ಥಿಯೇಟರ್‌ ಗೆ ಬಂದ ‘ಡಿಯರ್‌ ಸತ್ಯ’

Team Udayavani, Mar 11, 2022, 3:53 PM IST

“ಪರ್ಪಲ್‌ರಾಕ್‌ ಎಂಟರ್‌ ಟೈನರ್‌’ ಹಾಗೂ “ವಿಂಟರ್‌ ಬ್ರಿಡ್ಜ್ ಸ್ಟುಡಿಯೋಸ್‌’ ಲಾಂಛನದಲ್ಲಿ ಗಣೇಶ್‌ ಪಾಪಣ್ಣ, ಯತೀಶ್‌ ವೆಂಕಟೇಶ್‌, ಶ್ರೀನಿವಾಸ್‌ ಶ್ರೀಭಕ್ತ ಹಾಗೂ ಅಜಯ್‌ ಅಪರೂಪ ಅವರು ನಿರ್ಮಿಸಿರುವ “ಡಿಯರ್‌ ಸತ್ಯ’ ಚಿತ್ರ ಈ ವಾರ ತೆರೆಗೆ ಬಂದಿದೆ.

ಕಳೆದ ಕೆಲ ದಿನಗಳಿಂದ ಚಿತ್ರದ ಪ್ರಚಾರ ಕಾರ್ಯದಲ್ಲಿ ನಿರತವಾಗಿದ್ದ ಚಿತ್ರತಂಡ ಅಂತಿಮವಾಗಿ “ಡಿಯರ್‌ ಸತ್ಯ’ನನ್ನು ಪ್ರೇಕ್ಷಕರ ಮುಂದೆ ತಂದಿದೆ. ಇನ್ನು ಚಿತ್ರದ ಪ್ರಚಾರ ಹಂತದಲ್ಲಿ ನಟ ಶ್ರೀಮುರಳಿ ಅವರ ಕೈಯಿಂದ ಚಿತ್ರದ ಟ್ರೇಲರ್‌ ಹೊರಬಂದಿತ್ತು.

ಈ ವೇಳೆ ಮಾತನಾಡಿದ ಶ್ರೀಮುರಳಿ, “ಸಂತೋಷ್‌ ನನಗೆ ತುಂಬಾ ವರ್ಷಗಳ ಸ್ನೇಹಿತ. ಈಗ ಆರ್ಯನ್‌ ಸಂತೋಷ್‌ ಆಗಿದ್ದಾರೆ. ನಿರ್ಮಾಪಕ ಯತೀಶ್‌, ಗಣೇಶ್‌ ಪಾಪಣ್ಣ ಕೂಡ ನನಗೆ ಬಹಳ ದಿನಗಳ ಪರಿಚಯ. ಟ್ರೇಲರ್‌ ತುಂಬಾ ಚೆನ್ನಾಗಿ ಮೂಡಿಬಂದಿದೆ. ಈ ಚಿತ್ರದಲ್ಲಿ ಉಪ್ಪಿ ಸರ್‌ ಹಾಡಿರುವ ಹಾಡು ನನಗಿಷ್ಟ. ಎಲ್ಲದಕ್ಕಿಂತ ನನ್ನ ಸ್ನೇಹಿತ ಸಂತೋಷ್‌ಗೆ ಈ ಚಿತ್ರ ಯಶಸ್ಸು ತಂದು ಕೊಡಲಿ’ ಎಂದು ಹಾರೈಸಿದರು.

ಇದನ್ನೂ ಓದಿ:ಕಡಲ ತಡಿಯಲ್ಲಿ ಆಪರೇಶನ್‌ ಡಿ ಹಾಡು..; ಮಲ್ಪೆಯಲ್ಲಿ ಸಾಗಿದ ಚಿತ್ರೀಕರಣ

“ಚೆನ್ನೈನ ಹೈಕೋರ್ಟ್‌ ಎದುರು ಪ್ಯಾರಿಸ್‌ ಕಾರ್ನರ್‌ ಎಂಬ ಸ್ಥಳವಿದೆ. ಆ ಜಾಗವೇ ನನಗೆ ಕಥೆ ರಚಿಸಲು ಸ್ಪೂರ್ತಿ. ಇದೊಂದು ನೈಜಘಟನೆ ಆಧಾರಿತ ಚಿತ್ರ. ಕಥೆ ಸಿದ್ದಮಾಡಿಕೊಂಡ ಮೇಲೆ ನಿರ್ಮಾಪಕರ ಹುಡುಕಾಟದಲ್ಲಿ ಸಾಕಷ್ಟು ವರ್ಷ ಕಳೆದಿದ್ದೇನೆ. ನಂತರ ಗಣೇಶ್‌ ಪಾಪಣ್ಣ ಅವರು ಫೋನ್‌ ಮಾಡಿ ಕಥೆ ಕೇಳಿದರು. ಗಣೇಶ್‌, ಯತೀಶ್‌, ಶ್ರೀನಿವಾಸ್‌ ಶ್ರೀಭಕ್ತ ಹಾಗೂ ಅಜಯ್‌ ಪರ್ಪಲ್‌ ರಾಕ್‌ ಸಂಸ್ಥೆ ಮೂಲಕ ಈ ಚಿತ್ರ ನಿರ್ಮಾಣಕ್ಕೆ ಮುಂದಾದರು. ಟ್ರೇಲರ್‌ ಬಿಡುಗಡೆ ಮಾಡಿಕೊಟ್ಟ ಗೆಳೆಯ ಶ್ರೀಮುರಳಿ ಹಾಗೂ ನನ್ನ ಗೆಳೆತನ ದಶಕಕ್ಕೂ ಮೀರಿದ್ದು. ನಿರ್ಮಾಪಕರಿಗೆ ಹಾಗೂ ಚಿತ್ರತಂಡಕ್ಕೆ ನಾನು ಆಬಾರಿ’ ಎಂಬುದು ಚಿತ್ರದ ಬಗ್ಗೆ ನಾಯಕ ಆರ್ಯನ್‌ ಸಂತೋಷ್‌ ಮಾತು.

ಚಿತ್ರದ ನಿರ್ದೇಶಕ ಶಿವಗಣೇಶ್‌, ನಾಯಕಿ ಅರ್ಚನಾ ಕೊಟ್ಟಿಗೆ ಸೇರಿದಂತೆ ಚಿತ್ರದಲ್ಲಿ ನಟಿಸಿರುವ ಅನೇಕ ಕಲಾವಿದರು ಚಿತ್ರದ ಬಗ್ಗೆ ವಿಶ್ವಾಸದ ಮಾತುಗಳನ್ನಾಡಿದ್ದಾರೆ. “ಡಿಯರ್‌ ಸತ್ಯ’ ಚಿತ್ರಕ್ಕೆ ಶ್ರೀಧರ್‌ ವಿ ಸಂಭ್ರಮ್ ಸಂಗೀತವಿದ್ದು, ವಿನೋದ್‌ ಭಾರತಿ ಛಾಯಾಗ್ರಹಣವಿದೆ.