ಪವನ್‌ ಶಿಷ್ಯನ ಗೂಗ್ಲಿ-2

Team Udayavani, Mar 4, 2019, 11:04 AM IST

ಯಶ್‌ ನಾಯಕರಾಗಿರುವ “ಗೂಗ್ಲಿ’ ಚಿತ್ರದ ಬಗ್ಗೆ ನಿಮಗೆ ಗೊತ್ತೇ ಇದೆ. ಪವನ್‌ ಒಡೆಯರ್‌ ನಿರ್ದೇಶನದ ಈ ಚಿತ್ರ ಯಶಸ್ಸು ಕಂಡಿತ್ತು ಕೂಡಾ. ಈಗ “ಗೂಗ್ಲಿ-2′ ಎಂಬ ಚಿತ್ರವೊಂದು ಆರಂಭವಾಗುತ್ತಿದೆ. ಹಾಗಂತ ಈ ಚಿತ್ರದಲ್ಲಿ ಯಶ್‌ ನಟಿಸುತ್ತಿಲ್ಲ ಮತ್ತು ಪವನ್‌ ನಿರ್ದೇಶಿಸುತ್ತಿಲ್ಲ. ಬದಲಾಗಿ ಪವನ್‌ ಜೊತೆ ಹಲವು ಸಿನಿಮಾಗಳಲ್ಲಿ ಕೆಲಸ ಮಾಡಿ ಅನುಭವವಿರುವ ರಾಜ್‌ ಗುರು ಎನ್ನುವವರು ನಿರ್ದೇಶಿಸುತ್ತಿದ್ದಾರೆ.

ಇದು ಇವರ ಚೊಚ್ಚಲ ಸಿನಿಮಾ. ತಮ್ಮ ಮೊದಲ ಸಿನಿಮಾಕ್ಕೆ “ಗೂಗ್ಲಿ-2′ ಎಂದು ಹೆಸರಿಟ್ಟಿದ್ದಾರೆ. “ಗೂಗ್ಲಿ-2′ ಚಿತ್ರದಲ್ಲಿ ಯಾರು ಹೀರೋ ಎಂದು ನೀವು ಕೇಳಬಹುದು. “ನಾನು ಮತ್ತು ವರಲಕ್ಷ್ಮೀ’ ಎಂಬ ಸಿನಿಮಾವೊಂದು ಬಂದಿರೋದು ನಿಮಗೆ ನೆನಪಿರಬಹುದು. ಪ್ರೀತಂ ಗುಬ್ಬಿ ನಿರ್ದೇಶನದ ಈ ಸಿನಿಮಾ ಮೂಲಕ ಪೃಥ್ವಿ  ನಾಯಕರಾಗಿ ಲಾಂಚ್‌ ಆಗಿದ್ದರು.

ಈಗ “ಗೂಗ್ಲಿ-2′ ಚಿತ್ರಕ್ಕೆ ನಾಯಕರಾಗಿದ್ದಾರೆ. “ನಾನು ಮತ್ತು ವರಲಕ್ಷ್ಮೀ’ ಚಿತ್ರ ನಿರ್ಮಿಸಿದ್ದ ಮಂಜುನಾಥ್‌ ಅವರೇ “ಗೂಗ್ಲಿ-2′ ಚಿತ್ರಕ್ಕೂ ಬಂಡವಾಳ ಹೂಡುತ್ತಿದ್ದಾರೆ. ಈ ಚಿತ್ರಕ್ಕೆ “ಒನ್ಸ್‌ ಅಗೇನ್‌ ಸ್ಪಿನ್‌’ ಎಂಬ ಟ್ಯಾಗ್‌ಲೈನ್‌ ಇದೆ.

ಎಲ್ಲಾ ಓಕೆ, “ಗೂಗ್ಲಿ-2′ ಕಥೆಯೇನು ಎಂದು ನೀವು ಕೇಳಬಹುದು. ನಿರ್ದೇಶಕ ರಾಜ್‌ ಗುರು, ಒಂದು ಔಟ್‌ ಅಂಡ್‌ ಔಟ್‌ ಲವ್‌ಸ್ಟೋರಿ¿ೊಂದಿಗೆ ಬರುತ್ತಿದ್ದಾರೆ. “ಗೂಗ್ಲಿಗೂ ಈ ಚಿತ್ರಕ್ಕೂ ಯಾವುದೇ ಸಂಬಂಧವಿಲ್ಲ. ಇಲ್ಲೊಂದು ಲವ್‌ಸ್ಟೋರಿಯನ್ನು ಹೇಳಲು ಹೊರಟಿದ್ದೇನೆ. ಕಥೆ ತುಂಬಾ ಮಜವಾಗಿ ಸಾಗುತ್ತದೆ’ ಎನ್ನುವುದು ನಿರ್ದೇಶಕರ ಮಾತು. ಚಿತ್ರಕ್ಕೆ ನಾಯಕಿ ಸೇರಿದಂತೆ ಇತರ ತಾರಾಬಳಗದ ಆಯ್ಕೆ ಇನ್ನಷ್ಟೇ ನಡೆಯಬೇಕಿದೆ.