂಗೀತ, ಚಂದ್ರಕಾಂತ್‌, ಮೈಕೋ ಶಿವು, ಮಾರುತಿರಾಜ್‌ ಇತರರು ನಟಿಸಿದ್ದಾರೆ.